2 Samoɛl 11 - mzwDBL

Kooro Devid ne Batsiiba

¹ Lɔmɔɡa saŋ koranar yon dɛɛ la laa la, Kooro Devid tomɛ Joab ne o laa nomonome dɛ Israel laa tena bwa. Ba kaa yo Amɔn tena dɛ pɔ ba nɛ, dɛ ka bar bwɛjen Raba ɡe cheme dɛ chɔɡ o bwa o berɛ dimɡbia, kɛ Kooro Devid te soɡe Jerusalam.

² Awola jɔmɔra bɛl, kooro iro le o chɔɔbɔr dɛ baa valɛ saldoa koodem bela. O cheɡɛ bela na haah bɛl waa dɛ sɔ ne. Dɛ o wer tolo taeh,

³ asɛ o tomɛ nomɛl ŋɔ ó ka pɛɛ haah la waa ba tɛo. Asɛ naate chaŋo ŋɔ, “Eliam bihaah Batsiiba laa aa? Hiti te baa dɛ yerɔ Uria la haahnee.”

⁴ Ate, kooro tomɛ toroma ba ka kpɔɔ ba. Waa bala la, kooro lawɔ chɔ. Dɛ o bochɔɡa leɔ doŋa bɛlbwa toole o nɛɛ kpa. Asɛ o berɛ kaa dem.

⁵ A habɔɔ haah la nao kɛŋɔ o kpoŋe tea, asɛ dɛ ɡel Kooro Devid no.

⁶ Anomanta, Kooro Devid ɡelɔ ba ka ŋɔ Joab be ŋɔ o dɛ nyin ó na Uria waa ɛ Hiti te la. Ate, o la ka ŋɔ o be asɛ o ba.

⁷ Uria aa bala la, Kooro Devid bɔɔro ɡɛ Joab ne laa tena la bwara aa doa, ne laa la bini waa ɡe bwa.

⁸ Ate, kooro ŋɔ Uria be ŋɔ, “La dem dɛ́ ka onɛ tama.” Anomanta, Uria le bela kaa asɛ kooro ɡel ba kpɔ koŋkɛɛla ka tɛo.

⁹ Kɛ Uria ta dem kaalɛ, o ne kooro nɛra baa dɛ daahno bwa pɛo chɔ koodem doonyoa bela.

¹⁰ Kooro Devid aa noa kɛŋɔ Uria ta dem kaalɛ la, o yerɔ dɛ bɔɔro ŋɔ, “Haa le dem biɡro, aah ɛrɛɛ he ta dem kaalɛ ɔ?”

¹¹ Belaa o chaŋe kooro ŋɔ, “Korowii Ne Nɛwɛnyina Fɔo Daka la ne Israel tena, dɛ Juda tena bwa soɡe tɛnte deene bini, asɛ n nomoa Joab ne n dɔɔ kooro laa tena ɡe do laa ta dɛ baŋre ba tɛnte dɛ so kpɔɡ bini. Ɛrɛɛ mɛɛ ba wona kaa n dem dɛ́ ka di kwaa nyɔ sen lɛ n sie, dɛ́ lawɛ n haah chɔ ɔ? N ŋwɛɛ Korowii kɛ he taa lole nɔ, maa won ɛ ɡɛ waa nɔ!”

¹² Ate, kooro ŋɔ, “So bonɔ tɔpebeŋkpoŋ ja, ásɛ kere ń ɡel he kaa.” Anomanta, o berɔ chɔ Jerusalam awola tɔɔ per.

¹³ Kooro ta nɔn yerɔ o ba o ne o di kwa, o tɛo sen o nyɔ dɛɛ. Kɛ jɔmɔra la, Uria berɔ kaa ka pu nɛra baa dɛ daah kooro doonyoa bela la, dɛ chɔ o kalaŋ ta o ta dem laŋɛ.

¹⁴ Tɔ aa pera chɔɔ la, Kooro Devid chwerɛ tɔn dɛ kpɔ tɛ Uria ŋɔ ó kpɔ ka tɛ Joab.

¹⁵ Waa aa lɔ tɔn la bini laanee nɔ, “Laa la baa do kpeɡri aa, ɡel Uria ka tɔ sie ásɛ he le habɔɔ, bá kpoo.”

¹⁶ Anomanta, Joab ne laa tena la aa bar bwɛjen la cheme la, o kpɔ Uria ka do bela waa jema kɛŋɔ ba dɔma kpeɡri la.

¹⁷ Baala baa lɔ bwɛjen la bini balɔ dɛ ba yo Joab ne o laa tena. Kooro Devid laa tena la bane serewe, hale Uria waa ɛ Hiti te la ɡe sewɔ.

¹⁸ Asɛ Joab tomɛ torome o kpɔ waa aa chiɡ laa la ta bwa ka tɛ Kooro Devid.

¹⁹ O ŋɔ torome la be ŋɔ, “Hé kpɔ waa aa chiɡ laa la ta bwa ka tɛ kooro tonɛ aa,

²⁰ o baah ken ɛɛ diu o bɔɔ ŋɔ, ‘Ɛrɛɛ he suuh tel bwɛjen la kohona dɛ yoo ba nɔɔ? Haa jemɛ kɛŋɔ baa won che bwɛɛ la danjwɛɛ ta dɛ́ ta heya hɛma kɛɛ?

²¹ Hé soh ɡɛ baa kpo Gedeɔn bibaa Abemɛlɛk la aa? Haah bɛlee cheɡɛ danjwɛɛ ta bwɛɛ bɛl baa dɛ yerɔ Tɛbɛs dɛ viɡri nambwe o ba le o nɛɛ dɛ kpoo. Ɛrɛɛ he suuh tel danjwɛɛ la kohona ɡɛ nɔɔ?’ Dɛ kooro bɔɔre naa, he ŋɔ o be ŋɔ, ‘He bonɔɔ Uria waa ɛ Hiti te la ɡe sewɔ.’ ”

²² Anomanta, torome la la kooro be dɛ ka bol waa Joab aa doo ŋɔ ó ka bol o be la bwa.

²³ Torome la ŋɔ, “Ya dɔma la kpeɡri ɡwaa ya nɛ, ba le bwɛjen la bini ba yo yaa baŋ, kɛ ya wono doŋ ba ba berɛ, dɛ chwa kaa bwɛɛ la doonyojen la ta.

²⁴ Ba cheɡɛ bwɛɛ la danjwɛɛ la ta, dɛ ta yaa hɛma, asɛ kooro bonɔɔna la bane serewe. He bonɔɔ Uria, Hiti te la ɡe sewɔ.”

²⁵ Belaa Kooro Devid ŋɔ torome la be ŋɔ, “Ka do Joab ɡbemba, dɛ́ ŋɔ o be ŋɔ ó bɛ ɡel o liire chɔɡ, dɛkalkɛ bɛlbwa ɛɛ won sewɛ laa ta. Ŋɔ o be ŋɔ ó takapɔ dɛ́ kpɔ o te kɛrɛdɛ, dɛ́ ka yoo ba ja dɛ́ pɔ ba nɛ.”

²⁶ Uria haah Batsiiba aa baa no kɛŋɔ o jaa sewɔ la, o wiu.

²⁷ Waa wiu tonɛ la, kooro ɡelɔ ba ka kpɔɔ ba o be dem o berɛ o haah, dɛ lolɛ bibaa tɛo. Kɛ Korowii sie ta waa kooro aa ɛa la ta lɛɛ.