2 Samoɛl 23 - mzwDBL

Kooro Devid nyoa wobol aa ka mun

¹ Jese bibaa Kooro Devid ɛ nomɛl Nemenɛ Korowii aa ɛo nɛnjen. Korowii Jekɔb aa tomɔ laanee leo cheɡ tɛ o te, asɛ o ɛ yelɡoɡoo Israel harɛ ta. Waa Kooro Devid aa ka mun bol laanee nɔ,

² “Korowii Doma baa so n nɛ, dɛ kpɔ o waa do n nyoa.

³ Korowii Israel tena aa dɛ tomɔ bol wa, Korowii waa do kɛ Bwetal ba chwa kaa marɔ la ŋɔ n be ŋɔ, ‘Kooro bɛlbwa waa dɛ nyiŋi o nɛra nɛɛ kasinteŋ ne dɛɛ ɔmɛ Korowii la,

⁴ do kɛŋɔ chɔɔlen wee yon dɛɛ chaah kohona kɛɛ bwaala yon nɛ tonɛ, wee pili mɛn do kpɔɡa ta dɛɛ nyɛɡle la.’

⁵ Gɛɛ Korowii ɛɛ ba n naanar andɛɛɡa sweera, dɛkalkɛ n ne o fɔwɛ fɔo waa do le saŋ bɛlbwa dɛɛ la, fɔo waa wola chɔɡ bwa, nyobaɡa waa wola charɛ. Waa bwa maa dɛ nyin laanee la, Korowiirii dɛ́ ɡel a bwa ɛ ɡɛ dɛ́ tɛ mɛ.

⁶ Kɛ nɛra baa wola Korowii tomɛ do kɛ sɔɔhne baa paa ta, nomɛlbwa aa won kpɔ nɔn lawa.

⁷ Buni kon kɛɛ lampeaa chɛ kɛ nɛn won kpɔ lawa, ásɛ a fuh kwaraa.”

Kooro Devid banyoola wa

⁸ Kooro Devid banyoola baa yoa tɛo la sɔnaa teŋa nɔ. Joseb Basebɛt, onee tɔ sie dɛ ɛ Hakmoni bibaa. Dɛ ba lɔ banyoola batoro, dɛ onee chɔ ba nyoa. O wono kpɔ o lampea yo baala lafraanuatoro dɛ kpoo ba laa bɛl ta.

⁹ Nɛɛte ɡee Dodai bibaa baa dɛ yerɔ Eliasa, o le Aho dea. Dɛ o ɛ banyoola batoro la bini bɛl, anomanta, o ja Kooro Devid nɛɛ ba ka muɡli Filisti tena baa kaa cheme bobɛl baa dɛ yerɔ Pas Damim baah, dɛ yoo ba laa. Israel laa tena la le habɔɔ,

¹⁰ kɛ o cheɡɔ kiŋkiŋ, dɛ kpoo Filisti tena la ka tel kɛŋɔ o nɔn aa baa koh, dɛ sɔɔh waa wola won lawɛ kere kpa. Korowii ɡelɔ o pɔ ba nɛɛ kɛrɛdɛ awola. Laa tena la berɔ kaa bela Eliasa aa cheɡa, dɛ ka pa nɛra baa kpoo ba la dɔmkwa.

¹¹ Toorote o ɡe aa ja banyoola la bini la sɔne Samaa, o mɛɛ sɔne Aɡee dɛ le bobɛl baa dɛ yerɔ Harar. Dɛ Filisti laa tena boa ba nyoa koo bɛl baa du chebe o ta, asɛ Israel laa tena chwa le bela kaa.

¹² Kɛ Samaa lɔ bambile che koo la baah ta, dɛ yo lɛ koo la cheɡ, dɛ kpoo Filisti tena la. Korowii ɡelɔ o kpoo ba kɛrɛdɛ awola.

¹³ Aa ka tama kwaa koma saŋ tel la, nomonome fifraatoro la bini batoro ba Kooro Devid be Adulam bwebɔɔ la ta. Dɛ Filisti laa tena ɡe boa ba nyoa dɛ cheme Refaim Fɛlembɔjen bini.

¹⁴ A ɡɛ saŋ dɛ Kooro Devid soɡe bela baa ma danjwɛkpeɡ baro deŋɡare bɛl doa, asɛ Filisti laa tena la ɡe bar Bɛtlɛham dɛɛ daah bela.

¹⁵ Nyɔɡre dɛ kpo Kooro Devid, asɛ o ŋɔ, “N dɛ nyin nomɛl fe aa kaa dɔ nee kɔlɔŋ waa chɔa bɛne Bɛtlɛham doonyojen la ta ba tɛ mɛ ń nyɔ!”

