2 Samoɛl 16 - mzwDBL

Kooro Devid ne Siba

¹ Kooro Devid aa kaa sie tama bwe la doa la, Mɛfebɔsɛt bonɔɔ Siba den le bela ba chemo. Dɛ o dɔ keeɡore ane, dɛ kpɔ paanoo lafraanɛ ne ɡrepo daa nɔna aa hola nɔndela lafa, ne fiɡ daa nɔna aa hola nɔndela lafa, dɛ sen oltɔn pur del.

² Asɛ Kooro Devid bɔɔ Siba ŋɔ, “Bɔkwaa hɛɛ la ka ɛ anɔ bwa ne nɔ?” Ate, o chaŋe ŋɔ, “N naa kooro, keeɡore nɔ ɛ hen n naa kooro ne he haahna, ne bii bwa kwa, ásɛ baa so a ta. Paanoo la ne daa nɔna nɔ ɡe ɛ kwaa baala nɔ aa di, asɛ sen la ɡe, banɔ la baa ka ɡwɛɡre pua hɛŋle ɡbo harɛ ta la nyɔ dɛ́ do kpeɡri.”

³ Belaa kooro bɔɔ ŋɔ, “Leperaa he nomoa naa Mɛfebɔsɛt la dɔɔ?” Anee Siba chaŋo ŋɔ, “O soɡe Jerusalam dɛkalkɛ o liiro ŋɔ, ‘Fini Israel tena ɛɛ berɔ kpɔ mɛ cheɡ n nabaa Kooro Sɔɔl naa ta, ń di kora.’ ”

⁴ Ate, kooro ŋɔ Siba be ŋɔ, “N dɛ ŋɔ he be kɛŋɔ komɛlbwa aa ɛ Mɛfebɔsɛt kwaa la ɛ he kwaa taraken.” Asɛ Siba ŋɔ, “N dɛ duuri, N naa kooro, ɡel he sie lɛ men maa ɛ he bonɔɔ nɛ.”

Simei taah Kooro Devid

⁵ Kooro Devid aa baa tel bwɛɛ Bahurim la, Gɛra bibaa Simei waa le dea Kooro Sɔɔl aa le o ta balɔ ba chemo. Waa lea dɛɛ ba dɛ o dɛ taahno.

⁶ Dɛ a lole kɛŋɔ Kooro laa tena ne nɛra baa dɛ daahno bwa baro cheme te, kɛ dɛ Simei dɛ foɡre o ne o nomonome bwa bwea,

⁷ Simei taahno dɛ ŋɔ, “Le bonɔ kaa! Le bonɔ kaa! Nɛŋkpoa nɛn bɛl le! Wechɔɡ-ɛɛ kohona!

⁸ Korowiirii bɔe kem Kooro Sɔɔl dem nɛra haa kpoora dɛ ba so o buɡ ta la. Korowii kpɔ he kora la tɛ he bibaa Absalɔm. He kora chɔɡɔ, nyubinikpeɡ haa ɛa kohona dɛ kpoo nɛra la wa.”

⁹ Belaa Abisae baa dɛ yerɛ o nya Seruya la ŋɔ kooro be ŋɔ, “N naa, ɛrɛɛ he ɡel nɛn waa wola toole wobɛlbwa bini kɛ nyoate lale ɡe ɛɛ taahne ken? Gel n la ka teŋe o nyu le bela!”

¹⁰ Ate, kooro ŋɔ, “Abisae ne Joab, bɔkwa waa n ne he dɔ ɛɛ yɔ? Dɛ Korowiirii ŋɔa Abisae taah men Devid aa, umee dɛ́ won bɔɔ ŋɔ ɛrɛ waa wɛɛ ɛ ken ɔ?”

¹¹ Belaa Kooro Devid ŋɔ Abisae ne o nomonome la bwa be ŋɔ, “N bilole ɡbabir dɛ nyin mɛ dɛ́ kpo, ɛrɛɛ he ɡel Bɛnjamen dea nɛn nɔ wa ɛɛ ɛɛ nyokpoa ɔ? Hé ɡelo wɛɛ taah, Korowiirii tɛo ŋwɛnɛ.

¹² Korowii ken ɛɛ na n suna maa dɛ di nɔɔ, dɛ́ kpɔ wedɛɛɡa ba chiɡ taahna aa dɛ ba n nɛɛ fini nɔ naa ta.”

¹³ Kooro Devid ne o nɛra kpɔ ŋwɛnɛ la ta dɛɛ kaa, asɛ Simei ɡe kpɔ deŋɡare la ta ba baŋ bɛl dɛɛ taah, dɛɛ foɡ ba bwea, dɛ ɡo tee dɛɛ ta ba nɛ.

¹⁴ Kooro ne nɛra baa ja o nɛɛ la bwa koɔh ken ɡɛ saŋ baa kaa tel Jɔɔdan Moo ta, asɛ dɛ onɛ.

Absalɔm la Jerusalam

¹⁵ Absalɔm ne Israel tena bwa ba Jerusalam, dɛ Ahetofɛl ja ba bini.

¹⁶ Belaa Husai waa ɛ Aaki te, Kooro Devid dam la, la Absalɔm be dɛ ka ŋɔ, “Korowii tɛ kooro mkpajaŋ! Korowii tɛ kooro mkpajaŋ!”

¹⁷ Anee Absalɔm bɔɔ Husai ŋɔ, “He nyina haa dɛ chaɡle he dam Kooro Devid nɛɛ nɔ naa? Ɛrɛɛ he ne waa wola kaalɛ ɔ?”

¹⁸ Ate, Husai ɡe ŋɔ o be ŋɔ, “Akai, nɛn Korowii ne Israel tena nɔ bwa aa leo la, o nɛɛ mɛɛ ba teŋa n ne ó do le.

¹⁹ Dɛ Absalɔm laa ń tomaa, umee ń tomɛ jaɔ? Gɛ maa tomɛ he mɛɛ la, ɡɛɛ mɛɛ ba he ɡe toma.”

²⁰ Ate, Absalɔm ŋɔ Ahetofɛl be ŋɔ, “Yaa lɔ bonɔ nɔ, baɡle yaa ɡɛ yaa ɛ.”

²¹ Anee Ahetofɛl chaŋe ŋɔ, “La ka lawɛ he mɛɛ sɛnanar waa ɡel ba habɔɔ baa daah koodem la he ne ba chɔ. Anee dɛ́ ɡel Israel tena bwa no kɛŋɔ he ɛ he mɛɛ dɔm kɛrɛdɛ, dɛ́ ɡel nɛra baa ja he nɛɛ la bwara do kpeɡri name.”

²² Anomanta, ba baŋre tɛnte dea koodem bela saldoa tɛ Absalɔm, asɛ o lawɛ o mɛɛ sɛnanar la chɔ Israel tena la bwa siwi ta.

²³ Saŋ la, dɛ Ahetofɛl bol wobɛlbwa naa, Kooro Devid ne Absalɔm dɛ yaradao kɛŋɔ a ɛ waa waa bɔɔra le Korowii be.