2 Samoɛl 3 - mzwDBL

¹ Laa la chɔ nɛra ba fa aa teŋɛ Kooro Sɔɔl nɛ ne Kooro Devid laa tena baah biɡri taeh. Kooro Devid ne o nɛra teŋɔ dɛɛ do kpeɡri, asɛ Kooro Sɔɔl ne o nɛra te nyoa ɛɛ sɔɔh.

² Kooro Devid lolɛ bibaala banumɛl Hɛbrɔn. Biloɡle la sɔne Amnɔn. O nya sɔne Ahinoam dɛ le Jesreel,

³ nɛɛte sɔne Keleab, o nya sɔne Abiɡel waa ɛ Nabal luhaah dɛ le Kaamɛl, toorote ɡe Absalɔm, o nyaa Maaka. Gesur Kooro Talmai bihaahnee.

⁴ Bibaa waa teŋa naarɛ sɔne Adonija, o nya sɔne Haɡit. Binue te la ɡe sɔne Sɛfatea, o nya sɔne Abital,

⁵ binumɛl te la sɔne Itriam, Kooro Devid haah Eɡla biee. A ɡɛ bibaala nɔɔ Kooro Devid lolɛ Hɛbrɔn.

Abna baa ja Kooro Devid nɛ

⁶ Kooro Sɔɔl ne o laa tena ne Kooro Devid ne o laa tena laa la ta la, dɛ nɛra baa teŋɛ Kooro Sɔɔl nɛɛ la dɛ nyin Abna waa taeh.

⁷ Dɛ Kooro Sɔɔl fa dɔ sɛno bɛl baa yerɔ Rispa, o nya sɔne Aeya. Anee Esbɔsɛt bɔɔ Abna ŋɔ, “Ɛrɛɛ he lawɛ n mɛɛ haah chɔ nɔɔ?”

⁸ Asɛ o baah di kohona waa waa bɔɔro la wa dɛ ŋɔ, “He dɛ lii kɛ n ɛ nyoatechɔɡe dɛ do Juda dea tena bini kɛɛ? Le fini dɛɛ kaa, n kpɔ n te do he mɛɛ Kooro Sɔɔl ne o lolanar dɛ o daamanar lɔɡa. N ta he bwara wechɔɡe bolɛ tɛ Kooro Devid, kɛ he dɛ bol ŋɔ n lawɛ he mɛɛ haah chɔ a ɛ waa aa wola were.

⁹ N ŋwɛɛrɔ kɛŋɔ dɛ n ta waa Korowii aa baɡɛ Kooro Devid nyoa la ɛɛ tɛo waa, ó tɛr n deŋne kohona,

¹⁰ dɛ́ berɛ kora waa lɔ Kooro Sɔɔl luɡe ta la, dɛ́ ɡel Kooro Devid kora che kɛrɛdɛ Israel ne Juda, dɛ́ le Dan waa lɔ weekaŋle nyundua dɛ́ ba kaa Beɛseeba waa lɔ weekaŋle harɛbɔr.”

¹¹ Esbɔsɛt ta wone bɔɔ Abna wobɛlbwa kpa, dɛkalkɛ dɛ o dɛ ɔmɔ.

¹² Belaa Abna tomɛ toroma bá ka ŋɔ Kooro Devid be ŋɔ, “Umee dɔ harɛ nɔ kpeɡri ɔ? Gel n ne he fɔwɛ fɔo, ásɛ n chae dɛ́ ba Israel tena bwa ne he be.”

¹³ Ate, Kooro Devid sɛh ŋɔ, “A wer ɡa! N ne hɛɛ fɔwɛ fɔwee. Kɛ kombeŋkpoŋii n hiah dɛ́ le he be. Dɛ Kooro Sɔɔl bihaah Mikal ta he nɛɛ jae yaa, bɛ ɡel he naa tire n sie kwara.”

¹⁴ Belaa Kooro Devid tomɛ toroma Kooro Sɔɔl bibaa Esbɔsɛt be ŋɔ, “Kpɔ n haah Mikal maa kpɔ Filisti tena lafa pen nyoa tɔne ba ɛ o bwara waa dɛ dɔɔ la tɛ mɛ.”

¹⁵ Anomanta, Esbɔsɛt ɡelɔ ba lawɛ Mikal le o jaa Paltiel waa ɛ Laes bibaa dea.

¹⁶ Baa lawɔ dɛɛ kaa la, o jaa Paltiel wio teŋɛ o nɛɛ ka tel bwɛɛ Bahurim ta. Belaa Abna ŋɔ o be ŋɔ “Berɛ kaa dem!” Asɛ o berɛ kaa.

¹⁷ Abna fa la Israel nomonome be dɛ ka ŋɔ, “Saŋ la bwaa he le dɛɛ nyin hé cheɡ Devid he kooro.

¹⁸ Saŋ laanee nɔ! Hé lii ɡɛ Korowii fa aa baɡɛ nyoa ŋɔ, ‘N bonɔɔ Devid nɛɛ mɛɛ ba cheɡa, dɛ́ lɛ n nɛra Israel tena le Filisti tena ne ba dɔma bwa nɔn ta.’ ”

¹⁹ Abna fa bol Bɛnjamen dea tena be, dɛ la Hɛbrɔn, Kooro Devid be, dɛ ka bol waa Israel tena ne Bɛnjamen dea tena aa sɛah ŋɔ baa ɛo la.

²⁰ Ate, baala fifraanɛ ja Abna nɛ ba ba Kooro Devid be Hɛbrɔn, asɛ Kooro Devid ɡel ba daa kondikonjena tɛ o ne baala baa ja o nɛɛ la.

