2 Samoɛl 18 - mzwDBL

Absalɔm seo wa

¹ Kooro Devid boa laa tena baa ja o nɛɛ la nyoa, dɛ bɔne ba bini kaɡboŋa ne lafare, dɛ le nomonome ba chɔ ba nyoo.

² O bɔne laa tena la bini kuore atoro dɛ tom ba. Joab chɔ bɔrbeŋkpoŋ nyoa, asɛ Seruya bibaa Abisae waa ɛ Joab nime la chɔ nɛɛte nyoa, asɛ Itai waa ɛ Gat te la ɡe chɔ toorote nyoa. O ŋɔ o laa tena la be ŋɔ, “N ne heyaa dɛɛ ba kaala.”

³ Anee ba chaŋo ŋɔ, “N naa, a ta chɛ kɛ he ja ya nɛɛ kaa ɡɛ. A kaa ba kɛ ya dɔma sii ya nɛɛ yaa chwa aa, a ta waane ɛɛ. Ya pera kwaraa serewɔ aa, aa ban waanee ɛ. He ɡwaa yaa nɛra kaɡboŋa fi, a wer kɛŋɔ he te so bwɛjen nɔ bini, ásɛ ya hiah chae bɛl aa, he ba cha yaa.”

⁴ Anee kooro chaŋ ba ŋɔ, “Mɛɛ ɛ anɔ la aa too he tea laanee.” Anomanta, kooro kaa che bwɛɛ la doonyoa la jwɛh, asɛ laa tena la ɛ ɡɛ baa bɔne ba bini lafare ne kaɡboŋa la.

⁵ Kooro berɔ ŋɔ Joab ne Abisae dɛ Itai be ŋɔ, “Hé koh n waa dɛ́ nyiŋi Absalɔm kɛrɛdɛ.” Asɛ laa tena la bwa no kooro waa waa kpɔa tɛ nomonome la.

⁶ Kooro Devid laa tena la kaa kpɔɡ bini dɛ ka yo Israel tena, kɔr bɛl bini, Efrem dea harɛ ta.

⁷ Kooro laa tena la yoo, dɛ pɔ Israel tena la nɛ. Nɛra baa serewa awola tɔpere warɔ taeh. Baala kaɡboŋa fifraanɛɛ serewa.

⁸ Laa la yɛɛrɔ kaa bwɛɛ la dahare bwa, asɛ nɛra serewe kɔr la bini dɛ ɡwaa banɔ la baa sewɛ laa la ta.

⁹ Absalɔm soɡe keeɡo bie ta dɛ den cheme kooro laa tena la, dɛ keeɡo la dɛ jo dajen bɛl lɔɡa, asɛ Absalɔm nyu ka karɛ daa la kpala ta. O saɡɛ daa la ta, asɛ keeɡo la na tɛr do dɛɛ kaa.

¹⁰ Kooro Devid laa tena la bɛl nao dɛ ŋɔ Joab be ŋɔ, “Nomoa, n na Absalɔm o saɡɛ dajen bɛl ta.”

¹¹ Belaa Joab chaŋe ŋɔ, “Haa nao ɡɛ la, ɛrɛɛ he ta on kpoe buɡ ta nɔ? N ɡbabir fe ɛɛ tɛɛ suuɡapoŋa fi ne banyoo kiriso waa dɛ yo o ne laalee.”

¹² Anee baa la ɡe chaŋɔ ŋɔ, “He tɛ mɛ suuɡapoŋa kaɡboŋ kwaraa naa, maa nɔnee kpɔ leɡe n dɔɔ kooro bibaa. Ya bwa no kooro waa waa bol he ne Abisae dɛ Itai be ŋɔ, ‘He koh n wa dɛ́ nyiŋi Absalɔm kɛrɛdɛ.’

¹³ Dɛ n vɛh kooro waa la dɛ fee kpo Absalɔm aa, o fe no a wa, wobɛlbwa toole waa wola no. He fe aa n habɔɔ cheɡa ba, ásɛ n fee di a bolchɔɡe.”

¹⁴ Ate, Joab ŋɔ, “Maa ŋɔ n dɛ che dɛ biɡri kpa.” Anomanta, o kpɔ lampeare atoro dɛ yaɡɛ Absalɔm bambile ta, o siwi ta aa lole o saɡɛ dajen la ta la.

¹⁵ Asɛ Joab laa tena la fi den ba lɔ tɔ Absalɔm nɛ dɛ kpoo.

¹⁶ Belaa Joab hoh bɛla, asɛ Kooro Devid laa tena la ɡel Israel tena nɛɛ teŋa dɛ yoo ba.

¹⁷ Ba kpɔ Absalɔm chɔɔ la ta bɔluŋ bɛl bini kɔr la bini, dɛ pa bwea dawɛ o nɛ a daŋɛ kohona. Asɛ Israel tena la bwa chwa kaa ba deremi.

