2 Samoɛl 21 - mzwDBL

Kooro Sɔɔl naanar kpoora wa

¹ Kooro Devid kora dii saŋ la, lɔr chole harɛ la ta teŋɛ dɔŋa nɛɛ bene atoro. Anomanta, o bɔɔrɔ le Korowii be. Asɛ Korowii ŋɔ, “Kooro Sɔɔl ne o lolanar di bolchɔɡe nɛŋkpoa wa, dɛkalkɛ o kpoo Gebeɔn tena la ɡalɡa.”

² Kooro yerɛ Gebeɔn tena baa kaa la, dɛ bol waa baɡ ba. Dɛ Gebeɔn tena la ta Israel tena ɛɛ. Ba ɛ Amɔre tena bane Israel tena aa baɡ ba nyoa ŋɔ baa ban kpoo. Kɛ Kooro Sɔɔl siwi beɡrɔ wɛɛ nyin ba dɛ́ kpo, Israel ne Juda tena wa.

³ Kooro bɔɔ Gebeɔn tena la ŋɔ, “Bɔkwaa hɛɛ nyin kɛ ń ɛ tɛ heya ɔ? Bɔkwaa mɛɛ ba wona ɛ ásɛ he berɛ won swee Korowii andɛɛɡa tɛ nɛra baa ɛ o kapɛrɛ nɛra nɔɔ?”

⁴ Ba ɡe chaŋe ŋɔ, “Ya ne Kooro Sɔɔl lolanar waa nɔ ta suuɡapoŋa kɛɛ suuɡaswɛm waa ɛɛ, á ba ɛ kɛŋɔ ya dɛ nyin Israel te bɛlbwa dɛ́ kpo.” Ate, Kooro Devid bɔɔ ba ŋɔ, “Bɔkwaa hɛɛ nyin kɛ ń ɛ tɛ heya ɔ?”

⁵ Anee ba chaŋo ŋɔ, “Kooro Sɔɔl dɛ nyin ó kpoo yaa, ásɛ ya bini bɛlbwa bɛ ka Israel harɛ nɔ ta.

⁶ Anomanta, lawɛ o naanar banuanɛ baa ɛ baala tɛ yaa yá kpoo ba dɛ́ saɡ ba Korowii sie Gebea waa ɛ Kooro Sɔɔl bwɛɛ nɔ ta.” Asɛ kooro chaŋe ŋɔ, “Mɛɛ lee baa tɛ heya.”

⁷ Kooro Devid ne Jonatan ŋwɛɛra baa ŋwɛra baɡle dɔŋa Korowii sie nomanta, kooro ta Jonatan bibaa Mɛfebɔsɛt leɛ.

⁸ Kooro lawɛ Aamoni ne Mɛfebɔsɛt baa ɛ haah bɛl baa dɛ yerɔ Aeya, o bitolo Rispa bibaala waa lol ba tɛ Kooro Sɔɔl, dɛ Kooro Sɔɔl ɡbaɡba bihaah Merab bibaala banue ja. Bibaala la ɡe mɛɛ Adreɛl waa ɛ Baasilai bie, Mehola te la.

⁹ Kooro Devid kpɔ ba do Gebeɔn tena nɔn ta ba kpoo ba, dɛ kpɔ ba saɡɛ deŋɡare bɛl ta Korowii sie. Nɛra banuanɛ la bwa sewɔ tɔpebeŋkpoŋ. Awola laanee baa pa mea koma mun, asɛ dɛ kpoo ba.

¹⁰ Aeya bihaah Rispa, waa ɛ Kooro Sɔɔl sɛno, kpɔ lweyal paɡri tɔ bwe bɛl ta, dɛ so o lɔɡa dɛɛ daah nɛra baa serewa la. Le jaaɡe koma mumpar ka tel kɛŋɔ bwaala aa nɛa la, o ta ɡelɛ jumbii dɔ ba ola di webaŋa, kɛɛ kpɔɡ bini olchɔɡa ba dia jwaana.

¹¹ Kooro Devid aa no waa Rispa aa ɛa la,

¹² o iro la ka pa Kooro Sɔɔl ne o bibaa Jonatan hoɡa le Jabes Gelead tena be. Dɛ ba ŋwɛa le Bɛt San, bela nɛra yon kaa soŋni bwɛjen la doonyoa. Belaa Filisti tena kpɔ ba saɡɛ ɡɛ saŋ baa kpo Kooro Sɔɔl Gelboa Bwejen ta la.

¹³ Kooro Devid pa Kooro Sɔɔl ne o bibaa Jonatan hoɡa, dɛ nɛra banuanɛ baa kpoo ba dɛ saɡ ba la ɡe hoɡa.

¹⁴ Ba huɡe Kooro Sɔɔl ne o bibaa Jonatan hoɡa la bwebɔɔ baa huɡe Kooro Sɔɔl mɛɛ Kes bini Sela, Bɛnjamen dea harɛ ta. Gɛ Kooro Devid aa do ba laanee ba ɛ. A habɔɔ, Korowii no harɛ la tena wesoŋa.

Israel ne Filisti tena laa yoi

¹⁵ Laa berɔ chole Filisti ne Israel tena baah. Kooro Devid ne o laa tena leɔ kaa dɛ ka yoo ba. Yoi la bini la, Kooro Devid baa koh dɛ ɡwɛɡre.

¹⁶ Belaa baa bɛl waa kpeɡa kɛrɛdɛ dɛ ɛ Rafa naa baa yerɔ Esbe Bɛnɔb, ŋɔ wɛɛ kpo Kooro Devidii. Dɛ o kpoŋe ayaawa lampea, o nyoa buni tɔɡre aa ɛ kilore atoro ne fah, dɛ berɛ kpoŋe tokobifale ɡe.

¹⁷ Asɛ Seruya bibaa Abisae ba dɛ ba lɛ kooro. O baa yo Filisti te la dɛ kpoo. Belaa Kooro laa tena la ŋwɛɛ baɡlo ŋɔ, “N naa kooro, haa ya nɛɛ teŋɛ la laa kpa, ɡɛɛ dɛ́ ɡel hen haa do kɛŋɔ kandea dɛ tɔ ya Israel tena sie nɔ, ba bɛ hen ba kpo, ásɛ Israel kandea dime, ya paŋɛ.”

¹⁸ Anɔ habɔɔ, ba ne Filisti tena berɔ yo laa Gɔb. Laa la ta la, Sibekai waa le Husa kpo Rafa waa kpeɡa, o bwara do kpeɡri kohona naanar la bini bɛl baa dɛ yerɔ Saf.

¹⁹ Ba ne Filisti tena berɔ yo laa bɛl Gɔb ja, anee Jɛɛ bibaa Ɛlhanan waa le Bɛtlɛham kpo Goliat waa le Gat. O lampea nyoa buni tɔɡre kɛŋɔ yasɔɔh kokorowa daa ken.

²⁰ Laa bɛl ɡe chole Gat ja. Dɛ baa bɛl kpeɡo o bwara do kpeɡri kohona. O nɔn bɛlbwa ta, o dɔ nonie anumɛl, o nanie ɡe ɛ anumɛl o nakpale ta. A bwa lɔ fifraanɛ dɛ anaarɛ. O ɛ Rafa naa.

²¹ O muɡli Israel tena baah, asɛ Simea waa ɛ Kooro Devid dɔɔranar la bini bɛl bibaa Jonatan kpoo.

²² A ɡɛ nɛra banaarɛ nɔɔ Rafa naanar baa lɔ Gat, asɛ Kooro Devid ne o laa tena kpoo ba.