2 Samoɛl 5 - mzwDBL

Devid ɛ Israel harɛ bwa kooro

¹ Israel deene la bwa ba Kooro Devid be Hɛbrɔn dɛ ba ŋɔ, “Ya bwa ɛ he lolanar dɛ ɛ nɛmbeŋkpoŋ.

² Kooro Sɔɔl fa aa ɛ ya kooro la, dɛ henee tɔ ya Israel tena sie dɛɛ la ya ne laa. Asɛ Korowii ŋɔ he be ŋɔ, ‘Henee dɛ́ nyiŋi n nɛra Israel tena nɛɛ kɛŋɔ peteɡre ken, dɛ́ ɛ ba kooro.’ ”

³ Anomanta, Israel nomonome la bwa ba Kooro Devid be Hɛbrɔn, o ne ba fɔwɛ fɔo Korowii sie bela, asɛ ba fuɡe noo do Devid nyu ta dɛ cheɡo kora ta Israel harɛ.

⁴ Kooro Devid aa di bene fifraatoro taa ba cheɡo kora ta, asɛ o di kora bene fifraanaarɛ.

⁵ Waa soɡe Hɛbrɔn la, o di kora Juda bene anuanɛ korobie anumɛl, asɛ Jerusalam ɡe, o di kora Israel ne Juda bwa bene fifraatoro dɛ atoro.

Kooro Devid pɔ Jerusalam tena nɛ

⁶ Kooro Devid ne o laa tena kpɔ ba te kaa Jerusalam dɛ́ ka yo Jebus tena baa soɡe bela la. Belaa Jebus tena la ŋɔ kooro be ŋɔ, “Haa won ba ya be bonɔ, hale nyoŋa ne boobie kwaraa ɛɛ won doŋi he berɛ kaa.” Dɛ ba liire bwaa kɛŋɔ Kooro Devid aa won la bela.

⁷ Kɛ ane a bwa, o yoo dɛ lɛ Jerusalam baa ma danjwɛkpeɡ baro la, asɛ baa yerɔ ‘Kooro Devid Bwɛjen’.

⁸ Awola tɔpere la, Kooro Devid ŋɔ laa tena la be ŋɔ, “Dɛ nomɛlbwa ɛɛ won pɔ Jebus tena nɛ aa, atane ó kpɔ bɔɔ nee aa kpɔ o bini dɛɛ ba la ta mɔɔ dɛ́ tel boobie ne nyoŋa la baa ɛ n dɔma la be. Gɛɛ a do ba yon ŋɔ, ‘Nyoŋa kɛɛ boobie aa koodem la nɔ.’ ”

⁹ Kooro Devid aa kaa yo Jerusalam dɛ pɔ o nɛra nɛɛ la, o kaa so bela dɛ pa o sɔn Kooro Devid Bwɛjen. O ma danjwɛkpeɡ baro dɛ le deŋɡare la wee leebɔr pera harɛ waa baro la ta.

¹⁰ Kooro Devid teŋɔ di kpeɡri kohona dɛkalkɛ dɛ Korowii waa ɛ Koronar Bwa Kooro ja o nɛ.

¹¹ Bwɛjen Taaya Kooro Hiram tomɛ nɛra Kooro Devid be ba kpɔ peleme daa ne kapenta tena, dɛ nɛra baa dɔ bwea kpɔe dɛ́ ma dea wejema, bá ma koodem tɛ Kooro Devid.

¹² Kooro Devid jemɔ kɛŋɔ, Korowiirii cheɡo kora ta Israel harɛ bwa, dɛ ɡel o dɔ kpeɡri o harɛ do wer kohona, o nɛra Israel tena wa.

¹³ Kooro Devid aa ir Hɛbrɔn dɛɛ kaa Jerusalam la, o kpɔ o sɛnanar ne o haahna tenten bane ja kaa bela, asɛ o ne ba loɡle bibaala ne bihaahna kohona ja.

¹⁴ Bii baa lola tɛo Jerusalam laanee, Samoa ne Sobab ne Netan dɛ Solomɔn,

¹⁵ ne Ibha ne Elisua ne Nɛfɛɡ dɛ Jafia,

¹⁶ ne Elisama ne Eliada dɛ Ɛlefɛlɛt.

Kooro Devid pɔ Filisti tena nɛ

¹⁷ Filisti tena aa noa kɛŋɔ ba fuɡe noo do Devid nyu ta dɛ cheɡo kora ta Israel harɛ bwa ta la, ba laa tena bwa iro dɛ kaa nyin o bɔr sibeɡra ne, asɛ Kooro Devid ɡe no ba wa, dɛ le ka chem ba bela waa soɡa danjwɛkpeɡ la ta.

¹⁸ Filisti tena la balɔ dɛ ba su Refaim Fɛlembɔjen bini bwa.

¹⁹ Belaa Kooro Devid ka bɔɔ le Korowii be ŋɔ, “N Naa Korowii, ń la ka yo Filisti tena nɔ naa? Hɛɛ kpɔ baa do n nɔn taa kɛɛ?” Asɛ Korowii chaŋo ŋɔ, “Ir kaa, mɛɛ kpɔ baa do he nɔn taa, ásɛ he pɔ ba nɛ.”

²⁰ Anomanta, Kooro Devid iro, dɛ ka yoo ba Baal Pɛrasem, dɛ pɔ ba nɛ. Dɛ ŋɔ, “Gɛ nee yon su ba tɔ bobɛlbwa la, ɡɛɛ Korowii ba tɔ n dɔma nɛɛ n sie.” Anomanta, ba dɛ yerɛ bela Baal Pɛrasem.

²¹ Filisti tena chwao ɡel ba voɡare bela, asɛ Kooro Devid ne o laa tena paa kaa.

²² Filisti tena la balɔ ba su Refaim Fɛlembɔjen bini ja,

²³ asɛ Kooro Devid ka bɔɔ le Korowii be ja, asɛ o chaŋo ŋɔ, “Hɛɛ berɛ sie pae dɛ́ kaa ba be. Hé bar ba ka che ba habɔɔ dɛ́ yoo ba daa ane baa dɛ yera balsam sie bela.

²⁴ Hé ba dɛ no ba naɡime sii daa la dor aa, hé pa mun dɛɛ yo, a dɛ baɡle kɛŋɔ men Korowiirii baa tɔ he sie, dɛ́ ka yo Filisti tena la dɛ́ pɔ ba nɛ.”

²⁵ Gɛɛ Kooro Devid ɛ ɡɛ Korowii aa doo bwa, dɛ won doŋi Filisti tena le Gebeɔn ba Gɛsa.