²¹ Ate, Abna ŋɔ Kooro Devid be ŋɔ, “N dɔɔ, ɡel n ir warane dɛ́ la ka bol waa baɡle Israel tena ásɛ ba lɛɛ do, ba ne he fɔwɛ fɔo he di kora harɛ la bwa ta, ɡɛ he fa aa dɛ nyin la, dɛɛ nyiŋi ba nɛ.” Anomanta, Devid tɛ Abna ŋwɛnɛ o kaa deŋnesɔɔhna ne.

Abna kpoe wa

²² A habɔɔ la, Kooro Devid laa tena tama bane ne Joab kaa le laa ta ba, ba pa laala pirim le laa la ta ba. Kɛ dɛ Abna toole Kooro Devid be Hɛbrɔn kpa, dɛ kooro dɔɔ tao ŋwɛnɛ deŋnesɔɔhna ne o kaa.

²³ Joab ne o laa tena bwa aa kaa ba la, ba ŋɔ o be ŋɔ Abna ba Kooro Devid be asɛ o tao ŋwɛnɛ deŋnesɔɔhna ne o kaa.

²⁴ Anomanta, Joab la kooro be dɛ ka ŋɔ, “N naa kooro, bɔkwa waa he ɛ ken? Abna ba he be he berɛ tao ŋwɛnɛ o kaalaa? Taraken he ɡelɔ o dɔ bɔr kaa!

²⁵ He ɡbabir jemɛ Abna, o balɔ dɛ́ ba neɡre, dɛ́ ba nyiŋi he ŋwɛnɛre, dɛ́ jemɛ waa bwa haa dɛ ɛ.”

²⁶ Ate, Joab le Kooro Devid be, dɛ ka tomɛ toroma ba chwa ti Abna dɛ ka lawɔ kɔlɔŋ bɛl waa chɔ bobɛl baa dɛ yerɔ Sira, dɛ ba o ne. Dɛ Kooro Devid te aa a wobɛlbwa jemɛ.

²⁷ Abna aa bera ba Hɛbrɔn la, Joab lawɔ o ne o ka che bwɛjen la doonyojen keŋkeŋ, a do kɛŋɔ waa dɛ nyin kɛ o ne o ɡbo bol waane ken. Belaa o kpɔ kere tɔɡɛ o tea dɛ kpoo. Gɛɛ a do Joab kpo Abna bɔ kem, o nime Asahɛl o fa aa kpoo la wa.

²⁸ A habɔɔ Kooro Devid aa baa no la, o ŋɔ, “N ne n harɛ nɔ ta nɛn bɛlbwa ta bolchɔɡe dii Korowii sie, Abna seo wa.

²⁹ Korowiirii dɛ́ tɛr Joab ne o lolanar deŋne a wa. Kórowii kpɔ ŋwɛra kɛɛ bwadabii weechɔɡa, kɛɛ nɛn waa dɛ valɛ daa ne, kɛɛ laa ta seo, kɛɛ kondikwaa nyae, ba ta ba naanar baa ka ba bwa nɛ!”

³⁰ Gɛɛ a do Joab ne o nime Abisae kpo Abna bɔ kem, kpoe waa kpo ba nime Asahɛl laa ta Gebeɔn la wa.

³¹ Ate, Kooro Devid ŋɔ Joab ne nɛra baa ja o nɛɛ la be ŋɔ, “Hé kɛɛ he laala dɛ́ kpɔ lweyale tɔ á baɡle kɛŋɔ he loo kuu dɛ́ tɔ Abna lale sie.” Kooro Devid ɡbabir ɡe teŋɛ lale la nɛ.

³² Ba huɡe Abna Hɛbrɔn asɛ kooro ne nɛra la bwa wiu kohona, o huɡribɔr bela.

³³ Kooro Devid taa wiile nɔ tɛ Abna ŋɔ, “Ɛrɛɛ a chɛ kɛ Abna sewɛ ɡɛne seo waa do ken nɔɔ?

³⁴ Abna, ba ta he nɔɔra vɔrɔwɛ, kɛɛ dɛ do kwaa he nakpale. He sewɔ kɛŋɔ nɛn nɛnchɔɡa aa lawɔ ka kpo.” Asɛ nɛra la bwa berɛ wiu ja.

³⁵ Nɛra la bwa soŋe Kooro Devid ŋɔ ó nyin komɛl do nyoa mɔɔ wee le harɛ. Kɛ o ta sɛɛh dɛ ŋwɛɛ ŋɔ, “Dɛ n kpɔ komɛlbwa do nyoa mɔɔ wee le harɛ naa, Kórowii tɛr n deŋne kohona.”

³⁶ Nɛra la bwa sie lɛ waa kooro aa ɛa la ta, dɛ kpɔ do ba liire bini. Kasinteŋ, kooro wobɛlbwa waa ɛa lɛ nɛra la bwa sie.

³⁷ Awola tɔpere la, nɛra la bwa ne Israel tena bwa nao kɛŋɔ kooro nɔn toole Abna seo ta.

³⁸ Belaa kooro ŋɔ o nomonome la be ŋɔ, “Haa jemɛ kɛŋɔ nomonjen tenten cholo fini Israel harɛ nɔ ta naa?

³⁹ Fini, Korowii fuɡe noo do n nyu ta dɛ lee mɛ cheɡ kɛ kooro te, kɛ n ɡwɛɡrɔ. Seruya bibaala nɔ kpeɡri ɡwaa n nɛ. Korowiirii dɛ́ bɔ nɛnchɔɡe waa ɛ ɡɛ nɔ kem ɡɛ aa chɛa.”