2 Samoɛl 8 - mzwDBL

Kooro Devid dɔma nɛɛ pɔe

¹ A habɔɔ la, Kooro Devid berɔ ka yo Filisti tena dɛ pɔ ba nɛ, dɛ lɛ bwɛjen Gat ne o bwɛɛre aa baro bwa le Filisti tena ba fa aa dɛ di a kpeɡri la be.

² O berɔ ka yo Moab tena ɡe dɛ pɔ ba nɛ. O ɡelɔ nɛra baa laɡ ba laa la ta la chɔ harɛ bɔre atoro, asɛ o maɡ ba ŋwɛn ne. O kpoo nɛra baa chɔa teŋɛ nɛɛ la, dɛ ɡel banɔ la baa chɔa teŋɛ tooro la, o ta ban kpoorɛ. Gɛɛ a do Moab tena ba do Kooro Devid lɔɡa, dɛ kpɔ harɛ la kwaa baa tɛo.

³ Belaa Kooro Devid berɛ ka yo Rehob bibaa Soba Kooro Hadadesa, ɡɛ saŋ waa la Yufretis Moo nyoa dɛ ka lɛ bela harɛ ba do o lɔɡa ja la.

⁴ Kooro Devid lawɛ Kooro Hadadesa kwaa aa do kɛŋɔ torɔɡore kaɡboŋ, ne laa tena baa soɡe laa torɔɡore bini kaɡboŋa banuanɛ, ne laa tena kaɡboŋa fifraanɛ baa dɛ valɛ. O ɡel kwaa aa do kɛ torɔɡore la lafa, ne jaɡre ane aa dɛ ba torɔɡore la tɛɡra, dɛ chaa a kabora habɔɔ nadɛɛne.

⁵ Siiria tena baa le Damaskɔs balɔ dɛ ba cha Soba Kooro Hadadesa, asɛ Kooro Devid kpoo ba bini nɛra kaɡboŋa fifraanɛ dɛ banɛ.

⁶ Kooro Devid bɔne laa tena la bini ba so kuore ta Damaskɔs harɛ ta, asɛ Siiria tena la do o lɔɡa dɛ kpɔ harɛ la kwaa baa tɛo. Korowii ja Kooro Devid nɛɛ dɛ ɡel bobɛlbwa waa la ka yo la, o pɔ ba nɛ.

⁷ Kooro Devid kpɔ suuɡaswɛm kwaa Kooro Hadadesa nomonome aa kpɔa dɛɛ tɔ ba te ɡbemɡbe laa ta la, dɛ ba a ne Jerusalam.

⁸ O berɔ pa ayaawa aa wara le Kooro Hadadesa bwɛjena Teba ne Bɛrɔtae ta.

⁹ Hamat Kooro Tou aa baa no kɛŋɔ Kooro Devid yo Kooro Hadadesa dɛ pɔ o ne o laa tena bwa nɛɛ la,

¹⁰ o tomɛ o bibaa Hadoram Kooro Devid be, o ka jaamo yoi waa kaa yo Kooro Hadadesa dɛ pɔ o nɛɛ la wa. Dɛ o ne Kooro Tou nɔ yo laa ka. Hadoram kpɔ suuɡaswɛm ne suuɡapoŋa dɛ ayaawa kwaa bwa soo siwi ba tɛ Kooro Devid.

¹¹ Kooro Devid kpɔ a ɡɛ kwaa nɔ dɛ lea cheɡ tɛ Korowii toma, ɡɛ o fa aa ɛ suuɡapoŋa ne suuɡaswɛm waa paa le harɛre waa kaa yo dɛ pɔ a nɛra nɛɛ la.

¹² A ɡɛ harɛre laanee, Edom ne Moab, ne Amɔn ne Filisti, dɛ Amalɛk. O berɔ kpɔ kwaa waa paa laa ta le Soba Kooro Rehob bibaa Hadadesa be la ɡe le cheɡ tɛ Korowii toma.

¹³ Kooro Devid aa le laa ta ba dɛ kpoo Edom tena nɛra kaɡboŋa fi dɛ banuatoro Yar Fɛlembɔjen ta la, o sɔn leo kohona.

¹⁴ O bɔne laa tena la bini kuore ta ba so bwɛɛre ta Edom harɛ bwa, asɛ harɛ la tena bwa do o lɔɡa dɛɛ tomɔ. Korowii ja o nɛ, bobɛlbwa waa laŋa ka yo bwa.

Kooro Devid nomonome

¹⁵ Kooro Devid di kora Israel harɛ bwa, dɛ nyiŋi o nɛra waa aa toɡra ne kasinteŋ ne.

¹⁶ Dɛ haah bɛl baa dɛ yerɔ Seruya bibaa Joab laanee chɔ laa tena nyoa, asɛ Ahilud bibaa Jehosafat ɡe chwerɛ waa aa chiɡa bwa dɛɛ bil,

¹⁷ asɛ Ahitub bibaala Sadɔk ne Abiata bibaala Ahemɛlɛk ɡe ɛ sɔfore, asɛ Seraya ɡe ɛ ba karake waa chwerɛ waa dɛɛ do tɔne bini.

¹⁸ Jehoiada bibaa Bɛnaya ɡe ɛ Kɛrɛt ne Pɛlet tena baa dɛ daah kooro la nomoa, asɛ Kooro Devid bibaala ɛɛ ja kooro o waa ta.