Biblia Todo Logo
Bìoball air-loidhne

- Sanasan -

2 Samoɛl 24 - mzwDBL


Kooro Devid kure o laa tena

1 A habɔɔ la, Korowii baah di Israel tena baa lɔ weekaŋle nyundua la nɛɛ ja, dɛ ɡel Kooro Devid dɔ liire kɛŋɔ a chɛ kɛ ó la ka kure ba ne Juda tena baa lɔ weekaŋle harɛbɔr bwa ɡe.

2 Anomanta, Kooro Devid ŋɔ Joab ne laa nomonome la be ŋɔ, “Hé valɛ Israel deene la bwa ta, le Dan waa lɔ weekaŋle nyunduabɔr pera, dɛ́ ba kaa Beɛseeba weekaŋle harɛbɔr, dɛ́ chwerɛ ba sɔna dɛ́ ba bol n be, ásɛ n jemɛ ba nyoa.”

3 Anee Joab chaŋe kooro ŋɔ, “N naa kooro, Korowii haa dɛ tomɔ la ɡel laa tena la warɛ bele lafa dɛ́ ɡwaa, ásɛ he na. N naa, aah bɔkwa waa hɛɛ nyin he kur ba ɛɔ?”

4 Kooro Devid waa la tɔɔɡe Joab ne laa nomonome la waa la ta, anomanta, ba le kooro sie bela kaa dɛ ka chwerɛ Israel baala baa dɛ ba wona yo la sɔna.

5 Ba kaa ɡale Jɔɔdan Moo la, dɛ baŋre ba tɛnte deene bɛne Arowa, weekaŋle harɛbɔr bwɛjen waa lɔ fɛlembɔjen bɛl bini, dɛ teŋe kpɔ Gad harɛ ta kaa Jasa.

6 Ba la Gelead harɛ ne bwɛjen Kades waa lɔ Hiti tena harɛ ta, dɛ kpoŋe ka le Dan dɛ bar kaa bwɛjen Sidon bwa.

7 Ate, ba berɛ teŋe kpɔ bwɛjen Taaya danjwɛkpeɡ baa maa baro bɔr, dɛ kaa Hivi tena bwɛɛre ne Keenan tena harɛ bwɛɛre ta bwa. Ba berɔ la Beɛseeba waa lɔ Juda harɛ weekaŋle harɛbɔr, pua hɛŋle ɡbo harɛ ta.

8 Baa lea dɛ ka ɡaaɡe harɛ la bwa ta la, ba di korobie anuanaarɛ tɔpera fifraanɛ mɔɔ dɛ berɛ ba Jerusalam.

9 Joab ba kooro be ba baɡle laa tena la nyoa baɡlo ŋɔ, Israel harɛ ta ɡbo, ba lɔ laa tena kaɡboŋa lafraanuatoro, asɛ Juda harɛ ta ɡe, ba lɔ baala kaɡboŋa lafraanue.

10 Kooro Devid aa kure laa tena la tonɛ la, o liire ɛo anebɛlbwa asɛ o ŋɔ Korowii be ŋɔ, “Waa maa ɛa nɔ ɡelɔ n ɛ wechɔɡa kohona. N dɛ soŋe, laa bolchɔɡe men maa ɛ he bonɔɔ aa dia nɔ kpɔ n nɛ. N ɛ ɡɛnewa tenten.”

11 Tɔɔ aa pera chɔɔ mɔɔ kooro ir la, Korowii ŋɔ Kooro Devid keame Gad be ŋɔ,

12 “La ka ŋɔ Kooro Devid be ŋɔ, ‘Kenii men Korowii ɛɛ bol, webele atoroo n kpɔ dɛɛ tɛɛ, kpɔ a bini beŋkpoŋ ń kpɔ tɛr he deŋne.’ ”

13 Anomanta, Gad la Kooro Devid be ka bɔɔro ŋɔ, “He dɛ nyin kɛŋɔ lɔr chole he harɛ ta bene atoro, kɛɛ he teŋɛ chwa dɛɛ le he dɔma be, ásɛ ba ɡe chwa dɛɛ tii korobie atoro bwa nɔ? Kɛɛ weechɔɡa chole he harɛ ta tɔpera atoro nɔ? He ɡbaɡba kpɔ a liire, dɛ́ ɡel n jemɛ waa maa ka bol naate waa tom mɛ be.”

