2 Samoɛl 22 - mzwDBL

Kooro Devid ɡo yel kpɛɛ Korowii

¹ Kooro Devid ɡo yel kpɛɛ Korowii ɡɛ saŋ waa lɛo le Kooro Sɔɔl ne o dɔma bwa nɔn ta.

² O ŋɔ, “N Naa Korowii do kɛŋɔ Bwetal maa chwaa kaa marɛ, ne danjwɛkpeɡ dɛɛ lɛɛ mɛ,

³ Korowii maa dɛ tomɛ do kɛŋɔ Bwetal maa chwaa kaa marɛ. Onee dɛɛ tɔ mɛ ɡbemɡbe dɛ ɛ n Kpeɡnɛn. Onee n chwa baa pɛl dɛɛ dɔ n nyu, dɛ ɛ n Lɛɛ le nɛra baa dɛ nyin yoi nɔn ta.

⁴ N wio dɛɛ yerɛ Korowii waa chɛ kpɛɛra kohona, on lɛɛ mɛ le n dɔma nɔn ta.

⁵ Seo do kɛŋɔ nehɛma dɛ lɔ baa tɔ n nɛ, a lɔɔ ba tɔ n nɛ kɛŋɔ ne aa sua, mɛɛ ba sewa.

⁶ A do kɛŋɔ seo aa dɔ ŋwɛɛra dɛ laɡ mɛ kpoŋe, kɛŋɔ lalbɔɔ aa har mɛ bela ken.

⁷ N wenaale ta la, n wio yerɛ Korowii, n wio yerɛ Korowii maa dɛ tomɔ ó cha mɛ. O lɔ o Dea bela baa dɛ tomɔ dɛ no n taa, n wii maa dɛ wi la tel o be.

⁸ Harɛ jiɡro jiɡra tenten, asɛ kwaa aa lawɛ nyundua kpoŋe yiiɡi, dɛkalkɛ dɛ Korowii baah diu.

⁹ Korowii hwee chuu le o mebɔɔne bini, nii aa dɛ chɔɡ kwa ne hɔla ɛɛ le o nyoa.

¹⁰ O forɔ le nyundua dɛ ba harɛ, asɛ baama biŋere do o naa lɔɡre.

¹¹ O soɡe Kerobim aa ɛ kena kwaa ta ir kaa nyundua, a do kɛŋɔ peu aa dɔ kena dɛ kpɔɔ ir dɛɛ kaa ken.

¹² O kpɔ biro tɔ o te kɛŋɔ yal, baama biŋere aa dɛ nɛ bwaala baro cheme.

¹³ Bwaala kɔrɔ, dɛ nyɛɡle, asɛ nii chaah o sie.

¹⁴ Nemenɛ Korowii kɔrɔ le nyundua kɛŋɔ bwaala ken, asɛ nɛra no o taa.

¹⁵ O ɡelɔ bwaala nyɛɡle dɛ lɔ o dɔma peɡre, a do kɛŋɔ waa ta hɛma do ba bini ken.

¹⁶ Korowii baah diu dɛ kah o dɔma aa, mpo vile bwa dɛ chɔ baŋ, baa na kwaa aa lawɛ harɛ kpoŋe.

¹⁷ O ha nɔn le nyundua ba laɡ mɛ kpoŋe, dɛ kpɔ mɛ le vile bini.

¹⁸ O lɛɛ mɛ le n dɔma baa kpeɡa nɔn ta, nɛra baa hah mɛ, dɛ do kpeɡri kohona ɡwaa mɛ.

¹⁹ N fa aa lɔ wenaale ta la, ba baa yoo mɛ, kɛ Korowii baa che n habɔɔ.

²⁰ O cha mɛ dɛ laɡ mɛ le wekpeɡa nyoa, o sie aa dɛ lɛ n nɛɛ nomanta, o lɛɛ mɛ.

²¹ Korowii cheɡɛ toɡra n wa aa toɡra ta dɛ cha mɛ, o swee mɛ andɛɛɡa, dɛkalkɛ n di boldɛɛɡe.

²² N dɛ teŋɛ Korowii Mmarare la ta, n ta habɔɔ berɛ kpo Korowii maa dɛ tomɔ la.

²³ N dɛ teŋɛ o Mmarare bwa ta, n ta waa waa do mɛ a ta ɡelɛ.

²⁴ O jemɔ kɛ wechɔɡe bɛlbwa toole n nɛ, n laa n te kpɔ wechɔɡa ta.

²⁵ A waa o che toɡra n waa aa toɡra ta dɛ cha mɛ, o jemɔ kɛ n di boldɛɛɡe.

²⁶ N Naa Korowii, he waa dɔ kasinteŋ tɛ nɛn o wa aa dɔ kasinteŋ, ɡɛ haa ɛ nɛndɛɛɡe la, ɡɛɛ hɛɛ nyin nɛndɛɛɡe wa.

