2 Pita 2 - mzwDBL

Nyosonteŋna baa dɛ chaɡle Korowii wa

¹ A saŋ la, nɛra bane teŋe nyosone ŋɔ Korowii keameree ban Israel tena bini. Gɛɛ nɛra ɛɛ ba bala dɛ ba teŋe nyosone ŋɔ ban dɛɛ chaɡle nɛra waa he bini. Baa dɛɛ chaɡle waa aa wola kasinteŋ ɛɛ, dɛ́ ɡel nɛra nyoɡre. Gɛ ba wechaɡla aa doa la, haa won jemɛ kɛŋɔ a ta kasinteŋ ɛɛ. Baa vɛh ba Dɔɔ waa bɔ ba wechɔɡa kem la waa, dɛ́ ɡel Korowii chɔɡ ba, ba sewɛ seopiɡri.

² Nɛndamanta ɛɛ teŋɛ ba wedoŋa baa dɛ ɛ la taa, ásɛ a che a ta nɛra bol kasinteŋ ŋwɛnɛ wobochɔɡa kɛ waa were.

³ Ba sibeɡra baa dɔa kohona nomanta, baa dɛɛ teŋe nyosonee ŋɔ waa baa chaɡle heya, dɛ́ neɡre heyaa dɛɛ di. Naate waa pa ba bolchɔɡe dɛɛ ba ba deŋne tɛra la, kpɔ o te dɛɛ kpaa ba saŋ bɛlbwa. Waa dom chɔ. Wɛɛ ɛɛ ba posaposa kenii.

⁴ Nyundua toroma ba fa aa ɛ wechɔɡa la, Korowii ta ban ɡelɛ. O kpɔ ba ta deŋnetɛra bɔr waa ɛ bɔluŋluŋ dɛ bir kpirikpiri la dɛ ka tel awola waa ba bol nɛra bwa waa dɛ́ pa bole la.

⁵ O ta a saŋ la tena ɡelɛ. O ɡelɔ nee su tɔ nɛra baa wola on ɔmɛ la nɛ. Nɛra waa ɡel ba bwaa Nowa o fa aa dɛ chaɡle nɛra ŋɔ bá ɡel ba waa toɡre Korowii be la, ne nɛra banuanɛ.

⁶ Sodom ne Gomoora tena fa aa dɛ ɛ wechɔɡa la, Korowii ŋɔ waa ɡel ba dwee ka, dɛ fuh ba ne ba bwɛɛre bwa dɛɛboo. Ba fuih chɔ le dɛɛ chaɡle waa aa ba chiɡ nɛra baa wola Korowii ɔmɛ nɛ.

⁷ Dɛ Lɔt te ɛ nɛndɛɛɡe waa dɛ ɔmɛ Korowii bela, asɛ wedoŋa bwɛɛre la tena aa wola Korowii ɔmɛ dɛɛ ɛ la ɛɛ hao. O te, Korowii lɛo.

⁸ Lɔt aa ɛ nɛndɛɛɡe o waa su Korowii siwi dɛ do ba baah la, dɛ ba wedoŋa waa dɛ na ne anɔ la waa dɛ no tɔpebii bwa la ɡelɔ o bambile ɛɛ weo.

⁹ He nyiŋo na naa, dɛ Korowii te jemɛ ɡɛ waa dɛ lɛ nɛra baa dɛ ɔmɔ dɛɛ le Bɔnsam daahna ta, dɛ jemɛ ɡɛ waa dɛ tɛr wechɔɡ-ɛɛra deŋne, dɛ́ ka tel awola waa ba bol nɛra bwa waa dɛ́ pa bole la.

¹⁰ Nɛra ba sie aa beɡre ba bwadabii nɔ wechɔɡa aa suu nɔ pɛlchɔɡa ta, baa wola waa bu la, ba deŋnee Korowii ɛɛ ba tɛra kohona. A ɡɛ nɛra baa teŋe nyosone ŋɔ ba dɛ chaɡle waa nɔ, waa ba bambile aa lawaa baa ɛ. Ba bambile kpeɡri! Baa nyundua toroma bu. Wobochɔɡa kwaraa ba bol dɛɛ yaɡ ba!

¹¹ Nyundua toroma kpeɡri dɛ dɔ jirima ɡwaa a ɡɛ nyosonteŋna nɔ, kɛ baa ban chɔɡɛ dɛɛ tɛ Korowii sisa wobol ne.

