2 Samoɛl 15 - mzwDBL

Absalɔm vɔrɔwe Kooro Devid vɔrɔwa

¹ A habɔɔ la, Absalɔm nyin torɔɡo baa vɔwa dɛɛ pɛl jaɡre la bɛl ne jaɡre, dɛ baala fifraanue baa tɔ o sie.

² Absalɔm yon fel ir chɔmbibi, dɛ́ ka che ŋwɛnɛ waa chɔa kaa bwɛjen la doonyoa la keŋkeŋ. Dɛ nomɛl ba waa ne dɛɛ nyin kooro nyiŋi a ta tɛo waa, o yon yerɛ naate dɛ́ bɔɔro bela waa lea. Dɛ naate chaŋo ŋɔ o le Israel deene la bɛl bini naa,

³ o yon ŋɔ naate be ŋɔ, “He waa la wer dɛ toɡre, kɛ kooro nachiɡnɛn bɛlbwa toole dɛ́ no he waa nɔ.”

⁴ Dɛ berɛ ŋɔ, “N dɛ nyin kɛ n fe aa ɛ nɛn maa bol waa dɛɛ pa bole Israel harɛ nɔ ta, ásɛ nomɛlbwa ne o dɔŋ dɔ wa aa, ń bol dɛ́ fee pa bole ɡɛ aa chɛa tɛo.”

⁵ Dɛ nomɛlbwa ba Absalɔm sie dɛ ba ɡuŋu waa, ó yon ha nɔn lawɛ naate dɛ́ ɡbaaro pɛl o te.

⁶ Dɛ ɡɛɛ wɛɛ ɛ Israel tena bwa ba yon kpɔ ba waa ba kooro be ŋɔ ó nyiŋi a ta tɛɛ ba la, asɛ ba bwa berɛ dɛɛ nyin o wa.

⁷ Bene anaarɛ habɔɔ la, Absalɔm ŋɔ Kooro Devid be ŋɔ, “Tɛ mɛ ŋwɛnɛ ń la Bwɛjen Hɛbrɔn, dɛ́ ka chuɡri n nyobaɡa maa baɡɛ Korowii.

⁸ Gɛ saŋ he bonɔɔ fa aa lɔ Gesur Siiria harɛ ta la, n baɡɛ nyoa ŋɔ, ‘Dɛ Korowii wono berɛ kpɔ mɛ ba Jerusalam aa, mɛɛ tomɔɔ Hɛbrɔn.’ ”

⁹ Belaa kooro ŋɔ o be ŋɔ, “Kaa deŋnesɔɔhna ne.” Asɛ o kaa Hɛbrɔn.

¹⁰ Absalɔm sɔɔh tomɛ toroma Israel tena deene la be ba ka ŋɔ, “Dɛ he baa no bɛle sii yaa, he ŋɔ, ‘Absalɔm di kora Hɛbrɔn.’ ”

¹¹ Dɛ Absalɔm ta nɔn yerɛ baala lafraanɛ le Jerusalam ba ja o nɛɛ kaa, dɛ baa waa la wobɛlbwa jemɛ dɛ ɡe teŋɛ o nɛɛ kaa ɡɛ.

¹² Absalɔm aa kpoo kwaa dɛɛ ɛ saraha la, o ɡe tomɔ ŋɔ bá ka yerɛ Ahetofɛl waa ɛ Gilo te la ó le o bwɛɛ Gilo ba. Dɛ o ɛ nɛn waa dɛ ja Kooro Devid la bini bɛl. Dɛ Kooro vɔrɔwa Absalɔm aa dɛ vɔrɔwe la waa wer kɛrɛdɛ, asɛ nɛra warɛ dɛɛ teŋɛ o nɛ.

Kooro Devid chwao le Jerusalam

¹³ Awola bɛl, torome bɛl baa ŋɔ Kooro Devid be ŋɔ, “Israel tena bwa bambile lawɛ Absalɔm waa dɛɛ teŋɛ o nɛ.”

¹⁴ Belaa Kooro Devid ŋɔ o nomonome baa ja o nɛɛ Jerusalam la be ŋɔ, “Hé dɛ nyin ya chwa le Absalɔm be tenaa, hé ɡel ya le warane! Dɛ ɡɛ laa aa, waa biɡri ba bonɔ ba yo yaa, dɛ́ kpoo nɛra yaa lɔ bwɛjen nɔ bini bwa.”

¹⁵ Anee nomonome la chaŋe ŋɔ, “N naa kooro, wobɛlbwa haa ŋɔa la, he bonɔɔna ɛɛ ɛo.”

¹⁶ Anomanta, kooro leɔ, asɛ o dem nɛra bwa ne nomonome la teŋɛ o nɛ. Kɛ o ɡel o sɛnanar fi la te, baa nyiŋi koodem bela.

¹⁷ Kooro ne o nɛra la bwa aa lea dɛ tel sie tama la, ba kaa che.

¹⁸ O nɛra la bwa baa ɡarɔ ta kaa sie, bane Kɛrɛt tena ne Pɛlet tena baa dɛ daahno dɛ Giti tena baa le Gat, dɛ nɛra lafraanumɛl baa teŋɛ o nɛɛ la bwa tɔ o sie baa kaa.

¹⁹ Belaa Kooro Devid bɔɔ Itai, Giti te waa le Gat la ŋɔ, “Ɛrɛɛ he teŋɛ ya nɛɔ? Berɛ ka so Kooro Absalɔm be. He ɛ hɔɔh haa le harɛfale ta dɛ ba so bonɔ.

