2 Samoɛl 9 - mzwDBL

Kooro Devid ne Mɛfebɔsɛt

¹ Awola bɛl, Kooro Devid bɔɔrɔ ŋɔ, “Nomɛl ta ka Kooro Sɔɔl dem ásɛ n koh Jonatan wa dɛ́ ɛo wedɛɛɡe aa?”

² Dɛ bonɔɔ bɛl lɔ Kooro Sɔɔl dem baa yerɔ Siba. Ba yerɔ ba kooro sie asɛ o bɔɔro ŋɔ, “Henee baa yerɛ Siba la aa?” O chaŋe ŋɔ, “N dɔɔ menee, he bonɔɔ.”

³ Belaa kooro bɔɔro ŋɔ, “Nomɛl ta ka Kooro Sɔɔl dem ń nyin o wa ɡɛ maa baɡɛ Korowii nyoa la aa?” Anee Siba chaŋe ŋɔ, “Jonatan bibaa bɛl lole. O ɛ boobi.”

⁴ Asɛ kooro bɔɔ ŋɔ, “Leperaa o dɔɔ.” Anee Siba chaŋe ŋɔ, “O lɔ Ameɛl bibaa Makir dem Lo Debar.”

⁵ Anomanta, Kooro Devid ɡelɔ ba ka kpɔɔ le Makir dem ba.

⁶ Jonatan bibaa Mɛfebɔsɛt waa ɛ Kooro Sɔɔl naa aa ba Kooro Devid be la, o ɡuŋu dɛ kpɔ duure tɛo. Belaa Kooro Devid ŋɔ, “Mɛfebɔsɛt!” O chaŋe ŋɔ, “N naa menee, he bonɔɔ.”

⁷ Kooro Devid ŋɔ o be ŋɔ, “Dɛɛ berɛ ɔma, mɛɛ koh he mɛɛ Jonatan waa dɛ́ nyini kɛrɛdɛ. Mɛɛ berɛ he naa Kooro Sɔɔl harɛ la bwaa tɛɛ, ásɛ n ne he pɛ nɔn dɛɛ di kwa saŋ bɛlbwa n dem.”

⁸ Asɛ Mɛfebɔsɛt ɡuŋu ja dɛ ŋɔ, “Bɔkwaa men maa ɛ he bonɔɔ, maa wola toole wobɛlbwa bini kɛ nyoate lale, ɛɛ ba wona su he siwi ɔ?”

⁹ Belaa Kooro Devid yerɛ Kooro Sɔɔl bonɔɔ Siba dɛ ŋɔ, “N kpɔ he nomoa komɛlbwa aa ɛ o ne o bii kwaa bwa tɛ o naa Mɛfebɔsɛt.

¹⁰ He ne he bii ne bonɔɔna chɛ kɛŋɔ hé parɛ harɛ la, dɛ́ kpɔ o ta kondikwaa baa tɛo, ɡɛ aa ɛ ásɛ he nomoa naa dɔ kondikwa dɛɛ di. Onee n ne wɛɛ ba kondikwa dɛɛ dii n dem saŋ bɛlbwa.” Dɛ Siba dɔ bibaala fi dɛ banue dɛ bonɔɔna ɡe fifraanɛ.

¹¹ Belaa Siba ŋɔ kooro be ŋɔ, “Mɛɛ ɛ wobɛlbwa men maa ɛ he bonɔɔ haa do mɛ a ta bwaa.” Anomanta, dɛ Mɛfebɔsɛt dɛ di kondikwa Kooro Devid dem kɛŋɔ koobie ken.

¹² Dɛ Mɛfebɔsɛt bibaa bɛl sɔne Mika, asɛ Siba dem nɛra bwa ɡe ɛ Mɛfebɔsɛt bonɔɔna.

¹³ Anomanta, Mɛfebɔsɛt waa ɛ boobi la soɡe Jerusalam, dɛɛ di kwaa kooro dem tɔpere bɛlbwa.