¹² Nɛra nɔ te do kɛ kpɔɡ bini ola Korowii aa taa ŋɔ báa kpoa la ken. Baa liire kpɔe dɛɛ ɛ wa. Waa mun noe kpeɡri ba be naa, sisa wobolee ba bol dɛɛ yaɡa. Baa serewoo kɛŋɔ ola ken.

¹³ Wahala baa ɡela nɛra ɛɛ na la, ba ɡe ɛɛ na a dɔŋaa. Waa ba sie aa dɛ lɛ a taa kɛŋɔ ba bodia waa baa dɛ ɛa bochaah la. He ne baa pɛa dɛɛ di kwaa nɔ, ba do kɛ doŋa dɛɛ chɔɡ he wer. Ba sɔɔh dɛɛ ɛ bodia waa he habɔɔ taeh.

¹⁴ Ba na haah bɛlbwa naa, ba dɛ nyinu. Ba nyina baa dɛ nyin wechɔɡa ɛɛ ta dɔŋ dɔe. Ba neɡre nɛra baa wola cheɡɛ kiŋkiŋ Korowii waa ta dɛɛ kaa wechɔɡa ta. Ba sie dɛ beɡre kwaa taeh. Korowii taah ba!

¹⁵ Ba ɡel ŋwɛnɛtoɡre la, dɛ nyoɡre. Ba kpɔ Beɔ bie Balam o fa aa ɛ Korowii keame la ŋwɛnɛ la. O sie aa beɡre suuɡa kohona nomanta, o kpɔ ŋwɛnɛchɔɡe ta dɛ nyin suuɡa.

¹⁶ Korowii fa ɡelɔ keeɡo bol waa o be dɛ kaoh o wechɔɡa la ta. Keeɡo ɡe fe aa waa bol. Anomanta, Korowii keame nɔ ɡel o choɡla waa la.

¹⁷ He dɛ hwɛɡɛ ba nɛ aa, he hwɛɡa ta pɛɛ. Ba do kɛ nenabɔɔ nee aa wola toole o ta, dɛ do kɛ baama peu aa ir a ne aa kaa ken. Biro kpirikpirii Korowii kwaa cheɡ ba.

¹⁸ Ba nyoa wobol kan taeh, kɛ ɡɛnewaa a bwa. Ba kpɔ bwadabii pɛlchɔɡa waa ne wedoŋa nɛra sie aa dɛ lɛ a ta, dɛ neɡre nɛra dɛɛ kaa wechɔɡa ta. Nɛra baa pa mun dɛɛ le wechɔɡ-ɛɛra bini baa wola cheɡɛ kiŋkiŋ mɔɔ laanee ba neɡre dɛɛ kaa wechɔɡa ta.

¹⁹ Ba yon ŋɔ baa ɡeloo nɛra dɔ ba te, dɛ ba ɡbabir ɛ yoma. Ba wechɔɡa ɛɛ ba yoma, dɛkalkɛŋɔ wobɛlbwa aa wona lɛ nɛn liire la, a kpɔɔ berɛ yom.

²⁰ Nɛra jemɛ ya Dɔɔ waa ɛ ya Lɛɛ Yeesu Kristo waa la, dɛ won che a ta le waa aa dɛ la nɛn ne wechɔɡa ta harɛ bonɔ naa, a wer. Kɛ dɛ ba berɔ ba ɡel a ɡɛ wechɔɡa la dɔ bɔr vɔɡ ba ja aa, a te dɛ ba waa berɔ ɡbɔr dɛ ɡwaa mumpar la.

²¹ Dɛ ba fe ta Korowii ŋwɛnɛtoɡre la waa noɛ ka aa, a fe bɔ ba nɛɛ dɛ ɡwaa kɛŋɔ baa jemɛ Korowii ŋwɛnɛ la dɛ vɛh waa o ɡbaɡba aa ŋɔa báa ɛ la ɛɛ.

²² Ba waa nɔ ɡelɔ sɛɡla baa sɛɡla Korowii Tɔn bini la ɛ kasinteŋ. Ba sɛɡlɔ ŋɔ, “Nyoate uɡaa, ɡɛɛ o berɛ dia,” dɛ sɛɡle ŋɔ, “He sɔ parakoo ne aa, wɛɛ berɔɔ ka ɡbili o kpechɛɡre ta.”