2 Koranar 9 - mzwDBL

Ba chiɡ Jehu Israel kora ta

¹ Awola bɛl, Korowii keame Elaesa yerɛ Korowii keamere bane baa pɛa dɛɛ valɛ la bɛl dɛ ŋɔ o be ŋɔ, “Gbaa he batakaare kaa nyundua dɛ́ vɔwɛ kiriso, dɛ́ kpɔ noo nɔ aa lɔ loŋ nɔ bini nɔ la Ramɔt waa lɔ Gelead harɛ ta.

² He tel belaa, ɡaaɡe Jehosafat bibaa Jehu, o nabaa aa ɛ Nimsi bɔr. La o be, dɛ́ yerɔ le o bala bini he ne o jo kaa dea bini,

³ dɛ́ fuɡe noo la do o nyu ta dɛ́ ŋɔ, ‘On Korowiirii fuɡe noo dɛɛ do he nyu ta, dɛɛ cheɡe kora Israel harɛ ta.’ ” Ásɛ he ya ɡbera, dɛ chwa le warane, dɛɛ berɛ cheɡa.

⁴ Ate, Korowii keame bechala la ir, dɛ la Ramɔt Gelead.

⁵ Waa tel bela la, o na laa nomonome baa pɛa so. O yerɛ Jehu dɛ ŋɔ o be ŋɔ, “N dɔɔ, n poori n dɔ kala bɛl dɛ bol he be.” Anee Jehu bɔɔ ŋɔ, “Ya bini umeo?” O chaŋe ŋɔ, “N dɔɔ, n poori, henee.”

⁶ Asɛ Jehu ir o ne o jo dea, Korowii keame la ka fuɡe noo la do o nyu ta dɛ ŋɔ, “Korowii Israel tena aa dɛ tomɔ la ŋɔ, ‘Men Korowiirii fuɡe noo do he nyu ta, dɛɛ cheɡe kora ta n nɛra Israel tena nɛ.

⁷ A chɛ kɛ he kpo he dɔɔ Kooro Ahab luɡe nɛra, dɛ́ he ba kwaraa, ásɛ n bɔ Jɛsɛbɛl kem n keamere ne n bonɔɔna waa kpoo ba la wa.

⁸ Kooro Ahab dem nɛra ne o naanar bwa chɛ kɛ bá serewe. Mɛɛ kpo baa te bɛlbwa waa le o demii le Israel harɛ ta. Hale yoma kɛɛ nɛra baa dɛ di ba nyuune bwa.

⁹ Mɛɛ ɛ Ahab lolanaree kɛŋɔ Israel Kooro Jɛroboam, ne Ahija bibaa Kooro Baasa lolanar ken.

¹⁰ Kɛ Jɛsɛbɛl te, nyootenaa dɛɛ ba o ola dii bwɛjen Jesreel bwɛdaa ta. Nomɛlbwa aa o huɡa ba.’ ” Ate, Korowii keame la laa ɡbera ya dɛ chwa kaa.

¹¹ Jehu aa le buse dɛ la o nomondɔŋa la be la, asɛ bɛl pɛɛro ŋɔ, “Bɔkwaa choɡla te la ba he be ba ɛɔ? Wobɛlbwa maɡraa?” O chaŋ ba ŋɔ, “He ɡbabir jemɔ, dɛ jemɛ ɡɛ waa dɛ bol wa.”

¹² Anee ba ŋɔ, “Nyosone yaa jemɛ, bol ya be.” Ate Jehu ŋɔ, “Waa waa bol n be laanee nɔ, ‘Waa Korowii aa bol n be laanee kɛŋɔ, ń fuɡe noo do he nyu ta dɛ́ cheɡe kora Israel harɛ ta.’ ”

¹³ Buɡ la ta, ba ir ɛ warane, dɛ wur ba batakaani, dɛ kpɔ pa kwaa baa cheɡɛ a ta teeh dɛ jo dea la, asɛ Jehu valɛ a ta. Dɛ hoh bɛle dɛ moo ŋɔ, “Jehu di kora.”

Israel Kooro Joram kpoe

¹⁴ Anomanta, Jehosafat bibaa Kooro Jehu, o nabaa aa ɛ Nimsi la vɔrɔwe Kooro Joram vɔrɔwa dɛ ɛo dɔm. Dɛ Kooro Joram ne Israel tena bwa fa lɔ Ramɔt Gelead, ba ne Siiria Kooro Hasael ne o laa tena ɛɛ yo.

¹⁵ Kɛ dɛ Kooro Joram te berɔ ba do bwɛjen Jesreel, dɛɛ chah bol o ne Siiria Kooro Hasael laa baa dɛ yo, asɛ Siiria tena doo bol la. Belaa Kooro Jehu ŋɔ o bala la be ŋɔ, “Dɛ he ja n nɛɛ tenaa, he bɛ ɡel nomɛlbwa le bwɛɛ nɔ ta, dɛ́ ka bol waa nɔ Jesreel tena be.”

¹⁶ Ate, Kooro Jehu ka jo o torɔɡo bini dɛ kaa Jesreel. Dɛ Kooro Joram ta chɔ bela dɛɛ chah, asɛ Juda Kooro Ahasia te la bela dɛɛ la ka nao.

