2 Samoɛl 12 - mzwDBL

Netan di Kooro Devid kasinteŋkpeɡ

¹ Awola bɛl, Korowii tomɛ o keame bɛl baa dɛ yerɔ Netan Kooro Devid be o ka ŋɔ o be ŋɔ, “Baala banɛ banee fa soɡe bwɛɛ bɛl ta. Bɛl ɛ suuɡate, asɛ bɛl ɡe ɛ nyaa.

² Dɛ suuɡate la dɔ peera ne nae kɛrɛdɛ,

³ kɛ dɛ nyaa la ta komɛlbwa dɔe ka ja pelor beŋkpoŋ waa yawɔ ta. O dɛɛro o ba kpeɡ, o ne o bechale do dem bela. O kondikwaa tama waa dɔa la binii o bɔne dɛɛ tɛo, wɛɛ nyɔ nee ɡee yaa, atane o numol waa dɛ nyɔ o bini ne, asɛ o lawɔ dɛɛ dawɛ o nakpale ta. Dɛ pee la do kɛŋɔ bihaah dɛ tɛo.

⁴ Awola bɛl, hɔɔh bɛl ba dɛ kaa o ŋwɛnɛ dɛ ba choɡ suuɡa te la. Kɛ suuɡa te la ta wone kpo o peera kɛɛ nae la bini bɛl ɛ kondikwa tɛo. Nyaa la pelor beŋkpoŋ laanee o ka lawɛ dɛ ba kpo ɛ kondikwa tɛ hɔɔh la.”

⁵ Kooro Devid aa no waa nɔ la, o baah di suuɡa te la nɛɛ kohona, dɛ ŋɔ Netan be ŋɔ, “N ŋwɛɛ Korowii waa lole kɛŋɔ, naate waa ɛ ɡɛ waa nɔ deno chɛ kɛŋɔ bá kpoo!

⁶ A chɛ kɛ ó bɔ pee la kem bele anaarɛ, dɛkalkɛ o ta nyaa la nɛɛ sune.”

⁷ Belaa Netan ŋɔ Kooro Devid be ŋɔ, “Henee a ɡɛ nɛn la! Waa Korowii Israel tena aa dɛ tomɔ la aa dɛ bol laanee nɔ, ‘Menee lɛɛ le Kooro Sɔɔl nɔn ta, dɛ fuɡe noo do he nyu ta, dɛ cheɡe kora Israel harɛ ta.

⁸ N kpɔ he dɔɔ Kooro Sɔɔl dem ne o haahna ɡe tɛɛ, dɛ cheɡe kora ta Israel ne Juda bwa ɡe. Dɛ anɔ ɡbo aa kanaa, n fe berɔ jae ane.

⁹ Ɛrɛɛ he vɛh men Korowii waa maa doe a ta dɛ ɛ wechɔɡa ɡɛ nɔɔ? He ɡelɔ ba kpo Uria Hiti te la, asɛ he kpɔ o haah mo. Amɔn tena nɔn taa he kpɔɔ do, dɛ ɡel ba kpoo laa ta.

¹⁰ Haa wola n waa ta teŋɛ dɛ ka kpɔ Uria haah mo nomanta, he naanar baa ka ba bwa la ɛɛ sewɛ laa taa, haa deŋnesɔɔhnaa dɔ he dem ɡe bwa.

¹¹ Men Korowii, n ŋwɛɛrɔ kɛŋɔ he ɡbaɡba dem nɛnee mɛɛ ba ɡela ó kpɔ sibeɡra ba ta he nɛ. Mɛɛ lawɛ he haahnaa tɛ naate he siwi ta, ásɛ o laɡ ba chɔ webaŋa.

¹² Sɔeh he sɔh dɛ ɛ he kwaa la, kɛ mɛɛ ɡeloo anɔ chiɡ webaŋa, ásɛ Israel tena bwa na.’ ”

¹³ Ate, Kooro Devid ŋɔ Netan be ŋɔ, “N ɛ wechɔɡa dɛ jo Korowii nɛ.” Asɛ Netan ɡe chaŋo ŋɔ, “Korowii kpɔ he wechɔɡa kɛɛ, haa sewɛ.

¹⁴ Kɛ haa wola duure kpɔe tɛ Korowii nomanta, he bibaa ɛɛ sewɔɔ.”

Kooro Devid bibaa seo wa

¹⁵ A habɔɔ la, Netan kaa dem. Korowii lɔ bibaa Uria haah aa lola tɛ Kooro Devid la bil, wɛɛ we weela.

¹⁶ Kooro Devid soŋe Korowii, kɛŋɔ ó ɡel bie la dɔ bokpeɡa. Dɛ o vɔwɛ nyoa, dɛ́ yon ka jo dea jwaana dɛ́ chɔ harɛ.

