2 Samoɛl 1 - mzwDBL

Devid no Kooro Sɔɔl seo

¹ Kooro Sɔɔl seo habɔɔ, Devid le laa o ne Amalɛk tena aa kaa yo o pɔ ba nɛɛ la ba, dɛ ba so bwɛjen Siklaɡ tɔpera anɛ.

² Tɔpetooro wee ta la, baa bɛl le bela Kooro Sɔɔl aa baŋre o tɛnte deene dɛ so la ba. Dɛ o kɛɛ o laala bwa, dɛ ɛ teera su o nyu ta a baɡle kɛ o loo kuu. O la Devid be, dɛ ka ba harɛ dɛ kpɔ duure tɛo.

³ Anee Devid bɔɔro ŋɔ, “Leperaa he leɔ?” Asɛ o chaŋe ŋɔ, “Chwae n chwa le bela Israel tena aa baŋre ba tɛnte deene dɛ so la.”

⁴ Devid berɛ bɔɔro ŋɔ, “Bɔkwa waa bala ɔ? Gel n jemɛ.” Asɛ o chaŋo ŋɔ, “Kooro Sɔɔl laa tena chwa laa la ta, asɛ ba kpo Filisti tena la ɡalɡa. Kooro Sɔɔl ne o bibaa Jonatan ɡe sewɔ.”

⁵ Anee Devid bɔɔ bonɔɔ la ŋɔ, “Ɛrɛɛ he ɛ jemɛ kɛŋɔ Kooro Sɔɔl ne o bie Jonatan sewɔ ɔ?”

⁶ Ate, o chaŋe ŋɔ, “Dɛ n lɔ Gelboa Bwejen doa dɛ na Kooro Sɔɔl kɛŋɔ waa kpoŋe o lampea dɛ kpɔ o te dawɛ o ta, asɛ nɛra baa soɡe kwaa aa do kɛŋɔ torɔɡo ba vɔwɛ pɛl jaɡre, ne nɛra baa soɡe jaɡre ta siwi beɡre dɛɛ bɛno dɛ́ lawɔ.

⁷ Belaa Kooro Sɔɔl ke nyiŋi dɛ yer mɛ, asɛ n bɔɔro ŋɔ, ‘N naa, bɔkwa waa hɛɛ nyin ń ɛ tɛɛ nɔ?’

⁸ O bɔɔ mɛ ŋɔ, ‘Umee hen ɔ?’ Asɛ n chaŋe ŋɔ, ‘Amalɛk tee men.’

⁹ Belaa o ŋɔ, ‘Ba, dɛ́ ba kpo mɛ. Ba do mɛ bol kohona, mɛɛ ba sewa.’

¹⁰ Anomanta, n laŋɔ dɛ ka kpoo, dɛkalkɛ n jemɔ kɛŋɔ waa dɔa ɡwɛɡre la, o chola bini la, dɛ o ne sewee. Ate, n laa o kooɡbɛrɛ ne o baŋe kpɔ ŋɔ ń kpɔ ba tɛɛ la, n dɔɔ.”

¹¹ Belaa Devid ne laa tena baa ja o nɛɛ bwa kɛɛ ba laala a baɡle kɛ ba loo kuu.

¹² Ba ɛ Kooro Sɔɔl ne Jonatan ne Israel tena baa ɛ Korowii nɛra la lwe dɛ wii ba, dɛ vɔwɛ nyoa ka tel jɔmɔra, dɛkalkɛ nɛra ɡalɡaa sewɛ laa la ta.

¹³ Ate, Devid bɔɔ baa o fa aa baa bol waa o be la ŋɔ, “Leperaa he leɔ?” O chaŋe ŋɔ, “N mɛɛ ɛ Amalɛk te ya so Israel harɛ ta.”

¹⁴ Devid berɛ bɔɔro ŋɔ, “Ɛrɛɛ he ta ɔmɛ tamaa bɛlbwa dɛ won kpo nɛn Korowii aa cheɡo kora ta nɔɔ?”

¹⁵ Ate, Devid yerɛ o laa tena la bini bɛl ŋɔ, “Ír la ka kpoo.” Asɛ o la dɛ ka kpoo.

¹⁶ Dɛ Devid fa bol baa la be ŋɔ, “He waa haa ɛa laanee ɡure he nyu ta la. Waa aa le he nyoa he ŋɔ henee kpo nɛn Korowii aa cheɡo kora ta laanee ɛ danseɛ.”

Devid wi Kooro Sɔɔl ne Jonatan

¹⁷ Devid taa ɡɛ wiile aa teŋa nɔ tɛ Kooro Sɔɔl ne o bibaa Jonatan,

¹⁸ dɛ ŋɔ bá kpɔ baɡle Juda baala bá hweli. Ba chwera do tɔn bɛl baa dɛ yerɔ Jasar Tɔn bini ŋɔ,

¹⁹ “Ya nomonome serewɔ Israel deŋɡarere dor. Na ɡɛ banyoola tenten aa serewa chɔ.

²⁰ He bɛ an bol bwɛjena Gat tena be, kɛɛ Askɛlɔn fɔɡbaahna. He bɛ ɡel Filisti haahna no ba sie lɛ, á ba ɛ kɛŋɔ nɛra baa wola Korowii tomɛ bihaahna sie ɛɛ lɛo.

²¹ Mɛn kɛɛ bwaala bɛ Gelboa deŋɡarere ta nɛ, o harɛre bɛ won dɛɛ ɛ kondikwaa ɡe kpa! Banyoola kwaa baa kpɔa tɔ ba te ɡbemɡbe dɛɛ yo chɔ bela, baa noo kpɔe dɛɛ fɔɡɛ Kooro Sɔɔl kon waa kpɔa dɛɛ tɔ o te ɡbemɡbe wɛɛ nyɛɡle kpa.

²² Jonatan ta o hɛma aa, a nyoa wɔrɔbe, Kooro Sɔɔl ɡe kere aa dawɛ dɛɛ kpo banyoola ne o dɔma.

²³ Kooro Sɔɔl ne Jonatan waa wer ba soɡa bini dɛ dɔ nyokpoa kohona, ba baah ta pere ba seo bini bwa. Ba ɡbaŋre ɡwaa kee bɛlbwa, dɛ do kpeɡri ɡwaa nyujentena.

²⁴ Israel haahna, hé wi Kooro Sɔɔl, a do kɛ waa kpɔ yaswɛm dɛɛɡe tɔ heya, dɛ kpɔ kwaa baa kpɔ suuɡaswɛm ɛa do heya.

²⁵ Na ɡɛ banyoola aa sewɛ laa ta! Jonatan sewɔ chɔ Gelboa bwejen doa.

²⁶ N wio dɛɛ tɛɛ, n nime Jonatan, dɛ n fa dɛ nyin he waa taeh. He nyina he fa aa dɔa tɛ mɛ dɔ nyokpoa, a ɡwaa ɡɛ haah naa dɛ nyin o bii kɛɛ o jaa kwara.

²⁷ Na ɡɛ banyoola aa serewa, asɛ ba dɔmkwa chɔ pɛɛpɛɛ!”