¹⁸ Absalɔm fa aa soɡe le la, o ma komɛl dɛ kpɔ tɛ o te ba kpɔ dɛɛ liiru bobɛl baa dɛ yerɔ Kooro Fɛlembɔjen ta. O liiro ŋɔ, “N ta bibaa lolɛ á che o nɛɛ ń dɔ sɔn.” O kpɔ kon la sɔn pa o te, anomanta, ba le fini ba dɛ yerɛ kon la Absalɔm Kon Baa Kpɔ Dɛɛ Liiru.

Kooro Devid wi o bie Absalɔm

¹⁹ Belaa sɔfo Sadɔk bibaa Ahimas ŋɔ Joab be ŋɔ, “Gel n chwa la ka ŋɔ kooro be ŋɔ Korowii lɛo le o dɔma nɔn ta.”

²⁰ Belaa Joab ŋɔ o be ŋɔ, “Akai, he laa dɛ́ la kala nɔ ne fini. Gel tɔpebɛl wee mɔɔ, fini te laa, dɛkalkɛ kooro bibaa sewɔ.”

²¹ Belaa Joab ŋɔ o bonɔɔ bɛl waa le Itiopia harɛ be ŋɔ, “La dɛ́ ka baɡle waa haa naa kooro be.” Ate, o ɡuŋi Joab dɛ chwa kaa.

²² Anee sɔfo Sadɔk bibaa Ahimas ŋɔ Joab be ŋɔ, “Gɛ bɛlbwa aa do, ɡel n chwa teŋɛ he bonɔɔ nɔ nɛ.” Kɛ Joab chaŋo ŋɔ, “N bie, bɔkwa waa he siwi beɡre kɛ he la bɛl nɔɔ? Komɛlbwa toole he dɔ le a ta.”

²³ Ahimas berɛ ŋɔ, “Gɛ aa doa bwa, mɛɛ chwao teŋɛ.” Anomanta, Joab ŋɔ o be ŋɔ, “Kpɔ chwae kaa!” Belaa Ahimas chwa kpɔ deŋɡarere dor harɛ waa chɔa kaa Jɔɔdan Moo pera la ta, dɛ tɔ Itiopia bonɔɔ la sie.

²⁴ Dɛ Kooro Devid ta soɡe bwɛjen la bini doonyoa ne baŋ kon la baah ta, nɛn waa dɛ daah bela la teehnɔ kaa danjwɛɛ la kaa ka che o doa, dɛ ka pɛl o doonyoa. Waa dɛ nyiŋi la o na baa bɛl waa dɛ chwa.

²⁵ Belaa o yerɛ kooro dɛ ŋɔ o be. Asɛ kooro ŋɔ, “Dɛ o ɡboo tenaa, o ken dɛ ba amanesoma ne.” Dɛ balaa baa la ɡe na dɛɛ ba.

²⁶ Nɛn waa dɛ daah bela la berɔ na baa bɛl ɡe o ɡbo aa dɛ chwa, asɛ o yerɛ nɛn waa dɛ daah doonyoa la ŋɔ, “Nyiŋi na, baa bɛl ɡe ɡbo chwao dɛɛ ba.” Anee kooro ŋɔ, “Amanesoma nee o ken ɛɛ ba.”

²⁷ Belaa nɛn waa dɛ daah bela la ŋɔ, “N dɛ na kɛŋɔ baa waa tɔ sie la dɛ le sɔfo Sadɔk bibaa Ahimas.” Asɛ kooro ŋɔ, “O ɛ nɛndɛɛɡe. Amanesoma nee wɛɛ ba.”

²⁸ Ate, Ahimas kpɔ silɛɛ yerɛ kooro ŋɔ, “Wobɛlbwa maɡrɔ.” O ɡuŋi kooro sie dɛ kpɔ duure tɛo dɛ ŋɔ, “Korowii haa dɛ tomɔ laanee dɔ jam! O ɡelɔ he pɔ nɛra baa ɛɛ dɔm la nɛ!”

²⁹ Belaa kooro bɔɔ bonɔɔ la ŋɔ, “Absalɔm le a nyoa aa?” Anee Ahimas chaŋe ŋɔ, “N naa, Joab aa dɛ ba men toma la, n na wesaɡasaɡare ane, kɛ men he bonɔɔ aa a ɡɛ waa la bɛlbwa bini jemɛ.”

³⁰ Ate, kooro ŋɔ, “Kaa ka che baŋ bɛl dɛɛ kpa.” Anomanta, o kaa che baŋ bɛl dɛɛ kpa.

³¹ Belaa Itiopia bonɔɔ la ba dɛ ŋɔ, “N naa kooro, dɛɛ no amanesoma nɔ! Korowii lɛɛ le he dɔma baa cheɡɛ he nɛɛ nɔn ta fini.”

³² Anee Kooro bɔɔro ŋɔ, “N bibaa Absalɔm dɔ o nyu tenaa?” Asɛ Itiopia te la chaŋe ŋɔ, “N naa, n dɛ nyin kɛŋɔ anɔ la aa puu la, ɡe pu he dɔma bwa.”

³³ Ate, dɛ kooro soɡo dɛɛ chel. O cheɡɛ doonyoa la nyundua dɛ kaa dea dɛ ka wi. Waa dɛ kaa la, dɛ o dɛ wi ŋɔ, “N bidɛɛɡe, Absalɔm, menee fe sewa sɛ?”