2 Samoɛl 19 - mzwDBL

¹ Joab baa no kɛŋɔ Kooro Devid dɛ wi o bibaa Absalɔm waa sewa la kohona.

² Anomanta, silɛɛ waa lole dɛ le yoi baa kaa yo dɛ pɔ ba dɔma nɛɛ awola tɔpere la berɛ laa tena la bwa bambichɔɡa, dɛkalkɛ ba noɔ kɛŋɔ kooro dɛ wi o bie waa sewa la.

³ Laa tena la ba dɛ jo bwɛjen la bini sum ne kɛŋɔ, baa pɔ ba nɛɛ laa ta ba kpɔ sihiih chwa la ken.

⁴ Kooro kpɔ nɔɔra tɔ sie dɛ do lɔŋɔ kohona ŋɔ, “N bidɛɛɡe Absalɔm, n bidɛɛɡe kohona.”

⁵ Belaa Joab jo kooro dem bela dɛ ka ŋɔ o be ŋɔ, “N naa, he ɡelɔ sihiih kpo he laa tena baa lɛ he ne he bibaala, ne bihaahna ne haahna dɛ he sɛnanar la nyu.

⁶ He dɛ nyin nɛra baa haeh, dɛ hah nɛra baa dɛ nyin he wa! He berɔ ɡel ya jemɛ fini kɛŋɔ laa tena ne nomonome baa chɔ ba nyoa la ta komɛlbwa ɛɛ he be. N nao kɛŋɔ he sie ɛɛ lɛo kɛŋɔ Absalɔm fe aa lole ásɛ ya bwa serewe.

⁷ Ir le ka larawe he laa tena la bwara. N ŋwɛɛ Korowii o sɔn aa kana la kɛŋɔ dɛ he ta leɛ kaa laa, bɔr ne joe nɛmbeŋkpoŋ kwara aa he bee ka. Dɛ a fe ɛ wedoŋa dɛ ɡwaa anɔ la bwa haa naa le he bonɔɔne saŋ ba le fini.”

⁸ Ate, kooro ɡel wii dɛ ir dɛ ka so bwɛjen la doonyojen la jwɛh. O laa tena la noɔ kɛŋɔ o leɔ dɛ ba so bela, asɛ ba la ka che baro. Anɔ bwa aa dɛ ɛ la, dɛ Israel tena la bwa berɔ kaa ba deremi.

Kooro Devid berɔ ba Jerusalam

⁹ Dɛ Israel tena la bwa dɛ tɔŋle dɔŋa ŋɔ, “N naa kooro lɛ yaa le ya dɔma nɔn ta, dɛ́ lɛ yaa Filisti tena ɡe nɔn ta, kɛ o berɔ koh Absalɔm wa, dɛ chwa le harɛ nɔ ta.

¹⁰ Absalɔm ɡe yaa fuɡe noo do o nyu ta dɛ cheɡo ŋɔ ó ɛ ya kooro la ɡe ka laa ta. Ɛrɛɛ haa wola Kooro Devid ka kpɔe ba te waa bol kpa nɔɔ?”

¹¹ Kooro Devid no waa Israel tena la aa dɛ bol la, anomanta, o tomɛ Sadɔk ne Abiata baa ɛ sɔfore la ŋɔ bá ka bɔɔ Juda harɛ nomonome ŋɔ, “Ɛrɛɛ he ɛ nɛra haa ka mun dɛɛ ba men kooro ne n koodem nɔɔ?

¹² He ɛ n lolanar, ya bwa ɛ nɛmbeŋkpoŋ. Ɛrɛɛ he ta sie tɔe dɛ berɛ ka mun, n kpɔe dɛ ba n koodem nɔɔ?”

¹³ Kooro berɔ ŋɔ ba bɔɔ Amasa ŋɔ, “N lole laa hen ya bwa ɛ nɛmbeŋkpoŋ aa? Le fini dɛɛ kaa dɛ he laa dɛ́ ɛ nomoa dɛ́ chiɡ Joab naa ta, dɛ́ chɔ n laa tena nyoa aa, amɔ te Kórowii tɛr n deŋne kohona.”

¹⁴ Juda harɛ laa tena bwa bambile lawɛ Kooro Devid waa la, asɛ ba bwa nyoa pɛ, dɛ kpɔ kala tɛo ŋɔ o ne o laa tena la bwa berɛ ba.

