2 Tesalonika 1 - mzwDBL

¹ Men Pɔɔl ne Silvanos ne Timotii chwerɛ tɔn nɔ dɛɛ tɛ he nɛra haa ɛ asɔre tena haa lɔ Tesalonika dɛ ɛ N Naa Korowii waa bera ɛ ya Mɛɛ la ne ya Dɔɔ Yeesu Kristo nɛra la.

² Ń Naa Korowii ne ya Dɔɔ Yeesu Kristo cha heya, dɛ́ tɛ heyaa bosɔɔhna.

Korowii jaama ne wesoŋa

³ Yabala, ya koh he waa dɛ yon dɛɛ jam Korowii. He chɛ ɡɛ, dɛkalkɛŋɔ he yarada haa dɛ yarada Korowii la dɛ kaa sie saŋ bɛlbwa. Nyina haa dɛ nyin dɔŋa la ɡe ɡba dɛ do kan ja.

⁴ Ya ɡbaɡba dɛ bol he waa dɛɛ baɡle asɔre tena baa cheme bobɛlbwa dɛɛ tomɛ Korowii la, dɛɛ kpɛɛ heya. Ya dɛ ŋɔ ba be ɡɛ nɛra aa dɛ ɛ heyaa hɔhɔrɔwa, aa no heyaa saŋ bɛlbwa, asɛ he dɔ bambile haa wola habɔɔ le dɛ ta teŋɛ dɛɛ yarada Yeesu la.

⁵ He we-ɛɛla baɡlɔ kɛrɛdɛ kɛŋɔ Korowii bole waa pa heyaa la toɡrɔ. Haa koh o Kora waa dɛɛ na hɔhɔrɔwa nɔ, anee dɛ́ baɡle kɛŋɔ he chɛ o Kora la ta jae.

⁶ Kɛ nɛra baa dɛ ɛ heyaa hɔhɔrɔwa la te, Korowii ɛɛ bɔ ba a kemee. O we-ɛɛla toɡrɔ. Ó ɛɛ ba ɡɛ hɔhɔrɔwa la,

⁷ dɛ ɡel he bwara sɔɔh heya. Ya ne he bwaa dɛɛ ba bosɔɔhna la dɔe ɡɛ saŋ ya Dɔɔ Yeesu Kristo aa forɛ le nyundua o ne o nyundua toroma baa dɛ di kpeɡri ne nii nɛɛ ba la.

⁸ O balaa, wɛɛ bol nɛra baa wola Korowii jemɛ, baa wola Amanesoma aa dɛ baɡle ya Dɔɔ Yeesu waa noɛ la waa, dɛ́ bɔ ba a kem,

⁹ dɛ́ per ba le o be. Baa o kpeɡri aa ɡela o dɔ jirima laanee na kpa, ásɛ o kpɔ hɔhɔrɔwa aa wola jaɡa dɔe bwa ta ba nɛ.

¹⁰ Awola waa ba o tɔpejen la ta ásɛ o nɛra tɛo duure la, nɛra baa yaradao la bwa ɛɛ nao dɛ́ kpɛɛro. He ɡba jao, dɛkalkɛŋɔ ya fa aa baɡle heyaa o waa la, he noɔ dɛ teŋɛ a ta.

¹¹ Yeesu bala la waa ya yon dɛɛ soŋe Korowii dɛɛ tɛ heya, ásɛ o cha heyaa he soɡa bini won maɡre dɛ́ chɛ lee waa le heyaa dɛ tɛ o te la, dɛ́ tɛ heyaa kpeɡri he won ɛ wedɛɛɡa la bwa aa lɔ he bambile bini ne wobɛlbwa haa ŋɔ hé ɛ, yarada haa yaradao la nomanta.

¹² Ya dɛ soŋe Korowii ɡɛ, ásɛ ya Dɔɔ Yeesu sɔn won dɔ jirima dɛ́ le he we-ɛɛla ta, ásɛ he ɡe ɡba won dɔ jirima dɛ́ le o be. N Naa Korowii ne ya Dɔɔ Yeesu Kristo suna waa dɛ sune ya nɛɛ dɛɛ cha yaa la nomanta, á bwa won ɛ ɡɛ.