14 Anee Kooro Devid chaŋo ŋɔ, “N lɔ suna kohona dii ta. Maa nyin kɛ nɛwɛnyini te dɔɔ mɛ dɛ́ tɛr n deŋne, Korowii ɡbabirii dɛ́ tɛr n deŋne, dɛkalkɛ onee dɛɛ sune nɛn nɛɛ kohona.”

15 Anomanta, Korowii kpɔ weechɔɡa ba ta Israel harɛ ta, le awola chɔɔ ka tel saŋ waa lea cheɡ ta, asɛ baala kaɡboŋa fifraanuanɛ sewɛ dɛ le Dan ba kaa Beɛseeba.

16 Dɛ Korowii le o nyundua torome bɛl dɛ tɛo kpeɡri ŋɔ ó ba chɔɡ Jerusalam. Waa dɛ la ka chɔɡo la, Korowii berɔ charɛ o liire, dɛ ŋɔ nyundua torome la be ŋɔ, “Gel! A maɡre ɡɛ.” Gɛ saŋ dɛ torome la lɔ Jebus te Arauna mea lɔ bɔr.

17 Kooro Devid aa na ɡɛ nyundua torome la aa dɛ kpoo nɛra la, o soŋe Korowii ŋɔ, “N Naa Korowii, menee ɛ wechɔɡa dɛ di bolchɔɡe. Nɛra nɔ baa do kɛŋɔ peera nɔ laa ɛ waane. Kpɔ deŋnetɛra bɛlbwa ba ta n ne n haahna ne bii nɛ, dɛ́ ɡel he nɛra Israel tena.”


Kooro Devid ma saraha kon

18 Awola tɔpere la, Gad la Kooro Devid be dɛ ka ŋɔ o be ŋɔ, “Ir la Jebus te Arauna mea lɔ bɔr bela, dɛ́ ka ma kon baa ɛ saraha o ta tɛ Korowii.”

19 Anomanta, kooro teŋɛ Korowii nyoa wobol Gad aa baa bol o be la ta, dɛ ka ɛ ɡɛ tenten.

20 Arauna lɔ mea lɔ bɔr bela dɛ na kooro ne o nɛra aa dɛ ba, asɛ o le ka chemo, dɛ ka ɡuŋu dɛ kpɔ sie pi harɛ.

21 Arauna bɔɔro ŋɔ, “N Naa kooro, a som he ba n be bonɔ naa?” Anee Kooro Devid chaŋo ŋɔ, “N balɔ dɛ́ ba yawɛ he mea lɔ bɔr nɔ, dɛ́ ma kon maa ɛ saraha o ta tɛ Korowii, ɡɛ aa ɛ ásɛ weechɔɡa la ɡel nɛra kpoora.”

22 Ate, Arauna ŋɔ Kooro Devid be ŋɔ, “N naa kooro, kpɔ komɛlbwa haa dɛ nyin ka ɛ saraha la tɛ Korowii. Nabala haa kpɔ ɛ saraha baa fuah, ne daa aa sarawe mea lɔ bɔr, ne daa baa kpɔa dɛɛ dawɛ nae anɛ nɛɛ aa parɛ la ɡee nɔ bá kpɔ mar.

23 N naa kooro, n kpɔ anɔ bwa dɛɛ tɛɛ.” Dɛ berɛ ŋɔ, “Korowii haa dɛ tomɔ laanee dɛ́ no he wesoŋa.”

24 Asɛ kooro chaŋo ŋɔ, “Akai, n ta cheɡɔɔ kɛ ń bɔe o kem. Maa kwaa kpo dɛ́ fuah ɛ saraha tɛ Korowii maa dɛ tomɔ pɛɛpɛɛ maa wola kem bɛlbwaa bɔ.” Anomanta, o yawɛ mea lɔ bɔr la ne nabala la bwa suuɡapoŋa fifraanue.

25 Kooro Devid ma kon waa ɛ saraha o ta tɛ Korowii bela, dɛ kpoo kwaa ɛ sarahare baa fuah, ne deŋnesɔɔhna sarahare tɛo. Asɛ Korowii na Israel tena sum dɛ ɡel weechɔɡa la le harɛ la ta, nɛra aa serewe kpa.

© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.

Wycliffe Bible Translators, Inc.
Lean sinn:



Sanasan