¹⁷ Nomonome baa lɔ o dem yon ba che dɛ́ ŋɔ ó takapɔ ir harɛ, kɛ waa sɛh, dɛ́ vɛh o ne ba pɛɛ dɛ di kwaa kwara.

¹⁸ Tɔpenuanɛ wee la, bie la sewɔ. Dɛ kooro bonɔɔna la dɛ ɔmɛ kɛŋɔ baa bol o bee, dɛkalkɛ ba liiro ŋɔ, “Bie la ta aa soɡe le kwaraa la, ya bol waa o be naa, waa chaŋe. Ɛrɛɛ yaa ba wona bol o bie nɔ seo waa o be nɔ? O bambile ken ɛɛ chɔɡoo ó ɛ waane.”

¹⁹ Kooro Devid baa na kɛŋɔ o bonɔɔna la ɡbo dɛ ŋwalɛ waane dɔŋa be, asɛ o jemɛ kɛŋɔ o bie la sewɔ. Belaa o bɔɔ ŋɔ, “Bie la sewɔ kɛɛ?” Ba ŋɔ, “N dɔɔ, ɔɔh o sewɔ.”

²⁰ Ate, o ir che o naa ta dɛ ka sɔ ne, dɛ fɔɡle nosɔɔhsoma dɛ ka kpɔ laalafala do, dɛ kaa Korowii Tɛnte Dea bini dɛ ka tomɔ. O berɔ le ba kaa o dem, dɛ ɡel ba tɛo kondikwaa o di.

²¹ O bonɔɔna la bɔɔro ŋɔ, “Ɛrɛɛ he we-ɛɛla berɛ do ken? Bie la ta aa soɡe le la, he vɔwɛ nyoa dɛɛ wi, taraken waa bera sewɛ nɔ, he berɔ ir dɛɛ di kwa.”

²² Asɛ Kooro Devid chaŋe ŋɔ, “O ta aa soɡe le la, n vɔwɛ nyoa dɛ wi kpela. N liiro kɛŋɔ Korowii ken ɛɛ sune n nɛɛ, ásɛ bie la bɛ sewɛ.

²³ Kɛ taraken waa sewa nɔ, ɛrɛɛ chɛ kɛ ń berɛ vɔwɛ nyoa jaɔ? Maa won berɛ ba o ne mkpa ta kpa. Menee dɛ́ sewɛ kaa o be, o te laa dɛ́ ba n be kpa.”

²⁴ Belaa Kooro Devid larawe o haah Batsiiba bwara, asɛ o ne o chɔ o kpoŋe tea dɛ lolɛ bibaa dɛ pa o sɔn Solomɔn. Dɛ Korowii dɛ nyin bie la waa taeh,

²⁵ anomanta, Korowii tomɛ o keame Netan ŋɔ ó pa bie la sɔn Jɛdidia.

²⁶ Anɔ bwa habɔɔ, Joab teŋɔ dɛ kpɔ o laa tena ka yo Amɔn tena bwɛjen baa dɛ yerɔ Raba o ɛ koobwɛɛ la ta, dɛ pɔ ba nɛ.

²⁷ Ate, Joab tomɛ toroma Kooro Devid be dɛ ŋɔ, “N yo bwɛjen Raba tena dɛ kpɔ nɔn dawɛ bela baa dɔ nee dɛɛ le bwa ta.

²⁸ Boa he laa tena baa kaa la bwa nyoa, ásɛ ba ba bar bwɛjen la dɛ́ laɡ ba. Gɛ laa, dɛ menee dɛ́ ka yoo ba dɛ́ pɔ ba nɛ aa, n sɔnee bá kpɔ pao.”

²⁹ Anomanta, Kooro Devid boa laa tena la bwa nyoa dɛ la ba ne Bwɛjen Raba dɛ ka yoo ba, dɛ kpɔ bwɛɛ la.

³⁰ A habɔɔ, Kooro Devid la Raba dɛ ka laa ba voɡ Molɛk kooɡbɛrɛ kpɔ o nyu ta. O tɔɡre ɛɛ ɛ suuɡaswɛm kilore fifraatoro dɛ anaarɛɛ, ba bil bwedɛɛɡa a yoɡ aa kpeɡa o ta asɛ o kpɔ pi. O pa ba laaladɛɛɡa kɛrɛdɛ le bwɛjen la ta kaa,

³¹ asɛ dɛ lawɛ nɛra baa lɔ bwɛjen la ta, dɛ ɡel baa peɡri daa dɛɛ loɡɛ para ne kpanfɛre, dɛ ɡel baa teŋe berekese ɡe. Gɛɛ o ɛ Amɔn bwɛɛre la bwa ta, asɛ o ne o laa tena la bwa berɛ kaa Jerusalam.