2 Samoɛl 7 - mzwDBL

Korowii baɡɛ Kooro Devid nyoa

¹ Kooro Devid baa so o koodem asɛ Korowii ɡel o dɔ bosɔɔhna dɛ le o dɔma baa baro cheme bwa be.

² Belaa o ŋɔ Korowii keame bɛl baa dɛ yerɔ Netan be ŋɔ, “N soɡe koodem baa kpɔ peleme daa kwaaro bini, asɛ Korowii Ne Nɛwɛnyina Fɔo Daka la te ta che tɛnte dea bini.”

³ Anee Netan chaŋe ŋɔ, “Ɛ wobɛlbwa aa lɔ he liire bini, dɛkalkɛ Korowii ja he nɛ.”

⁴ Kɛ awola jwaana la, Korowii ŋɔ Netan be ŋɔ,

⁵ ó ir la ka ŋɔ o bonɔɔ Devid be ŋɔ, “Henee dɛ́ do dea tɛ mɛ n ba so o bini naa?

⁶ Le awola tɔpere maa kpɔ Israel tena le Ijipt harɛ ta ba le fini, n ta dea bini soɡe bwa. Tɛnte dea binii mɛɛ so ba kpɔ mɛ dɛɛ ɡaaɡe.

⁷ Bobɛlbwa n ne Israel tena aa laŋa bwa, n ta ba sitɔɔla bɛlbwa maa do ba ŋɔ baa nyiŋi n nɛra nɛɛ kɛŋɔ peera be ŋɔe ŋɔ, ba ta peleme daa aa kpeɡa kpɔe kwaa dea tɛ mɛ.

⁸ N bonɔɔ Devid, peeraa he teɡɛ dɛɛ la ane dibɔr n ka lawɛ dɛ ba cheɡe kora ta n nɛra Israel tena nɛ.

⁹ N ja he nɛ bobɛlbwa haa laŋa, dɛ yo he dɔma baa lɔ he sie dɛ pɔ ba nɛɛ tɛɛ. Mɛɛ ɡeloo he sɔn le kɛŋɔ harɛ nɔ ta nɛnjena ken.

¹⁰ Mɛɛ kpɔ harɛ waa ɛ n nɛra Israel tena ɡbaɡba konee tɛɛ ba, bá ka so o ta ba bwara sɔɔh ba. Nɛnchɔɡa aa ban fiiɡi kpa, ɡɛ a fa aa doa wubwa la,

¹¹ ne ɡɛ maa ɛa dɛ le saŋ maa le sitɔɔla tɛ n nɛra Israel tena la. Mɛɛ berɔ tɛ heyaa bosɔɔhna le he dɔma bwa nɔn ta. Men Korowii, n bol he be ŋɔ he ne he naanaree dɛɛ ba koranar ɛɛ.

¹² Haa ba sewɛ ka pu he naawa la, mɛɛ ɡeloo he ɡbabir bibaala la bini bɛl bá chiɡ he naa ta dɛ́ di kora, ásɛ o kora che kiŋkiŋ saŋ bɛlbwa dɛɛ la.

¹³ Onee dɛ́ do n Dea tɛ mɛ n sɔn ta, ásɛ n ɡel o kora che kiŋkiŋ saŋ bɛlbwa dɛɛ la.

¹⁴ Mɛɛ ɛ o mɛɛ, ásɛ o ɛ n bie. O ɛ wechɔɡa aa, mɛɛ tɛr o deŋnee kɛŋɔ mɛɛ yon dɛɛ tɛr o bie deŋne o wechɔɡa waa la.

¹⁵ Maa n nyinaa laa kpɔ o nɛ, kɛŋɔ maa le Kooro Sɔɔl ne dɛ ɡel he ba chiɡ o naa ta di kora la.

¹⁶ He naanar ɛɛ do lee saŋ bɛlbwa, ásɛ n ɡel he kora che kiŋkiŋ saŋ bɛlbwa dɛɛ la.”