²⁷ Gɛ he tea aa toa la, ɡɛɛ hɛɛ baɡlo ɡɛ he tea aa toa wa, kɛ nyubinikpeɡ tena te, he dɛ baɡ ba kɛ he dɔ wejema dɛ bol ba waa dɛɛ pa bole.

²⁸ He dɛ lɛ nɛra ba wa a pwɛra, kɛ mbarafo tena te, he dɛ ba ba ne harɛ.

²⁹ N Naa Korowii, henee do kɛ kandea dɛɛ chaah mɛ, henee ɡela biro ber mɛ bɔr waa chaahna.

³⁰ He tɛ mɛ bokpeɡa n won ka yo n dɔma, hale bwɛjen baa ma danjwɛkpeɡ baro nɛra dɛ pɔ ba nɛ.

³¹ Korowii maa dɛ tomɔ te, o ŋwɛnɛre toɡrɔ, o waa waa bol bwa ɛ kasinteŋ. Nɛra baa chwaa kaa marɔ la, o dɛ tɔ ba ɡbemɡbe dɛɛ lɛɛ ba.

³² Korowii habɔɔ, nomɛlbwa toole. O ɡbosoo do kɛ Bwetal n chwa kaa marɔ wɛɛ lɛɛ mɛ.

³³ Korowiirii dɛɛ tɛ mɛ bokpeɡa, dɛ ɡel n ŋwɛnɛre bwa do wer tɛ mɛ.

³⁴ O ɡelɔ n nakpale do kɛŋɔ chwae kwaa ken, n won bwejena dor cheɡa, n bwara ɛɛ sɔɔh mɛ.

³⁵ O dɛ baɡ mɛ ɡɛ maa yo laa nɔɔra ne, ɡɛ maa ɡure to baa kpɔ ayaawa ɛo dɛ́ yo.

³⁶ N Naa Korowii, henee tɔ mɛ ɡbemɡbe dɛɛ lɛɛ mɛ, he balɔ ba cha mɛ dɛ ɡel n dɔ sɔn.

³⁷ He kwaa ŋwɛnɛ o do paɡri tɛ mɛ, ásɛ n bɛ naa lɔ.

³⁸ N ti n dɔma dɛ ka pɔ ba nɛ, maa ba nɛɛ teŋaa ɡel, ka tel kɛŋɔ maa kpoo ba.

³⁹ N kpoo ba bil, baa wola won ir, n pɔ ba nɛɛ ba serewe chɔ n sie.

⁴⁰ Hen Korowiirii tɛ mɛ bokpeɡa mɛɛ yo laa, he ɡelɔ n pɔ n dɔma nɛ.

⁴¹ He ɡelɔ n dɔma chwa le n sie, n kpoo ba.

⁴² Ba wio dɛɛ nyin nɛn ó ba cha ba, kɛ nomɛlbwa ta balɛ dɛ ba lɛɛ ba. Ba wio no hen Korowii, he ta ban chaŋɛ.

⁴³ N pɔ ba nɛɛ ba chɔ harɛ kɛŋɔ bomboɡ peu aa taa dɛ kpɔa dɛɛ kaa, n tiɡri ba nɛɛ kɛŋɔ kpechɛɡre ken fɔɡbaahna.

⁴⁴ He lɛɛ mɛ le n nɛra baa ɛ deŋnekpeɡ tena nɔn ta, dɛ lee mɛ cheɡ kɛŋɔ harɛre bwa nyu te. Nɛra maa wola ban jemɛ baa do n lɔɡa.

⁴⁵ Nɛŋhɔɔhra baa ɡuŋ mɛ, ba no n wa aa, ba dɛ teŋɛ a ta.

⁴⁶ Ba bambile chɔɡɔ, dɛ kpɔ bochela le ba dekpeɡa bini dɛɛ ba.

⁴⁷ N jemɔ kɛ Korowii lole saŋ bɛlbwa, o chɛ kpɛɛra. N dɛ kpɛɛ Korowii waa do kɛ Bwetal n chwa kaa marɔ wɛɛ lɛɛ mɛ la!

⁴⁸ Onee ɡela n yo n dɔma dɛɛ pɔ ba nɛ, dɛ lawɛ harɛre nɛra baa do n lɔɡa,

⁴⁹ dɛ lɛɛ mɛ le n dɔma be. N Naa Korowii, he ɡelɔ n pɔ n dɔma nɛ, dɛ lɛɛ mɛ le naɡrenyine nɔn ta.

⁵⁰ Anomanta, mɛɛ kpɛɛree harɛre nɛra bwa siee, mɛɛ ɡo yelaa kpɛɛ he sɔn la.

⁵¹ He ɡelɔ kooro haa leo cheɡ tɛ he te la yo lajena, dɛ pɔ o dɔma nɛ, dɛ kpɔ he nyina aa wola jaɡa dɔe nyin nɛn haa fuɡe noo do o nyu ta, dɛ tɛ men Kooro Devid ne n naanar saŋ bɛlbwa dɛɛ la.”