¹⁵ Kooro Devid aa bera dɛɛ ba la, Juda harɛ laa tena bwa baa chemo Jɔɔdan Moo ta. Dɛ ba ba Gelɡal, dɛ́ ba kpɔɔ ɡale Jɔɔdan Moo.

¹⁶ Gɛ saŋ la tenten Gɛra bibaa Simei waa le Bahurim dɛ le Bɛnjamen dea, ɡe ɛ warane kaa Jɔɔdan Moo nyoa dɛ́ ka cheme Kooro Devid.

¹⁷ Dɛ Bɛnjamen dea laa tena kaɡboŋ ja o nɛ. Dɛ Siba ɡe waa dɛ daah Kooro Sɔɔl dem la kpɔ o bibaala fi dɛ banue, dɛ bonɔɔna fifraanɛ ja o nɛ. Ba ɛ warane ba Jɔɔdan Moo la nyoa dɛ ba cheme Kooro Devid.

¹⁸ Ba cheɡɛ leebɔɔ la ta, dɛ́ ka kpɔ kooro ne o dem nɛra ɛɡɛ le, dɛ́ ɛ wobɛlbwa waa dɛ nyin tɛo. Belaa Simei aa ɛɡɛ Jɔɔdan Moo la le la, o baa chole chɔ kooro sie,

¹⁹ dɛ ŋɔ o be ŋɔ, “N dɔɔ, Korowii bɛ ɡel he pa mɛ bolchɔɡe kpa. Bɛ wechɔɡa maa ɛa awola haa dɛ le Jerusalam la lii. N dɛ soŋe kɛ he laa kpɔ he nyu bini.

²⁰ Men maa ɛ he bonɔɔ jemɔ kɛŋɔ n ɛ wechɔɡa, kɛ fini n balɔ kɛŋɔ nɛn waa tɔ sie dɛ le Josef dem dɛ ba cheme n dɔɔ kooro.”

²¹ Belaa Seruya bibaa Abisae ŋɔ, “A ta chɛ kɛŋɔ bá kpo Simei ɡɛ waa nɔ wa aa? O taah nɛn Korowii aa leo dɛ fuɡe noo do o nyu ta, dɛ cheɡo kora ta.”

²² Anee Kooro Devid chaŋe ŋɔ, “Seruya bii, bɔkwa waa n ne he dɔ ɛɛ yɔ? He nyin wa ba dawɛ n nɛ, dɛ berɛ n dɔma! A chɛ kɛ bá lawɛ nɛn kpo Israel harɛ ta fini ɡɛ naa? N laa kooro Israel harɛ ta taraken nɔ naa?”

²³ Asɛ kooro ŋɔ Simei be ŋɔ, “N ŋwɛɛrɔ kɛŋɔ a ta chɛ kɛŋɔ bá kpoe.”

²⁴ Kooro Sɔɔl naa bɛl baa dɛ yerɔ Mɛfebɔsɛt ɡe laŋɔ ka cheme kooro. O ta o naa saramɛ kɛɛ dɛ kuu o tampona, kɛɛ dɛ chɛɡɛ o laala, dɛ le awola kooro aa lea kaa, dɛ ba le tɔpere waa bera ba deŋnesɔɔhna ta.

²⁵ Mɛfebɔsɛt aa le Jerusalam ba dɛ ba cheme kooro la, kooro bɔɔro ŋɔ, “Ɛrɛɛ he ta ɡelɛ n ne he kaalɔ?”

²⁶ O chaŋe ŋɔ, “N naa kooro, maa ɛ boobi nomanta, n ŋɔ n bonɔɔ Siba be ŋɔ ó kpɔ kon ba dawɛ n keeɡo ta, ásɛ n so o ta n ne he kaa, kɛ o ta waa maa bola la ta teŋɛ.

²⁷ O teŋe nyosone dawɛ n nɛɛ tɛ hen n dɔɔ kooro. N dɔɔ, he do kɛŋɔ Korowii torome ken anomanta, ɛ wobɛlbwa aa too he tea.

²⁸ N nabaa naanar bwa chɛ kɛ n naa kooro kpoo ba, kɛ he tɛ mɛ ŋwɛnɛ n ne he pɛ nɔn di kwa. N ta ŋwɛnɛ dɔe kɛ ń berɛ soŋe waane le hen n naa kooro be kpa.”

²⁹ Belaa Kooro chaŋe ŋɔ, “A ta chɛ kɛ he bol waane kpa. He ne Siba la ka bɔne Kooro Sɔɔl kondɔɔh.”

