2 Tesalonika 2 - mzwDBL

Nɛn waa ɛ Yeesu Kristo dɔm tenten

¹ Yabala, ya Dɔɔ Yeesu Kristo bala waa ne ɡɛ ya bwa aa dɛ ba o be chema la, n dɛ soŋe heya,

² hɛ́ɛ lii a waa kɛrɛdɛ. Maa nyin nomɛlbwa bol wetamaa ane, ásɛ he den ɔmɛ dɛɛ lii kɛŋɔ ya Dɔɔ balɔ kaa. Dɛ ba ŋɔ Korowii Domadɛɛɡe baɡ ba ɡɛ baa bol, kɛɛ dɛ he na tɔn bɛl o neɡre heyaa kɛŋɔ yanee chwerɔ waa, he bɛ no dɛ́ ɡel a ɛ heyaa waane.

³ He bɛ ɡel nomɛlbwa neɡre heyaa ŋwɛnɛ bɛlbwa ta. Hé jemɛ kɛŋɔ waane ɛɛ ɛo mɔɔ ásɛ tɔpere la ba. Gɛ saŋ nɛra aa ir dɛ́ warɛ pirim dɛ́ vɛh Korowii la ɛɛ bao, mɔɔ nɛn waa ɛ Kristo dɔm tenten Korowii bandia aa lɔ o nɛɛ kɛŋɔ ó chɔɡo la le.

⁴ Wɛɛ ɛ o tenee dɛ́ ɡwaa komɛlbwa nɛra aa dɛ toma dɛɛ yera ba dɔɔranar, hale wɛɛ kpɔ Korowii Dea berɛ sobɔr dɛ́ ŋɔ onee Korowii.

⁵ Haa lii kɛŋɔ n fa aa lɔ he be la dɛ n dɛ baɡle heyaa ɡɛ waa nɔ naa?

⁶ Hé jemɛ kɛŋɔ komɛlee tɔɔ ŋwɛnɛ o le kahonɛ la, nemenɛ o saŋ tel.

⁷ Wechɔɡa dɔɔ ba taraken, kɛ aa won dɔ bɔr kohona, nemenɛ kon la waa tɔa ŋwɛnɛ la le mɔɔ.

⁸ Dɛ kon waa tɔa ŋwɛnɛ la baa le aa, belaa Wechɔɡa Te la ɛɛ ba bochaah lee nɛra jemɔ. Kɛ ya Dɔɔ Yeesu Kristo bala jirima ne o nyoa peu ɡbo kwara ɛɛ won kpoo buɡ ta.

⁹ Gɛ saŋ waa ba mɔɔ Yeesu ba kpoo la, Bɔnsam ɛɛ do o nɛɛ dɛɛ chao kɛrɛdɛ o won dɔ kpeɡri kohona, dɛ́ won dɛɛ ɛ nyokpowaa ne wejena, dɛɛ neɡre nɛra kɛŋɔ Korowiirii tɛo kpeɡri ken,

¹⁰ dɛɛ ɛ wechɔɡa bwa soo siwi aa lole, dɛ́ won dɛɛ neɡre nɛra baa nyoɡra dɛɛ ba chɔɡa la. Korowii ɛɛ chɔɡ baa, dɛkalkɛŋɔ ba vɛh kasinteŋ waa aa dɛ ba wona lɛɛ ba la, ba ta o waa nyine.

¹¹ Anomanta, o ɡelɔ nyosone o nyoa aa kpeɡa ɛɛ ba ba be dɛ ba tɔɔɡe ba sie, asɛ baa yarada waa aa ɛ nyosone,

¹² ásɛ o won pa nomɛlbwa waa wola sɛɛh dɛ teŋɛ o kasinteŋ waa la ta kɛ dɛɛ ɛ wechɔɡa o sie lɛ a ta la bolchɔɡe.

Kiŋkiŋ cheɡa wa

¹³ Anomanta, a chɛ kɛŋɔ yá jam Korowii saŋ bɛlbwa he wa, yabala. O dɛ nyin heyaa kɛrɛdɛ, dɛ le harɛ mumpar la bwa le heyaa kɛŋɔ wɛɛ lɛ heyaa. O Domadɛɛɡe aa ɡela he doŋa bwa le he nɛɛ la, ne ɡɛ haa no o kasinteŋ waa dɛ yaradaa la, a waa o lɛ heyaa la.

¹⁴ Yanee fa bol Amanesoma la baɡle heyaa he no la, asɛ Korowii che a ta le heyaa ásɛ he ne ya Dɔɔ Yeesu Kristo won pɛ dɔ jirima.

¹⁵ Anomanta, yabala, hé lawɛ kiŋkiŋ dɛ́ teŋɛ waa la bwa yaa kpɔ nyoa dɛ baɡle heya, ne anɔ la yaa chwera tɔn ta dɛ tɛ heyaa la ta. Hé ɡel a bwa do he nyu bini kɛrɛdɛ.

¹⁶ Ya Dɔɔ Yeesu Kristo ɡbaɡba ne N Naa Korowii waa ɛ ya Mɛɛ dɛɛ nyin yaa kɛrɛdɛ dɛ sune ya nɛɛ dɛ cha yaa, dɛ tɛ yaa hwɛɡa aa wera ne ɡbemba aa wola tonɛ bwa la,

¹⁷ bá tɛ heyaa ɡbemba dɛ ɡel he che kiŋkiŋ, ásɛ dɛ won ɛ wedɛɛɡa te bɛlbwa, dɛ́ won dɛɛ bola ɡe.