2 Samoɛl 17 - mzwDBL

Husai neɡre Absalɔm

¹ A ta biɡre Ahetofɛl berɛ ŋɔ Absalɔm be ŋɔ, “Mɛɛ kpɔ laa tena la kaɡboŋa fi dɛ banɛɛ le jwaana nɔ ne, dɛ́ ti Kooro Devid.

² Mɛɛ lao ka lɔ tɔ o nɛ ɡɛ saŋ waa koah dɛ ɡwɛɡre. A ba ɡɛ naa, ɔmee ɛɛ chole o nɛɛ, ásɛ o nɛra baa ja o nɛɛ la bwa chwa kaa. Mɛɛ kpo Kooro Devid ɡboo,

³ dɛ́ berɛ lawɛ nɛra la bwa ba tɛɛ. Naate haa dɛ nyinu la sewaa, anee dɛ́ baɡle kɛ nɛra la bwa berɔ ba he be, wobɛlbwa toole dɛ́ ba ba nɛ.”

⁴ Absalɔm ne Israel nomonome la bwa lii a ɡɛ waa nɔ kɛŋɔ a ɛ wedɛɛɡa.

⁵ Anee Absalɔm ŋɔ, “Yerɛ Husai Aaki te la, ásɛ ya no waa waa dɔa dɛ bol.”

⁶ Husai aa bala la, Absalɔm ŋɔ, “Waa Ahetofɛl aa baɡle yaa laanee nɔ. Yá teŋɛ a ta naa? Dɛ ɡɛ laa aa, ɛrɛɛ he liire ɔ?”

⁷ Anee Husai chaŋo ŋɔ, “Waa Ahetofɛl aa baɡla la aa were tɛ yaa taraken.

⁸ He ɡbabir jemɛ ɡɛ he mɛɛ ne o laa tena aa kpeɡa dɛ won yoi. Ba kpeɡri dɛ do ɔma kɛŋɔ sisire hansɔɔh baa pa o bii kaa ken. He mɛɛ jemɛ yoi waa kɛrɛdɛ, waa sɛh so o ne o laa tena so jwaana beŋkpoŋ ɡba.

⁹ Maa dɛ ŋɔ nɔ, o ka sɔh bwebɔɔ bɛl bini kɛɛ bobɛl kwara. O tɔ sie kpɔ o laa tena ba yoi asɛ nomɛlbwa no a wa aa, wɛɛ ŋɔɔ o pɔ he nɛ.

¹⁰ Hale banyoola baa do ɔma kɛŋɔ nyujente ɡba la dɛ ɔmɔ, dɛkalkɛ nomɛlbwa waa lɔ Israel harɛ ta jemɔ kɛ he mɛɛ ɛ banyoo tenten, o laa tena ɡe do kpeɡri.

¹¹ Anomanta, waa maa dɛ bol laanee kɛŋɔ, he boa Israel tena nyoa le Dan dea waa lɔ weekaŋle nyundua pera, dɛ́ ba kaa Beɛseeba waa lɔ weekaŋle harɛbɔr baa wara kɛŋɔ mpo nyoa hɛŋle dɛ do harɛ la bobɛlbwa, ásɛ he ɡbaɡba tɔ ba sie la ba ne laa.

¹² Ásɛ bobɛlbwa Kooro Devid aa lole la, yaa ɡaaɡe o bɔree dɛ́ nao, o ne jara dɛ ya kaa yoo. O ne o laa tena la bini bɛlbwa toole dɛ́ ka.

¹³ Dɛ o berɔ ba jo bwɛjen la bini naa, Israel tena bwa ɛɛ kpɔ ŋwɛɛraa ba tɛɡre danjwɛkpeɡ la ó kuuɡi chɔ fɛlembɔjen la bini, ka tel kɛŋɔ nɛn aa wola bwe beŋkpoŋ kwaraa na bela kpa.”

¹⁴ Belaa Absalɔm ne Israel tena la bwa ŋɔ, “Husai waa ɛ Aaki te waa waa dɛ baɡle la ɡwaa anɔ la Ahetofɛl aa bola la.” Korowii ɡbabirii ɛa kɛŋɔ wedɛɛɡa Ahetofɛl aa bola la, ba bɛ a ta teŋɛ, ásɛ a ba wenaale ne ba ta Absalɔm nɛ.

¹⁵ Anee Husai ŋɔ Sadɔk ne Abiata baa ɛ sɔfore la be ŋɔ, “Ahetofɛl baɡle Absalɔm ne Israel nomonome ŋɔ bá ɛ ken ne ken, kɛ n ja ba ŋɔ ba bɛ anɔ ɛ.”

