2 Samoɛl 10 - mzwDBL

Kooro Devid pɔ Amɔn tena nɛ

¹ A habɔɔ la, Amɔn Kooro Nahas baa sewɛ, asɛ o bibaa Hanun ba chiɡ o naa ta, dɛ di kora.

² Anee Kooro Devid lii ŋɔ, “Mɛɛ kpɔ Kooro Nahas bibaa Hanun daramee, ɡɛ n ne o mɛɛ fa aa kpɔ darame la.” Anomanta, kooro tomɛ toroma o be ba ka bwɛɛlo o mɛɛ seo wa. Toroma la aa tel Kooro Hanun be Amɔn tena harɛ ta la,

³ anee Amɔn nomonjena ŋɔ Kooro Hanun be ŋɔ, “He dɛ lii kɛŋɔ duuree Kooro Devid kpɔ dɛɛ tɛ he mɛɛ dɛ tomɛ toroma ŋɔ bá ba bwɛɛle nɔ naa? Toma laa o tom ba ŋɔ bá ba sɔh nyiŋi ya harɛ nɔ, dɛ́ won ba yo yaa dɛ́ pɔ ya nɛ aa?”

⁴ Anomanta, Kooro Hanun lawɛ Kooro Devid toroma la dɛ fonɛ bɛlbwa tampona pera ta, dɛ teŋni ba laala baa doa la muŋkela bɔra ta, dɛ ɡel ba ba kaa.

⁵ Kooro Devid aa no ɡɛ waa nɔ la, o tomɛ toroma ŋɔ bá kpɔ kala ka tɛɛ ba, dɛkalkɛ ba ɡelɔ sihiih kpo ba kohona. O ŋɔ toroma la be kɛŋɔ bá ŋɔ ba be ŋɔ bá so Jeriko ka tel kɛŋɔ ba tampona la aa moɡa mɔɔ bá berɛ ba.

⁶ Amɔn tena la aa na Kooro Devid bandia kɛŋɔ o mee le ba we-ɛɛla ta la, ba kaa kpɔ Siiria laa tena kaɡboŋa fifraanɛ baa dɛ valɛ le bwɛjena Bɛt Rehob ne Soba, ne Maaka Kooro ne o laa tena kaɡboŋ, dɛ laa tena kaɡboŋa fi dɛ banɛ baa le Tob harɛ ta ɡe ba ba cha ba.

⁷ Kooro Devid aa no waa nɔ la, o tomɛ Joab ne laa tena la bwa ŋɔ bá ka yoo ba.

⁸ Amɔn tena la kpɔ ba te, dɛ ba che Raba waa ɛ ba bwɛjen la doonyoa, asɛ Siiria tena baa le Soba ne Rehob dɛ laa tena baa le Tob ne Maaka ɡe ka che bwɛɛ la dahare.

⁹ Joab nao kɛŋɔ laa tena lɔ o sie ne habɔɔ, anomanta, o le Israel laa tena baa jemɛ yoi kɛrɛdɛ, dɛ kpɔ ba ka che Siiria tena la sie ba ne ba yo.

¹⁰ O kpɔ laa tena la kabora do o nime Abisae nɔn ta, asɛ Abisae kpɔ ba ka che Amɔn tena la sie, ba ne bá yo.

¹¹ Belaa Joab ŋɔ Abisae be ŋɔ, “Dɛ he baa na kɛŋɔ Siiria tena la dɛ pɔ n nɛ aa, he ba dɛ́ ba lɛɛ mɛ, dɛ Amɔn tena ɡe kpeɡri ba dɛ ɡwaa he nɛ aa, ń ɡe ba lɛɛ.

¹² Dɔ bambile, dɛ́ che kiŋkiŋ, dɛ́ ɡel ya won yo bansua ne lɛ ya nɛra ne Korowii bwɛjena cheɡ. Waa aa too Korowii tea laanee wɛɛ ba ɛɛ.”

¹³ Ate, Joab ne o laa tena kpɔ ba te dɛ ka yo Siiria tena la, asɛ ba chwa le ba sie kaa kwaraa.

¹⁴ Amɔn tena aa na Siiria tena ba chwa dɛɛ kaa la, ba chwao le Abisae be dɛ kaa bwɛjen la bini. Anomanta, Joab ɡel Amɔn tena la yoi dɛ berɛ ba Jerusalam.

¹⁵ Siiria tena aa naa kɛŋɔ Israel tena pɔ ba nɛɛ la, ba yerɛ ba laa tena la bwa cheme ja.

¹⁶ Asɛ Kooro Hadadesa ɡel ba ka kpɔ Siiria tena baa lɔ Yufretis Moo wee leebɔr baŋ le, asɛ ba ba Helam. Asɛ Sobak waa ɛ laa sitɔɔ tɔ ba sie.

¹⁷ Kooro Devid aa no waa nɔ la, o boa Israel laa tena bwa nyoa, asɛ ba ɛɡɛ Jɔɔdan Moo le dɛ kaa Helam. Dɛ Siiria laa tena la kpɔ ba te dɛɛ cheme Kooro Devid dɛ́ yoo.

¹⁸ Kɛ Siiria laa tena ta wone che Israel laa tena la sie. Kooro Devid ne o laa tena kpoo nɛra baa soɡe kwaa aa do kɛŋɔ torɔɡore bini lafraanuanɛ, ne laa tena kaɡboŋa fifraanaarɛ baa dɛ valɛ. Ba kpo Sobak waa chɔ ba laa tena nyoa la ɡe.

¹⁹ Koranar baa lɔ Kooro Hadadesa lɔɡa aa naa kɛŋɔ Israel tena pɔ ba nɛɛ la, ba ne Kooro Devid kaa fɔwɛ deŋnesɔɔhna fɔo, dɛ kpɔ ba te do o lɔɡa dɛɛ tomɔ. Gɛɛ a do Siiria tena ɔmɛ, ba ta Amɔn tena chae kpa.