2 Samoɛl 2 - mzwDBL

Ba cheɡ Devid kora Juda harɛ ta

¹ A habɔɔ la, Devid bɔɔ Korowii ŋɔ, “N Naa Korowii, mɛɛ won la ka so Juda bwɛɛre nɔ bɛl ta naa?” Anee Korowii chaŋo ŋɔ “Ɔɔh.” Asɛ Devid berɛ bɔɔ ŋɔ, “Bwɛ besoo ta nɔ?” Anee Korowii ŋɔ, “Ka so Hɛbrɔn.”

² Anomanta, Devid ne o haahna banɛ, Ahinoam waa le Jesreel, ne Abiɡel waa ɛ Nabal luhaah dɛ le Kaamɛl la iro, dɛ kaa Hɛbrɔn.

³ O berɔ kpɔ laa tena baa ja o nɛɛ la ne bɛlbwa haah ne o bii, asɛ ba ka so Hɛbrɔn ne bwɛɛre aa baro la ta.

⁴ Belaa Juda baala ba Hɛbrɔn bela, dɛ ba fuɡe noo do Devid nyu ta, dɛ cheɡo Juda harɛ ta kooro. Devid aa baa no kɛ Jabes Gelead baalaa huɡe Kooro Sɔɔl la,

⁵ o tomɛ toroma Jabes Gelead baala la be ŋɔ, “Korowii swee heyaa andɛɛɡa kɛ haa nyin he dɔɔ Kooro Sɔɔl dɛ huɡo nɔ.

⁶ Kórowii sune he nɛ, dɛ́ cha heya. N ɡee sune he nɛɛ, dɛ́ cha heya waa haa ɛa nɔ wa.

⁷ He bɛ ɔmɛ, hé che kiŋkiŋ, Kooro Sɔɔl waa ɛ he dɔɔ la sewɔ, asɛ Juda dea tena fuɡe noo do n nyu ta, dɛ cheɡ mɛ kora ta.”

Ba cheɡ Esbɔsɛt kora Israel harɛ ta

⁸ Nɛr bibaa Abna waa ɛ Kooro Sɔɔl laa nomoa la lawɛ Kooro Sɔɔl bibaa baa dɛ yerɔ Esbɔsɛt ɡale Jɔɔdan Moo la, dɛ ba o ne Mahanaim.

⁹ Abna cheɡo kora ta wɛɛ nyiŋi Gelead ne Asuri ne Jesreel ne Efrem ne Bɛnjamen dɛ Israel harɛre bwa ta.

¹⁰ Kooro Sɔɔl bibaa Esbɔsɛt aa baa di kora la, dɛ o di bene fifraanaarɛ. Bene anɛ ɡboo o di kora. Kɛ dɛ Juda dea tena te teŋɛ Kooro Devid nɛ.

¹¹ Kooro Devid di kora Hɛbrɔn Juda dea harɛ ta bene anuanɛ korobie anumɛl.

¹² Awola bɛl, Nɛr bibaa Abna ne Esbɔsɛt nomonome iro le Mahanaim dɛ ba bwɛjen Gebeɔn ta.

¹³ Asɛ Joab baa dɛ yerɛ o nya Seruya, ne Kooro Devid nomonome ir le ka chem ba tam bɛl waa chɔ Gebeɔn nyoa. Kooro Devid ne o nɛra soɡe tam la baŋ bɛl, asɛ banɔ la ɡe so o baŋ bɛl.

¹⁴ Belaa Abna ŋɔ Joab be ŋɔ, “Gel ya yerɛ bonɔɔna le baŋ bɛlbwa ta ba, bá yo ya siwi ta.” Ate, Joab chaŋe ŋɔ, “A wer.”

¹⁵ Ate, baala fi dɛ banɛ le Esbɔsɛt ne Bɛnjamen dea, ba ne baala fi dɛ banɛ ba ɡe aa le Devid be pera yo.

¹⁶ Bɛlbwa hamɛ o dɔŋ nyu kpoŋe, ba kpɔ keri tɔɡɛ dɔŋa baŋ bɛla, asɛ ba nɛra fifraanɛ dɛ banaarɛ la bwa chole dɛ serewe. Anomanta, ba dɛ yerɛ bela Hɛlkat Hasurim o do Gebeɔn harɛ ta.