¹⁷ Ate, Netan bol waa Korowii aa kpɔa baɡlo la bwa baɡle Kooro Devid.

Kooro Devid wesoŋa

¹⁸ Belaa Kooro Devid ka jo Korowii Dea Cheremibɔr waa baŋro la bini, dɛ ka so Korowii sie dɛ ŋɔ, “Nemenɛ Korowii, umee n ɡe ne n lolanar, asɛ he ɛ ɡɛ waa nɔ dɔŋa bwa tɛ mɛ ken nɔɔ?

¹⁹ Nemenɛ Korowii, he ta ɡelɛ a jaɡɛ bela dɛ ta teŋɛ ɛ ane dɛɛ ja, he berɔ bol he bonɔɔ naanar baa ka ba kerekere ɡe wa. Nemenɛ Korowii, waa haa ɡela a chɔ le tɛ nɛwɛnyini bɛlbwa laanee nɔ naa?

²⁰ Bɔkwaa men Devid dɔ dɛ́ bol he be jaɔ? Nemenɛ Korowii, he ɡbabir jemɛ men maa ɛ he bonɔɔ wa.

²¹ N Naa Korowii, he cheɡɛ waa haa bola ne waa haa dɛ nyin ɛɛ ta dɛ ɛ wejena nɔ bwa, asɛ men maa ɛ he bonɔɔ jemɛ a wa.

²² Nemenɛ Korowii, he kan kohona. Nomɛlbwa toole dɛ do kɛ hen, ya te jemɔ saŋ bɛlbwa kɛŋɔ he ɡboo Korowii.

²³ Harɛ bɛlbwa nɛra toole dɛ do kɛŋɔ he nɛra Israel tena, harɛ beŋkpoŋ nɛra hen Korowii aa lɛɛ ba le wenaale ta Ijipt harɛ dɛ kpɔ ba ɛ he nɛra la. Wejena ne nyokpowe-ɛɛla haa ɛa tɛɛ ba la bwa ɡelɔ he dɔ sɔn harɛ nɔ ta bwa. He berɔ doŋi harɛre ane nɛra ne ba voɡa le ba sie.

²⁴ He lɛ he nɛra Israel tena cheɡ saŋ bɛlbwa dɛɛ la, asɛ dɛ ɛ Korowii baa dɛ tomɛ.

²⁵ N Naa Korowii, ɡel he nyobaɡa haa baɡɛ he bonɔɔ ne o naanar la do le saŋ bɛlbwa dɛɛ la. Ɛ ɡɛ haa ŋɔa la,

²⁶ á che a ta he dɔ sɔn kohona saŋ bɛlbwa dɛɛ la. Ásɛ nɛra na dɛ ŋɔ, ‘Korowiirii Koranar Bwa Kooro dɛɛ nyiŋi Israel tena nɛ!’ Ásɛ men, he bonɔɔ Devid naanar che kiŋkiŋ dɛ́ do he sie saŋ bɛlbwa.

²⁷ Koranar Bwa Kooro, Israel tena aa dɛ tomɛ, he pili waa nɔ bini baɡle men he bonɔɔ dɛ ŋɔ, ‘Mɛɛ ɡeloo he naanar ɛ koranar’

²⁸ Nemenɛ Korowii, henee Korowii yaa dɛ tomɛ! He waa ɛ kasinteŋ kɛ yaa teŋɛ a ta, asɛ he kpɔ wedɛɛɡa aa do ken baɡɛ men maa ɛ he bonɔɔ nyoa nɔ.

²⁹ N dɛ soŋe kɛ he swee n naanar andɛɛɡa, ásɛ baa di he laworomɛ saŋ bɛlbwa. Hen Nemenɛ Korowiirii baɡ mɛ a ɡɛ nyoa nɔ. Sweera haa sweera tɛ n naanar la ɛɛ do lee saŋ bɛlbwa dɛɛ la.”