³⁰ Anee Mɛfebɔsɛt ŋɔ kooro be ŋɔ, “N naa kooro aa dɛ ba dem deŋnesɔɔhna ta nomanta, ɡel Siba kpɔ o komɛlbwa.”

³¹ Belaa Baasilai le Roɡelim Gelead harɛ ba, dɛ ba kpɔ kooro ɛɡɛ Jɔɔdan Moo la le, asɛ o kaa.

³² Dɛ Baasilai hwɛɛhrɔ kɛrɛdɛ, dɛ o dɔ bene fifraanuatoro. O dɔ suuɡa taeh, ɡɛ saŋ kooro fa aa soɡe Mahanaim la, dɛ onee dɛɛ tɛo kondikwa.

³³ Belaa kooro ŋɔ o be ŋɔ, “Ir ja n nɛɛ yá kaa Jerusalam he ka puu mɛ so, ásɛ mɛɛ nyiŋi he nɛ.”

³⁴ Ate, o chaŋe kooro ŋɔ, “Bene aŋwɛnɛɛ ka mɛ jaɔ? N naa kooro, a ta chɛ kɛ n ne he kaa Jerusalam ka so.

³⁵ Taraken n di bene fifraanuatoro, n sie aa komɛlbwa ta lɛ kpa. Komɛlbwa aa somɛ n nyoa ta, ba dɛ ɡo yela ɡe aa, maa no. N naa kooro, n dɛ la ka dawɛ he nɛɛ pɛɛpɛɛ.

³⁶ Men maa ɛ he bonɔɔ ta ɡɛ waa nɔ chɛɛ. Mɛɛ teŋɛ he nɛɛ ka ɡale Jɔɔdan Moo tama. Bɔkwa waa n ɛ tɛɛ hɛɛ tɛ mɛ a kembɔr ɔ?

³⁷ Gel he bonɔɔ berɛ ba kaa dem dɛ́ ka sewɛ bɛne n lolanar huɡribɔr. N bibaa Kimham ɡee nɔ, kpɔɔ kaa ó kaa tomɛ. N naa kooro, ɛ ɡɛ bɛlbwa aa too he tea tɛo.”

³⁸ Asɛ kooro ŋɔ, “N ne Kimham ɛɛ kaaloo ka ɛɡɛ moo le kaa, ásɛ n ɛ wobɛlbwa haa dɛ nyin tɛo. He bɔɔ mɛ komɛlbwa ɡe aa, mɛɛ ɛo tɛɛ.”

³⁹ Anomanta, nɛra la bwa ɛɡɛ Jɔɔdan Moo la le asɛ Kooro Devid ɡe teŋɛ. Asɛ kooro kal Baasilai dɛ ɡbaaro pɛl o te, dɛ swee andɛɛɡa tɛo, asɛ Baasilai berɛ kaa dem.

⁴⁰ Kooro aa kaa ɛɡɛ Jɔɔdan Moo le dɛ kaa Gelɡal la, dɛ Kimham ja o nɛ. Dɛ Juda laa tena bwa ne Israel laa tena pera bwa teŋɛ o nɛ dɛ kpɔɔ ɡale.

⁴¹ Belaa Israel tena la bwa ba kooro be dɛ ba ŋɔ, “N naa kooro, ɛrɛɛ Juda tena baa ɛ ya lolanar ŋwɛ kooro ne o dem tena, dɛ o laa tena bwa, dɛ kpɔ ba ɛɡɛ Jɔɔdan Moo la kaa nɔɔ?”

⁴² Belaa Juda laa tena la bwa chaŋe Israel laa tena la ŋɔ, “Ya ne kooro bwa ɛ nɛmbeŋkpoŋ waa ya ɛ ɡɛ la. Ɛrɛɛ chɛ kɛŋɔ he baah diɔ? Ya kpɔ kooro kwaane di kɛɛ? Ya kpɔ o komɛl ɡe kɛɛ?”

⁴³ Asɛ Israel laa tena la chaŋ ba ŋɔ, “Ya dɔ kooro baŋne fi bwa. A habɔɔ ya ne o pɛo ɡwaa kɛ he ne waa doa. Ɛrɛ waa hɛɛ nyiŋi ya nyubaahna nɔɔ? Ya laa tɔ sie bol kooro ka kpɔe dɛ́ ba wa aa?” Kɛ Juda laa tena la chaŋɔ bandia kohona ne, dɛ ɡwaa Israel baala la kwara.