2 Samoɛl 13 - mzwDBL

Amnɔn ne Taama

¹ A habɔɔ la, Kooro Devid bibaa Absalɔm dɔ nimambihaah bɛl waa wola yalɛ baa yerɔ Taama, asɛ Kooro Devid bibaa Amnɔn ɛɛ nyinu. Dɛ o wer tolo kɛrɛdɛ.

² Dɛ Amnɔn sie dɛ lɛ Taama nɛɛ kohona, a ɡel a berɔ weela, dɛkalkɛ a kpeɡri kɛ o dɔɔ, dɛ waa baa bɛlbwa ɡe jemɛ mɔɔ.

³ Kɛ dɛ Amnɔn dɔ dam bɛl baa dɛ yerɔ Jonadab. O mɛɛ sɔne Simea, onee nomoa ka tɛ Kooro Devid lola bini. Dɛ Jonadab keo taeh.

⁴ Awola bɛl, Jonadab bɔɔ Amnɔn ŋɔ, “He ɛ kooro bie, kɛ saŋ bɛlbwa n nae naa, a do kɛŋɔ he sie aa lɛ. Bɔkwa waa dɛɛ hae nɔ?” Anee o chaŋe ŋɔ, “N dɛ nyin Taama waa ɛ n dɔɔ Absalɔm nimambihaah la.”

⁵ Ate, Jonadab ŋɔ o be ŋɔ, “Saah ka chɔ mpa ta kɛŋɔ he bwara dɛ wee ken. He mɛɛ balɔ ba nae naa, he ŋɔ o be ŋɔ, ‘N dɛ́ soŋe, yerɛ n nimambihaah ó ba tɛ mɛ kondikwa ń di. Ó ba daa kondikwaa la n siwi ta bonɔ, dɛ́ kpɔ tɛ mɛ ń di.’ ”

⁶ Anomanta, Amnɔn saahnɔ ka chɔ mpa ta kɛŋɔ o bwara aa dɛ weo ken. Kooro balɔ ba nao asɛ o ŋɔ o be ŋɔ, “N dɛ soŋe, ɡel Taama ba dɛ́ ba ɛ n pɛla kondikwaa n siwi ta bonɔ tɛ mɛ, ásɛ n dɔ o nɔn ta kondikwaa di.”

⁷ Anomanta, Kooro Devid tomɛ nɛra Taama be o koodem bela ŋɔ, “La he dɔɔ Amnɔn be o dem dɛ́ ka daa kondikwaa tɛo.”

⁸ Asɛ Taama la Amnɔn be o dem dɛ o chɔɔ. O kpɔ men baa kpɔa dɛɛ ɛ paanoo la ane dɛ koora, dɛ ɛ o pɛla kondikwaa la o siwi ta.

⁹ O kpɔ kondikwaa la do loɡ bini tɛo, o ŋɔ waa di. Belaa Amnɔn ŋɔ, “Gel nomɛlbwa le bonɔ kaa.” Asɛ nɛra baa lɔ bela bwa kaa.

¹⁰ Belaa Amnɔn ŋɔ Taama be ŋɔ, “Kpɔ kondikwaa la ba tɛ mɛ n chɔɔbɔr, ásɛ n dɔ he nɔn ta kwaa di.” Asɛ o kpɔ kondikwaa la jo dea ka tɛ o dɔɔ Amnɔn.

¹¹ Waa kpɔa jo ka tɛo la, o ɡuɡru dɛ ŋɔ, “N nimambihaah, ɡel n ne he chɔ.”

¹² Asɛ o ŋɔ o dɔɔ be ŋɔ, “Akai, bɛ men ɡuɡri. A ɡɛ waa nɔ ta chɛ kɛ bá ɛa Israel harɛ nɔ ta! A ɛ wedoŋa kohona.

¹³ Dɛ a ba ɡɛ naa, ɛrɛɛ mɛɛ ba wona ɡɔɔ nyu nɛra bini nɔ? He ɡe kwaraa la, sihiih ɛɛ kpoe Israel harɛ nɔ ta bwa. N poori, ka bol kooro be mɔɔ, waa sɛh ŋɔ n bɛ hen yalɛ.”

¹⁴ Kɛ Amnɔn ta o waa la ta sɛɛh, o bokpeɡa aa ɡwaalo nomanta, o wono ɡuɡru o ne o chɔ.

¹⁵ Belaa Amnɔn berɛ haoh kohona. Kasinteŋ, o haoh dɛ ɡwaa ɡɛ o fa aa dɛ nyinu la. Asɛ o ŋɔ o be ŋɔ, “Ir le kaa!”

¹⁶ Anee Taama ŋɔ o be ŋɔ, “Akai. He doŋ mɛ ŋɔ n le kaa laa, a ɛ wechɔɡa kohona dɛ ɡwaa waa haa kpɔa ɛɛ mɛ nɔ.” Kɛ Amnɔn ta sɛɛh.

¹⁷ O yerɛ o bonɔɔ bɛl dɛ ŋɔ o be ŋɔ, “Lawɛ haah nɔ le bonɔ kaa dɛ́ laa ɡbera karɛ habɔɔ.”

¹⁸ Anomanta, bonɔɔ la lawɔ le dɛ laa ɡbera la laa karɛ habɔɔ. Dɛ o do batakaarejaŋ ondɛɛɡe bɛl. Dɛ ɡɛ batakaani laanee kooro bihaahna baa wola baala jemɛ bwa ɛɛ do.

¹⁹ Taama ɛ tɔɔ do o nyu ta dɛ kɛɛ o batakaarejaŋ ondɛɛɡe la. Dɛ kpɔ nɔɔra dawɛ nyu dɛ wi kohona dɛɛ kaa.