¹⁶ Anomanta, banyoola batoro la kpɔ bansua jo harɛ Filisti laa tena la aa soɡe o ta la ta, dɛ ka dɔ nee le kɔlɔŋ waa chɔa bɛne Bɛtlɛham doonyojen bini la ba tɛo. Kɛ o ta berɛ nyɔ, dɛ fuɡe ta ɛ saraha tɛ Korowii.

¹⁷ O ŋɔ, “Korowii ɛɛ la ane bojaŋ kɛŋɔ n nyɔ nee nɔ. Aa ɛo kɛŋɔ maa dɛ nyɔ baala baa ta ba nyu dɛ won la ka dɔ nee nɔ ba tɛ mɛ nɔ chal.” Anomanta, o vɛh nee la nyɔe. Waa banyoola batoro la aa ɛa laanee la.

¹⁸ Ate, Joab nime Abisae, onee fa chɔ nomonome batoro ba ɡe aa ɛ banyoola la nyoa. O kpɔ lampea ka yo baala lafraatoro dɛ kpoo ba. Gɛ taa a che o lɛ sɔn kɛŋɔ banyoola batoro la.

¹⁹ A lole kɛ dɛ baa on kure dɛɛ ja banyoola batoro la nɛ, kɛ onee bera ba chɔ ba bwa nyoa.

²⁰ Dɛ Jehoiada bibaa Bɛnaya ɛ nɛn waa won yoi kɛrɛdɛ, dɛ le bwɛjen Kabseel ta, o ɡe ɛ wejena kɛrɛdɛ. Onee wona ka kpo Moab baala banɛ baa won yoi kɛrɛdɛ la. O berɔ jo bɔɔ bini awola bɛl, dɛ dombwea leero dɛ ka kpo nyujente.

²¹ O berɔ kpo Ijipt te bɛl ɡe dɛ o kpeɡo kɛrɛdɛ. A lole kɛŋɔ dɛ Ijipt te la kpoŋe lampea, kɛ Bɛnaya kpɔ o ɡuli la o be sibeɡra ne, dɛ ka to o lampea le o nɔn ta dɛ kpɔ kpoo.

²² Waa Bɛnaya aa ɛa laanee la. O ɡe lɛ sɔn kɛŋɔ banyoola batoro la ken.

²³ Ba tɛo duure kohona ɡwaa banyoola fifraatoro la bini bɛlbwa, kɛ ba ta on kpɔe ja banyoola batoro la nɛ. Asɛ Kooro Devid ɡel o chɔ nɛra baa dɛ daahno la nyoa.

²⁴ Banyoola fifraatoro bane ɡe baa jaa laanee, Joab nime Asahɛl, ne Dodo waa le Bɛtlɛham bibaa Ɛlhanan,

²⁵ ne Samaa, ne Elika baa le Harɔd,

²⁶ ne Hɛlɛs waa le Palti, ne Ikes bibaa Ira waa le Tekoa,

²⁷ ne Abeɛsa waa le Anatɔt, ne Mebunai waa le Husa,

²⁸ ne Salmɔn waa le Aho dea, ne Maharai waa le Nɛtɔfa,

²⁹ ne Baana bibaa Hɛlɛd waa le Nɛtɔfa, ne Ribai bibaa Itai waa le Gebea, Bɛnjamen dea,

³⁰ ne Bɛnaya waa le Peratɔn, ne Hedai waa le Gaas nenabɔɔne ta,

³¹ ne Abi Albɔn waa le Aaba, ne Asmavɛt waa le Bahurim,

³² ne Eliaba waa le Saalbɔn, ne Jaasen bibaala, ne Jonatan,

³³ ne Samaa bibaa waa le Harar, ne Sarar bibaa Ahiam waa le Harar,

³⁴ ne Ahasbae bibaa Ɛlefɛlɛt waa le Maaka, ne Ahetofɛl bibaa Eliam waa le Gilo,

³⁵ ne Hesro waa le Kaamɛl, ne Paarai waa le Arab,

³⁶ ne Netan bibaa Iɡal waa le Soba, ne Haɡri bibaa,

³⁷ ne Sɛlɛk waa le Amɔn, ne Naharai waa le Beɛrɔt. Dɛ onee dɛɛ che Seruya bibaa Joab dɔmkwa,

³⁸ ne Ira waa le Itri, ne Gareb o ɡe aa le Itri,

³⁹ dɛ Uria waa ɛ Hiti te la. Ba bwa lɔ nɛra fifraatoro dɛ banuanɛ.