2 Pita 3 - mzwDBL

Ya dɔɔ Yeesu Kristo bala tɔpere

¹ N dandɛɛɡa, tɔn nɔɔ n tɔn nɛɛte maa chwerɛ heya. N tɔne anɛ nɔ bwa bini la, n dɛ lii heyaa ásɛ he do wɔrɔbe waa nɔ ta, dɛ́ dɔ tepoŋ.

² N dɛ nyin kɛŋɔ he lii waa Korowii keamere la fa aa bola a saŋ la, ne waa Yeesu toroma la fa aa ŋɔa ya Dɔɔ waa ɛ ya Lɛɛ la ŋɔ hé ɛ la.

³ Anɔ la aa tɔ siee kɛŋɔ, a chɛ kɛ he jemɛ kɛŋɔ tɔpera aa ka mun nɔ ta nɔ, nɛra ɛɛ dɛɛ mamɛ heyaa. Ba sie ɛɛ dɛɛ lɛ ba pɛlchɔɡa taa.

⁴ Baa dɛɛ bɔɔ heyaa ŋɔ, “Korowii aa baɡɛ nyoa ŋɔ Yeesu ɛɛ berɔɔ ba ja la, lee o dɔɔ?” Dɛ ŋɔ, “Ya mɛɛnanar bwa serewɔ, dɛ o ta balɛ mɔɔ. Gɛ harɛ nɔ aa doa o mumpar la, ɡɛɛ o ta do.”

⁵ Ba saahnɔ laa ba liire kpɔ ɡɛ Korowii fa aa kpɔ nyoa bol waa a saŋ la asɛ nyundua ne harɛ pa mun la ta. Nee nee Korowii ta harɛ, nee taa harɛ le.

⁶ Nee Korowii ɡel o su bɔle harɛ bwa a saŋ la dɛ chɔɡo.

⁷ Gɛɛ Korowii ŋɔ nyundua kwaa bwa ne harɛ kwaa bwa aa lole taraken nɔ, á do le ɡɛ, ásɛ nii ɛrɛ ba fuah awola waa dɛ ba nɛra baa wola on tomɛ waa bola dɛ́ pa bole, dɛ́ chɔɡ ba la.

⁸ N dandɛɛɡa, he jemɛ kɛŋɔ tɔpebeŋkpoŋ ne bene kaɡboŋ bwa beŋkpoŋ Korowii be. Beŋkpoŋii a bwa o te be.

⁹ Korowii aa o nyobaɡa ta too, ɡɛ bane aa dɛ lii kɛŋɔ Korowii biɡri o nyobaɡa waa baɡa ŋɔ ya Dɔɔ Yeesu ɛɛ bao la. Bambilee o dɔ tɛ heya, dɛkalkɛ waa nyin kɛ nomɛlbwa chɔɡ ta. O dɛ nyin kɛ nɛra bwa charɛ ba liire dɛ́ le ba wechɔɡa ta mɔɔ o ba.

¹⁰ Ya Dɔɔ Yeesu bala tɔpere la, wɛɛ piɡruu kɛŋɔ ŋwɛɛ bala aa dɛ piɡri la ken. Awola tɔpere la, nyundua ɛɛ jiɡru kikikiki, dɛ́ nyoɡre nɛra siwi ta. Kwaa aa lɔ nyundua bwa ɛɛ fuuh dɛ́ mwɛɛ, ásɛ harɛ ne kwaa aa lɔ o ta bwa fuh.

¹¹ Kwaa nɔ bwa aa dɛ ba fuih ken nɔ, dɛ ɛrɛɛ chɛ kɛ he doɔ? A chɛ kɛ he do ɡoroŋ he soɡa bini, dɛ́ kpɔ he te tɛ Korowii,

¹² dɛɛ kpa Korowii Tɔpere La nyundua aa fuh kwaraa ásɛ harɛ ɡe komɛlbwa fuh dɛ́ mwɛɛ kwaraa la. Hé swɛɛ siwi ásɛ Korowii Tɔpere La ba warane.

¹³ Ya dɛ nyiŋi nyoa Korowii aa baɡa la ŋwɛnɛ. Anee kɛŋɔ wɛɛ ta nyundua onfale ne harɛfalee. Belaa wedɛɛɡa ɛɛ ba doe.

¹⁴ Anomanta, n dandɛɛɡa, haa dɛ kpa awola tɔpere la, hé swɛɛ siwi kɛŋɔ hɛɛ do ɡoroŋee dɛ bɛ wechɔɡa bɛlbwa dɔ Korowii sie, ásɛ he ne o baah do wer.

¹⁵ Hé nyiŋi Korowii bambile waa lawa nɔ kɛŋɔ ŋwɛnɛɛ o tɛ heyaa kɛŋɔ he charɛ he liire, ásɛ o lɛ heya. Anee ya dɔŋ Pɔɔl yaa dɛ nyin o waa la fa kpɔ o wejema Korowii aa tɛo la dɛ chwerɛ heyaa la.

¹⁶ Pɔɔl dɛ bol a ɡɛ waa nɔ o tɔne bwa bini. Ane ta Pɔɔl tɔne waane mun noe kpeɡri taeh. Anomanta, nɛra baa wola wobɛlbwa jemɛ baa wola cheɡɛ kiŋkiŋ la, ba dɛ berɛ waa la sie. Gɛɛ a ɡɛ nɛra nɔ ɛɛ baɡle Korowii Tɔn bini waa la ane ɡe. Kɛ ba ɡbaɡba nyu taa ba ɛ dɛɛ dawɛ.

¹⁷ Anomanta, n dandɛɛɡa, haa dɔa na ken nɔ, hɛ́ɛ nyiŋi kɛrɛdɛ ásɛ dɛ bɛ ba ɡel nɛra baa wola Korowii ɔmɛ ba neɡre heyaa he lɔ naa he yarada la ta, dɛ́ ba choɡli.

¹⁸ Kɛ hé swɛɛ siwi ásɛ ya Dɔɔ waa ɛ ya Lɛɛ Yeesu Kristo suna waa sune he nɛɛ dɛɛ cha heyaa la ɛɛ ja kohona. Hé swɛɛ siwi dɛɛ dɔ wejema o waa ta kohona. Hé ɡel ya tɛo jirima taraken ne saŋ bɛlbwa. Aamen.