²⁰ Belaa o dɔɔ Absalɔm bɔɔro ŋɔ, “He dɔɔ Amnɔn la ɡelɔ he ne o chɔ kɛɛ? He te hel n nimambie, he dɔɔree on, bɛ nomɛlbwa be bol.” Asɛ Taama so o dɔɔ dem bela, bambichɔɡ ne.

²¹ Kooro Devid aa no waa nɔ la, o baah diu kohona.

²² Absalɔm ɡe ta wedɛɛɡe kɛɛ wechɔɡe bɛlbwa bolɛ baɡle Amnɔn, kɛ dɛ o waa lɔ o bini o haoh, dɛkalkɛ o ɡelɔ sihiih kpo o nimambihaah Taama.

Absalɔm kpo Amnɔn

²³ Bene anɛ habɔɔ la, Absalɔm nɛra baa dɛ fonɛ o peera lɔ bwɛɛ bɛl baa dɛ yerɔ Baal Hasɔ. O bɛne Efrem dea harɛ jwɛh ta, asɛ o ta nɔn yerɛ kooro bibaala bwa ŋɔ bá ba bela.

²⁴ Belaa Absalɔm la kooro be dɛ ka ŋɔ, “N naa, he bonɔɔ dɔ nɛra ba baa fonɛ o peera pona. N poori, he ne he nomonome ɛɛ won ba ja ya nɛ aa?”

²⁵ Anee kooro chaŋe ŋɔ, “Akai, n bie, a ta chɛ kɛ ya bwa kaa ka dawɛ he nɛɛ ɡɛ.” Absalɔm soŋe kooro la sie kɛ o ta sɛɛh, kɛ o soŋe andɛɛɡa tɛo.

²⁶ Ate, Absalɔm berɛ ŋɔ, “A wer, dɛ ɡɛɛ tenaa, tɛ n dɔɔ Amnɔn ŋwɛnɛ ó ba ja ya nɛ.” Asɛ kooro bɔɔro ŋɔ, “Ɛrɛɛ chɛ kɛ ó ba ja he nɛɔ?”

²⁷ Dɛ Absalɔm ta teŋɔ dɛɛ soŋe, asɛ kooro tɛ Amnɔn ne o bibaala la kar ŋwɛnɛ ba kaa ka ja o nɛ. Absalɔm daa kondikonjena aa chɛ kooro,

²⁸ dɛ ŋɔ o bonɔɔna be ŋɔ, “Hé ɡel he sie do Amnɔn be ɡɛ saŋ waa nyɔ sen dɛ dɛɛ la, mɛɛ lɔ sie he bee, ásɛ he kpoo. Hé te bɛ ɔmɛ. Mɛɛ lɛ wobɛlbwaa dawɛ n nɛ. He bɛ ɔmɛ, dɛ́ che kiŋkiŋ.”

²⁹ Anomanta, o bonɔɔna la teŋɛ o waa waa baɡ ba la ta, dɛ kpo Amnɔn. Belaa kooro bibaala la bwa ir, dɛ kpɔ ba keeɡore dɛ chwa kaa.

³⁰ Ba ta aa lɔ ŋwɛnɛ ta dɛ waa la tɔ sie tel Kooro Devid be kɛŋɔ, “Absalɔm kpoo he bibaala la bwa, beŋkpoŋ kwaraa ta kae.”

³¹ Belaa kooro ir che dɛ kɛɛ o laala, dɛ chole harɛ, a baɡle kɛ o loo kuu. O bonɔɔna baa ja o nɛɛ bela la ɡe kɛɛ ba laala.

³² Kɛ Kooro Devid dɔɔ Simea, o bibaa baa dɛ yerɔ Jonadab ŋɔ, “N naa kooro, he bibaala la bwa laa ba kpoo, Amnɔn ɡboo ɛ nɛn waa sewa. He ɡbabir ɛɛ won na kɛŋɔ le ɡɛ saŋ Amnɔn aa ɡuɡri Absalɔm nimambie Taama o ne o chɔ la bwaa o le dɛ dɔ ɡɛ liire nɔ o nyu bini.

³³ Anomanta, n dɔɔ, bɛ waa la yarada kɛŋɔ he bibaala la bwa serewɔ, Amnɔn ɡboo ɛ nɛn waa sewa.”

³⁴ Anɔ bwa la, dɛ Absalɔm chwao. Kooro nɛn waa dɛ daahno la nyiŋo dɛ na nɛra baa wara dɛ do ŋwɛnɛ ta o wee cholibɔr Horonaim pera, deŋɡare bɛl doa. Waa le belaa o la ka ŋɔ kooro be ŋɔ, “N na baala bane baa le deŋɡare la ta Horonaim pera dɛɛ ba.”

³⁵ Anee Jonadab ŋɔ kooro be ŋɔ, “N naa, he bibaala laanee la, a deno ɛ ɡɛ he bonɔɔ aa bola la.”

³⁶ O nyoa aa dena dɛɛ chiɡ, dɛ Kooro Devid bibaala la ɡe deno baa jo dɛɛ wi kohona. Kooro ne o bonɔɔna la bwa ɡe wio kɛrɛdɛ.

³⁷ Absalɔm chwao ka so bwɛɛ bɛl baa dɛ yerɔ Gesur, Kooro Amihud bibaa Talmai be bene atoro. Dɛ tɔpere te bɛlbwaa Kooro Devid ɛɛ wi o bibaa la wa.

³⁸ Absalɔm aa chwaa ka so Gesur la, o soɡe bela bene atoro.

³⁹ Dɛ kooro bambile lawɔ kɛŋɔ ó la Absalɔm be ka nao, dɛkalkɛ o dɔ bolarawa le Amnɔn seo la ta.