¹⁶ Husai berɔ ŋɔ, “Tomɛ nɛra Kooro Devid be warane ŋɔ, ‘Dɛɛ berɛ leebɔɔ ŋwɛnɛ waa chɔa kaa pua hɛŋle ɡbo harɛ ta bela chɔe jwaana, hé ɛɡɛ Jɔɔdan Moo la le warane, ɡɛ aa ɛ ásɛ ba bɛ kooro ne o laa tena bwa lawɛ dɛ́ kpoo ba.’ ”

¹⁷ Dɛ sɔfo Abiata bibaa Jonatan ne sɔfo Sadɔk bibaa Ahimas lɔ Jerusalam dahare, bule waa chɔ bobɛl baa dɛ yerɔ Ɛn Roɡel ta, dɛkalkɛ dɛ baa nyin kɛ nomɛl na ba báa jo bwɛjen la bini. Dɛ bitolo bɛlee lɔ bela dɛ yon la ba be dɛ kaa bol waa aa dɛ chiɡ, ásɛ ba ɡe berɛ ka bol kooro be.

¹⁸ Kɛ awola bɛl, bonɔɔ bɛl na ba asɛ dɛ ŋɔ Absalɔm be, anomanta, ba nɛra banɛ la ɛ warane chwa ka sɔh baa bɛl waa lɔ Bahurim dem. O dɔ kɔlɔŋ bɛl o dembaah, asɛ ba ka jo o bini.

¹⁹ Baa la haah paɡri kon bɔle kɔlɔŋ la nyoa, dɛ kpɔ boyu yaa o ta, nomɛlbwa ta jemɛ kɛ ba lɔ o bini.

²⁰ Absalɔm nɛra la ba dem bela dɛ ba bɔɔ haah la ŋɔ, “Leperaa Ahimas ne Jonatan dɔɔ?” O chaŋe ŋɔ, “Ba ɛɡɛ nenabɔɔ la le kaa.” Baala la nyin ba bɔr, ba ta ban nae, dɛ berɛ kaa Jerusalam.

²¹ Baala la aa kaala habɔɔ la, Ahimas ne Jonatan le kɔlɔŋ la bini, dɛ kpɔ ba te ka baɡle Kooro Devid. Ba ŋɔ o be ŋɔ, “Kpɔ he te, dɛ́ ɛ warane ka ɛɡɛ nee la le, dɛ́ chwa kaa. Ahetofɛl dɛ vɔrɔwe he vɔrɔwa.”

²² Anomanta, Kooro Devid ne o nɛra baa ja o nɛɛ la bwa kpɔ ba te, dɛ ka ɛɡɛ Jɔɔdan Moo la kaa o baŋ. Tɔɔ ne pera dɛ ba bwa ɡalɔ kaa.

²³ Ahetofɛl aa naa kɛŋɔ ba ta o waa la ta teŋɛ la, o pa laala dawɛ o keeɡo ta dɛ kpɔ sie pa o bwɛɛ dɛ kaa. O baa kwaa o dem wobɛlbwa tonɛ dɛ ka saɡɛ o te. Waa sewa la, o mɛɛwa huɡri bɔree ba ka huɡo.

²⁴ Kooro Devid la bwɛɛ bɛl baa dɛ yerɔ Mahanaim asɛ Absalɔm ne Israel laa tena la bwa ɛɡɛ Jɔɔdan Moo la.

²⁵ Dɛ Absalɔm le Amasa o chiɡ Joab naa ta dɛ chɔ laa tena la nyoa. Amasa mɛɛ sɔne Jɛta, o le Israel harɛ ta. O nya sɔne Abiɡel. Abiɡel ɡe nya sɔne Nahas asɛ o nahaah ɛ Joab nya baa dɛ yerɔ Seruya la.

²⁶ Israel tena la ne Absalɔm baŋre ba tɛnte deene Gelead harɛ ta.

²⁷ Kooro Devid aa tel Mahanaim la, Nahas bibaa Sobi waa le bwɛjen Raba waa lɔ Amɔn harɛ laanee baa chemo, dɛ Ameɛl bibaa Makir waa le Lo Debar, ne Baasilai waa le Roɡelim dɛ do Gelead harɛ ta,

²⁸ ba kpɔ laala baa dɛ chɔ a ta ne loɡa, dɛ kwaa baa maa ba tɛo. Ba kpɔ mea ne mendɛɛɡa aa kpera kɛrɛdɛ ne boyuhala ne chebe,

²⁹ ne tohno ne peera dɛ waɡasi ba tɛ kooro ne o nɛra ba di. Ba liiro ŋɔ lɔr ne nyɔɡre ɛɛ kpo Kooro Devid ne o nɛra laanee, ásɛ ba koh pua hɛŋle ɡbo harɛ ta bela.