2 Samoɛl 20 - mzwDBL

Seeba ɛ Kooro Devid deŋnekpeɡ

¹ A balɔ kɛŋɔ Bikri bibaa Seeba lɔ Gelɡal harɛ, o le Bɛnjamen dea. Dɛ o dɔ dichɔɡa o nyu bini. O hoh bɛla dɛ ŋɔ, “Ya ta dibɔr bɛlbwa dɔe Kooro Devid be, yaa Jese bibaa nɛɛ teŋɛ! Israel baa bɛlbwa berɛ kaa dem.”

² Anomanta, Israel laa tena la bwa le Kooro Devid habɔɔ, ba ne Seeba kaa. Kɛ Juda laa tena la teŋɛ Kooro Devid nɛɛ le Jɔɔdan Moo la ta dɛ ba Jerusalam.

³ Kooro Devid aa bera kaa o koodem Jerusalam la, o lawɛ o sɛnanar fi baa dɛ daah koodem la do dea, baa daah ba. Dɛ o dɛ tɛɛ ba komɛlbwa kɛ dɛ o ne baa chɔ. Ba chɔ dea ka tel ba serewe wee, kɛŋɔ luhaahna ken.

⁴ Belaa kooro ŋɔ Amasa be ŋɔ, “Yerɛ Juda laa tena la bwa, he ne ba ba cheme n sie tɔpera atoro nɔ ta.”

⁵ Amasa laŋɔ ka yerɛ Juda laa tena la cheme, kɛ o berɔ biɡri asɛ saŋ kooro aa doo la ɡarɛ.

⁶ Belaa kooro ŋɔ Abisae be ŋɔ, “Seeba nɔ ɛɛ ba waa nee ba ta ya nɛ ɡwaa Absalɔm. Kpɔ he dɔɔ laa tena la dɛ ti ba, o ken ɛɛ ka nyin bwɛjena baa ma danjwɛjena bara la bɛl binii ka sɔh, dɛ́ chwa yaa.”

⁷ Anomanta, Abisae kpɔ Joab ne o laa tena la ne kooro nɛra baa dɛ daahno, dɛ laa tena baa ka Jerusalam bwa le, ba ne o ti Seeba.

⁸ Ba tel bwe bɛl waa lɔ Gebeɔn ta, asɛ Amasa ba chem ba. Dɛ Joab do o laa batakaare, dɛ vɔwɛ kiriso asɛ kerejeɡa do o tɔɔ bini dɛ sɛɡle o ta. Waa dɛ tel o be la, kere la le o tɔɔ bini le harɛ.

⁹ Joab bɔɔ Amasa ŋɔ, “N dam, ɛrɛɛ he bwara doɔ?” Belaa Joab kpɔ nɔndiɡ lawɛ Amasa tampona dɛ ɡbaaro pɛl o te.

¹⁰ Dɛ Amasa aa jemɛ kɛŋɔ Joab kpoŋe kere o nɔn bɛl la ta, asɛ Joab kpɔ yaɡɛ o tea o looni le dɛ ba le harɛ. O sewɛ buɡ ta, anomanta, o ta on wobɛlbwa ɛɛ kpa. Belaa Joab ne o nime Abisae ti Seeba ɡe.

¹¹ Joab laa tena la bɛl cheɡɛ Amasa chɔɔ la jwɛh dɛ ŋɔ, “Nomɛlbwa waa dɛ nyin Joab wa dɛɛ teŋɛ Kooro Devid nɛɛ la, ó teŋɛ Joab nɛ!”

¹² Chal tɔ Amasa chɔɔ la o chɔ ŋwɛnɛ baah. Baa la nao kɛŋɔ laa tena la bɛlbwa tel belaa o dɛ che. Waa na ɡɛ la, o tuuɡu le ŋwɛnɛ la ta ka ta kpɔɡ bini dɛ kpɔ yal tɔ o nɛ.

¹³ Waa laa Amasa chɔɔ la laa kpɔ ŋwɛnɛ la ta tonɛ la, laa tena la bwa teŋɛ Joab nɛ ba ka ti Seeba.

