2 Samoɛl 4 - mzwDBL

Esbɔsɛt kpoe wa

¹ Kooro Sɔɔl bibaa Esbɔsɛt aa baa no kɛŋɔ Abna sewɛ Hɛbrɔn la, o ɔmɔ asɛ Israel tena bwa ɡe bambile teŋe.

² Dɛ Esbɔsɛt dɔ baala banɛ bane ba chɔ nɛra ba yon la ka lɔ tɔ bwɛɛre nɛra nɛɛ dɛ́ pa ba laala nyoa. Bɛl sɔne Baana, asɛ nɛɛte la ɡe Rekab. Remɔn waa le Beɛrɔt harɛ ta biirii ban, Bɛnjamen dea. Ba kpɔ Beɛrɔt nɔ ɛ Bɛnjamen dea harɛ pera,

³ dɛkalkɛ nɛra baa lɔ o ta chwao le bela ka so bwɛɛ Getaim. Ba ɛ hɔɔhra so bela ba le fini.

⁴ Dɛ Kooro Sɔɔl bibaa Jonatan dɔ bie bɛl baa yerɔ Mɛfebɔsɛt, o ɛ boobi. Waa di bene anue taa a le Jesreel ba kɛŋɔ Kooro Sɔɔl ne Jonatan sewɔ. Haah waa dɛ nyiŋi o nɛɛ la aa noa la, o kpɔɔ chwa. Waa dɛ too nomanta, bie la le o nɔn ta le harɛ, a taa a che o ɛ boobi.

⁵ Remɔn bibaala Rekab ne Baana iro ŋɔ ba dɛ kaa Esbɔsɛt dem. Baa kaa tel bela la, dɛ wee cheɡɛ nyufala, asɛ Esbɔsɛt so dɛɛ onɛ.

⁶ Asɛ ba jo kaa dea waa chɔ o bini la ta kɛŋɔ baa dɛ la ka nyin mea ken. Asɛ dɛ kpɔ kere tɔɡɛ o tea ta dɛ le chwa kaa.

⁷ Gɛ saŋ baa lɔ dea la bini la, dɛ Esbɔsɛt chɔ mpa ta. Baa tɔɡɔ o sewɛ tonɛ la, ba teŋe o nyu. Ba kpɔɔ valɛ awola jwaana la bwa Jɔɔdan Fɛlembɔjen bini dɛ kaa.

⁸ Ba kpɔ Esbɔsɛt nyu ba tɛ Kooro Devid Hɛbrɔn dɛ ŋɔ, “N naa, Esbɔsɛt nyuu la, o mɛɛ fa ɛɛ dɔm dɛɛ nyini dɛ́ kpo la. Fini Korowii ɡelɔ kooro tɔ o wel Kooro Sɔɔl ne o naanar nɛ.”

⁹ Ate, Kooro Devid chaŋe Remɔn bibaala Rekab ne Baana ŋɔ, “N ŋwɛɛ Korowii waa lole saŋ bɛlbwa dɛ lɛɛ mɛ le n wenaale bwa ta,

¹⁰ kɛŋɔ torome waa ba n be Siklaɡ dɛ ba bol Kooro Sɔɔl seo waa n be la, o liiro kɛŋɔ amanesoma nee o fe ɛɛ ba. N lawɔ dɛ kpoo, a ɛ amanesoma la kembɔr.

¹¹ Ɛrɛɛ mɛɛ ba nɛn waa wola wechɔɡa bɛlbwa ɛɛ dɛ chɔ o dea mpa ta nyubinikpeɡ tena ka kpoo waa bola ɔ? A ta chɛ kɛ o seo ɡure he nyu ta ń kpoo heyaa bɔ kem le harɛ nɔ ta naa?”

¹² Anomanta, Kooro Devid tɛ o laa tena ŋwɛnɛ asɛ ba ka kpoo Rekab ne Baana. Ba teŋni ba nɔɔra ne napaala, dɛ kpɔ ba saɡɛ tam bɛl waa lɔ Hɛbrɔn nyoa. Kɛ Esbɔsɛt te, ba kpɔ o nyu kaa ka huɡe Abna ŋwam ta Hɛbrɔn.