¹⁷ Belaa laa chole sibeɡra ne awola, asɛ Kooro Devid baala la pɔ Abna ne Israel tena la nɛ.

¹⁸ Dɛ Seruya bibaala batoro lɔ bela. Banee Joab ne Abisae dɛ Asahɛl. Dɛ Asahɛl won chwae kɛŋɔ kweɡla ken.

¹⁹ O chwao ti Abna, o ta kee nyiŋi diɡ kɛɛ ɡal.

²⁰ Abna baa ke nyiŋi dɛ nao, dɛ ŋɔ, “Henee nɔ naa, Asahɛl?” Asɛ o chaŋe ŋɔ, “Ɔɔh, menee.”

²¹ Belaa Abna berɛ ŋɔ, “Bɛ chwa teŋɛ n nɛ, chwa teŋɛ laa tena la bɛl nɛ dɛ́ ka lɛ o dɔmkwa.” Kɛ Asahɛl ta noɛ, dɛ ta chwa teŋɛ o nɛɛ ɡɛ.

²² Abna berɔ ŋɔ o be ŋɔ, “Bɛ chwa teŋɛ n nɛɛ ɡɛ. Bɛ ɡɛ ɛ, ásɛ n ba kpoe. A ba ɡɛ naa, ɛrɛɛ mɛɛ ba wona nyiŋi he dɔɔ Joab siwi ta nɔ?”

²³ Kɛ Asahɛl vɛoh dɛ ta teŋɛ o nɛ, asɛ Abna ta o lampea la habɔɔ, asɛ o mun daa la ka yaɡɛ o tea dɛ vah le o nyaŋ ta. Buɡ la ta, o chole chɔ dɛ sewɛ. Nomɛlbwa valɔ ba tel bela aa, o yon che dɛ́ nyiŋi.

²⁴ Kɛ Joab ne Abisae ti Abna, wee aa ba dɛ jo la, ba baa tel deŋɡare bɛl baa dɛ yerɔ Ama ta. O bɛne bwɛɛ bɛl baa dɛ yerɔ Gia ŋwɛnɛ, dɛ kaa Gebeɔn harɛpɛɛ waa chɔa kaa ta.

²⁵ Ate, Bɛnjamen dea baala ba bar Abna cheme. Ba boa ba nyoa, asɛ dɛ ka che deŋɡare bɛl doa.

²⁶ Anee Abna ŋɔ Joab be ŋɔ, “A chɛ kɛ yá yo dɛɛ la ɡɛ naa? Haa jemɛ kɛŋɔ bambichɔɡa nee aa ba bala ba tɛ yaa aa? Harɛ beŋkpoŋ nɛraa yan, saŋ besoo hɛɛ ba ɡela he nɛra ɡel chwae dɛɛ ti yaa ɔ?”

²⁷ Anee Joab chaŋe ŋɔ, “N ŋwɛɛ Korowii waa lole saŋ bɛlbwa kɛŋɔ, dɛ ken laa he bol aa, n nɛra la fe ɛɛ ti heyaa ka tel kere chɔɔ.”

²⁸ Belaa Joab hoh bɛla a baɡle kɛ o laa tena la ɡel Israel tena la tii, ba ta yoi kpa.

²⁹ Awola jwaana la bwa Abna ne o laa tena la valɔ kpɔ Jɔɔdan Fɛlembɔjen bini, mɔɔ dɛ ɛɡɛ le o baŋ. Tɔ aa pera chɔɔ la, ba valɔ dɛ ba le Mahanaim.

³⁰ Joab aa ɡel Abna tii la, o boa o laa tena la bwa nyoa, dɛ na kɛŋɔ ba bini fi dɛ banuanaarɛ sewɔ dɛ ja Asahɛl nɛ.

³¹ Dɛ Kooro Devid laa tena la kpoo Abna laa tena lafraatoro fifraanumɛl baa le Bɛnjamen dea.

³² Joab ne o laa tena kpɔ Asahɛl, dɛ ka huɡo ba lolanar bwebɔɔ waa lɔ Bɛtlɛham bini. Asɛ ba valɛ awola jwaana la bwa, dɛ ba tel Hɛbrɔn bɔr chaahna saŋ.