¹⁴ Seeba kpɔ Israel deene harɛre bwa ta ka le bwɛjen bɛl baa dɛ yerɔ Ebel Bɛt Maaka, asɛ Bɛr dea tena bwa cheme dɛ teŋɛ o nɛɛ ba jo o ta.

¹⁵ Joab laa tena la bwa balɔ dɛ ba chɔ bar Ebel Bɛt Maaka, dɛ ba noɔ kɛŋɔ Seeba lɔ bela. Ba ma kwaa báa kpɔ a ta jo bwɛjen la ta, a pɛl danjwɛkpeɡa baa maa bar bwɛjen la. Baa kpɔ bune dɛɛ chuɡe danjwɛɛ la dɛɛ kuuɡu la,

¹⁶ haah bɛl waa jemɛ waa baa che bwɛɛ la danjwɛkpeɡ doa dɛ do lɔŋɔ ŋɔ, “Hé yerɛ Joab tɛ mɛ bonɔ, ń bol waane o be.”

¹⁷ Ate, Joab ba asɛ haah la bɔɔro ŋɔ, “Henee Joab la aa?” Asɛ o chaŋe ŋɔ, “Ɔɔh, menee.” Asɛ haah la ŋɔ, “Nomoa, cheɡ deŋne dɛ́ no men maa ɛ he tolo be.” Ate, o chaŋe ŋɔ, “N dɛ no he be.”

¹⁸ Haah la ŋɔ, “Saŋ la ba yon ŋɔ, ‘He dɛ nyin wejema aa, la bwɛjen Ebel,’ dɛ ɡɛɛ baa ɛ.

¹⁹ Nɛra yaa soɡe bwɛjen nɔ ta waa dɔ deŋnesɔɔhna kohona ne kasinteŋ Israel harɛ, asɛ hɛɛ nyin he chɔɡ bwɛjen Ebel. Ɛrɛɛ hɛɛ nyin he chɔɡ Korowii kapɛrɛ kwaa nɔɔ?”

²⁰ Anee Joab chaŋe ŋɔ, “Akai, Korowii ɛɛ la ane bojaŋ kɛŋɔ ń ba chɔɡ bwɛjen nɔ.

²¹ Gɛ laa waa la do. Bikri bibaa Seeba waa le Efrem deŋɡarere harɛ ta laanee ɛ Kooro Devid deŋnekpeɡ. Hé le Seeba ɡbo ne tɛ mɛ, ásɛ n ɡel wobɛlbwa dɛ́ berɛ kaa.” Belaa haah la ŋɔ Joab be ŋɔ, “Yaa kpoo dɛ́ kpɔ o nyu ba che danjwɛɛ ta viɡri tɛɛ.”

²² Ate, haah la kpɔ o liire waa ba a ne la tɛ nɛra la bwa, asɛ ba sɛh dɛ teŋe Seeba nyu dɛ kpɔ viɡru. Belaa o hoh bɛla la, asɛ o laa tena la bwa peɡre le bwɛjen la ta, asɛ bɛlbwa kaa o dem. Asɛ Joab ɡe berɛ kaa kooro be Jerusalam.

²³ Dɛ Joab, onee chɔ Israel laa tena bwa nyoa, asɛ Jehoiada bibaa Bɛnaya chɔ Pɛlet ne Kɛrɛt tena baa dɛ daah kooro la nyoa,

²⁴ asɛ Adoniram chɔ nɛra baa dɛ do ba tomkpeɡa ta nyoa, Ahilud bibaa Jehosafat ɡe chɔ waa aa chiɡa ba chwera dɛɛ bil dɛ́ kwaa cheɡ nyoa.

²⁵ Sɛva ɛ kɔɔto karake, asɛ Sadɔk ne Abiata ɛ sɔfore,

²⁶ dɛ Ira waa ɛ Jɛɛ te ɡe ɛ Kooro Devid sɔfore la bɛl.