²⁰ Dɛ tɔpere nɔ ɡbosoroo he den ba. Maa wola jemɛ bela maa dɛ kaa nɔ, ɛrɛɛ mɛɛ ba wona ɡel he teŋɛ ya nɛɛ dɛɛ ɡaaɡe ɔ? Berɛ kaa ka tɔ he nɛra sie. Kórowii sune he nɛ, dɛ́ chae.”

²¹ Anee Itai chaŋe kooro ŋɔ, “N ŋwɛɛ Korowii waa lole saŋ bɛlbwa ne n dɔɔ kooro o ta aa soɡe le kɛŋɔ, bobɛlbwa n dɔɔ kooro aa kaa, dɛ sewee kɛɛ mkpaa yoo, belaa men maa ɛ o bonɔɔ ɡe ɛɛ ba doe.”

²² Kooro Devid ŋɔ o be ŋɔ, “A wer, he te pa sie dɛɛ la.” Anomanta, Itai Giti te waa le Gat la ne baala la, dɛ o lolanar baa ja o nɛɛ bwa pa sie kaa.

²³ Nɛra la bwa aa teŋa baa kaa ɡɛ la, bwɛɛ la tena bwa wio kɛrɛdɛ. Kooro ɡe ɛɡɛ Kedrɔn Fɛlembɔjen la le, asɛ o nɛra la bwa kpɔ sie pa pua hɛŋle ɡbo harɛ ta dɛ kaa.

²⁴ Dɛ sɔfo Sadɔk lɔ bela, asɛ Lewi dea tena bwa baa ja o nɛɛ la che Korowii Ne Nɛwɛnyina Fɔo Daka la. Ba kpɔɔ cheɡ harɛ, asɛ sɔfo Abiata kpoo kwaa ɛ saraha ka tel kɛŋɔ Kooro Devid ne o nɛra la bwa aa le bwɛjen la ta.

²⁵ Belaa Kooro Devid ŋɔ sɔfo Sadɔk be ŋɔ, “Berɛ kpɔ Korowii Ne Nɛwɛnyina Fɔo Daka la kaa bwɛjen la ta. Dɛ Korowii sie lɛ n nɛ aa, wɛɛ berɔɔ kpɔ mɛ ba, dɛ́ ɡel n nao ne bela waa cheɡa bwa.

²⁶ Kɛ o sie ta n nɛɛ lɛɛ yaa, ó ɛ ɡɛ bwa aa too o tea.”

²⁷ Kooro Devid berɔ ŋɔ sɔfo Sadɔk be ŋɔ, “He dɛ no waa mun. Lawɛ he bibaa Ahimas ne Abiata bibaa Jonatan, ásɛ he berɛ kaa bwɛjen la ta deŋnesɔɔhna ta.

²⁸ Mɛɛ dɛɛ kpa leebɔɔ baa cheɡɛ o ta le dɛɛ kaa pua hɛŋle ɡbo harɛ ta belaa, ka tel kɛŋɔ maa no waane le he be.”

²⁹ Anomanta, Sadɔk ne Abiata baa ɛ sɔfore berɔ kpɔ Korowii Ne Nɛwɛnyina Fɔo Daka la kaa Jerusalam dɛ ka so bela.

³⁰ Kooro Devid teŋɔ teeh kaa Ɔlevere Bwejen la doa dɛ kaa wi, o kpɔ kon bɔle nyu dɛɛ valɛ nakpapɛɛ, a baɡle kɛ o loo kuu. Nɛra baa ja o nɛɛ la bwa ɡe kpɔ kwaa tɔ nyuune dɛ wi teŋɛ, dɛ teeh dɛɛ kaa.

³¹ Dɛ ba ŋɔ Kooro Devid be kɛŋɔ Ahetofɛl ja Absalɔm nɛra o ne baa dɛ vɔrɔwe waa la nɛ. Anomanta, Kooro soŋɔ ŋɔ, “N Naa Korowii, ɡel Ahetofɛl liire bwa berɛ wepuu.”

³² Kooro Devid aa tel bwe la doa, bela nɛra yon dɛɛ tomɛ Korowii la, dɛ Husai waa ɛ Aaki te lɔ bela, dɛ ba chemo. Dɛ o batakaare kɛɛrɔ, asɛ teera su o nyu bwa.

³³ Anee Kooro Devid ŋɔ o be ŋɔ, “He ŋɔ hɛɛ teŋɛ n nɛɛ kaa laa, aa tɔnɔ bɛlbwaa dɔ tɛ mɛ.

³⁴ Waa haa ɛ á won cha mɛ laanee kɛ, he berɛ kaa bwɛjen la ta, dɛ́ ka ŋɔ Absalɔm be kɛŋɔ taraken te hɛɛ berɔ tomɔ kasinteŋ ne, ɡɛ haa tomɛ o mɛɛ la. Ásɛ he takapɔ kɛŋɔ Ahetofɛl liire bɛlbwa waa ba a ne la, hɛɛ lɔɔ ta.

³⁵ Sadɔk ne Abiata baa ɛ sɔfore bwa ɛɛ do he be belaa, wobɛlbwa haa no kooro dem bela la, bol ba be.

³⁶ Dɛ sɔfo Sadɔk bibaa Ahimas ne Sɔfo Abiata bibaa Jonatan ja ba nɛɛ bela. He dɔ wobɛlbwa naa, hɛɛ won tom ba n be ba ba bol.”

³⁷ Gɛɛ a do, asɛ Kooro Devid dam Husai berɛ kaa bwɛjen Jerusalam, dɛ namee Absalɔm ɡe den dɛɛ jo bwɛɛ la bini.