¹⁷ Dɛ nomɛl waa dɛ daah Jesreel cheɡɛ dejaŋ doa dɛ na Kooro Jehu ne o laa tena aa dɛ ba, asɛ o do lɔŋɔ ŋɔ kooro be ŋɔ, “N na laa tena bane aa dɛ ba.” Anee Kooro Joram ŋɔ, “Tomɛ nomɛl ó so jaaɡɔ ta dɛ́ ka bɔɔ ba ŋɔ, ‘A somaa?’ ”

¹⁸ Ate, torome la kpɔ jaaɡɔ dɛ ka bɔɔ Kooro Jehu ŋɔ, “Kooro ŋɔ n bɔɔre ŋɔ a somaa?” Kooro Jehu chaŋe ŋɔ, “Ɛrɛɛ hɛɛ nyin deŋnesɔɔhna dɛ ɛɔ? Ba kaa n habɔɔ ka che.” Nɛn waa cheɡɛ jɛŋla la doa dɛɛ daah bwɛɛ la ŋɔ kooro be ŋɔ, “Torome la tel Kooro Jehu ne o nɛra la be, kɛ o berɔ ka ja ba nɛ, waa berɛ dɛɛ ba kpa.”

¹⁹ Asɛ kooro la berɛ tomɛ torome bɛl ja o so jaaɡɔ ta, dɛ la ka bɔɔro waa la tenten. Waa tel ba be la, o ŋɔ, “Kooro ŋɔ, ‘A somaa?’ ” Ate, Kooro Jehu chaŋe ŋɔ, “Ɛrɛɛ hɛɛ nyin deŋnesɔɔhna dɛ ɛɔ? Ba kaa n habɔɔ ka che.”

²⁰ Ate, nɛn waa dɛ daah bwɛɛ la berɛ ŋɔ, “Torome la telo kɛ waa berɛ dɛɛ ba kpa. Nɛn waa tɔ ba sie baa ba la le Nimsi naa Kooro Jehu. O soɡe torɔɡo bini dɛɛ ba, dɛ le choɡla te.”

²¹ Kooro Joram ŋɔ, “Hé kpɔ torɔɡo maa vɔwa dɛɛ pɛl jaaɡɔ la vɔwɛ warane.” Baa tona la, asɛ Kooro Joram waa ɛ Israel harɛ kooro ne Juda Kooro Ahasia bɛlbwa kpɔ o torɔɡo, dɛ ka cheme Kooro Jehu. Ba kaa chemo harɛ waa ɛ Jesreel te baa yerɔ Nabɔt koo ta.

²² Kooro Joram aa na Kooro Jehu la, o bɔɔro ŋɔ, “Kooro Jehu, a somaa?” O chaŋe ŋɔ, “Ɛrɛɛ deŋnesɔɔhna ɛɛ ba wona do le nɔ? He nya Jɛsɛbɛl ɡelɔ nomɛlbwa ɛɛ tomɛ voɡa dɛɛ ɛ sɔm we-ɛɛla.”

²³ Kooro Joram laa o jaaɡɔ sie berɛ, dɛ ŋɔ Ahasia be ŋɔ, “Gel yá le bonɔ warane, o dɛ neɡre yaa.”

²⁴ Ate, Kooro Jehu laa o to ne hɛm kpɔ dɛ ta yaɡɛ Kooro Joram nyaŋ o vah ba le o tom ta, asɛ o sewɛ chɔ o torɔɡo bini.

²⁵ Kooro Jehu ŋɔ o bonɔɔ bɛl waa dɛ chao baa yerɔ Bidka be ŋɔ, “Laa Kooro Joram kpɔ ta Jesreel te Nabɔt koo nɔ ta. Lii ɡɛ saŋ n ne he fa aa soɡe torɔɡo ta, dɛ teŋɛ o mɛɛ Kooro Ahab nɛɛ la, Korowii bol o waa nɔ bil.

²⁶ ‘N na Nabɔt ne o bii kpoe nɔ wa, n ŋwɛɛrɔ kɛ mɛɛ bɔɔ a kemee ɡɛ harɛ nɔ tenten ta. Gɔɔro, dɛ́ kpɔɔ ka ta koo nɔ ta ɡɛ Korowii aa bola la.’ ”

Juda Kooro Ahasia kpoe

²⁷ Juda harɛ Kooro Ahasia aa na ɡɛ la, o chwao kpɔ o torɔɡo la, dɛ lawɛ ŋwɛnɛ bɛl waa kaa bwɛɛ bɛl baa dɛ yerɔ Bɛt Haɡan ta. Asɛ Kooro Jehu tiu dɛɛ dooɡe lɔŋɔre o laa tena la be ŋɔ, “Hé kpo o ɡe.” Ba do Kooro Ahasia bol ɡɛ saŋ waa cheɡɛ o torɔɡo la bini, asɛ jaɡre la tɛɡre torɔɡo la, dɛ chwa kpɔ ŋwɛnɛ waa kaa bwɛɛ baa dɛ yerɔ Gur, waa bɛne Ibleam. Kɛ o berɔ won teŋɛ chwa kaa bwɛjen Meɡido ta, dɛ ka sewɛ bela.

²⁸ Asɛ o bonɔɔna kpɔɔ do torɔɡo la bini, dɛ kpɔɔ kaa Jerusalam baa bera dɛɛ yerɔ Kooro Devid Bwɛjen la ta, dɛ ka huɡo o naawa lalbɔɔ bini.

²⁹ Kooro Ahab bibaa Joram aa di kora Israel harɛ ta bene fi dɛ beŋkpoŋ taa Kooro Ahasia di kora Juda harɛ ta.

Haŋkooro Jɛsɛbɛl kpoe

³⁰ Ate, Kooro Jehu la Jesreel. Jɛsɛbɛl aa no o bala waa la, o do jeemina dɛ ɛ o nyumpona a do wer. O laa dejaŋ waa soɡe o bini tokoro pili dɛɛ kpao.

³¹ Kooro Jehu aa baa tel bwɛɛ la doonyojen ta la, Jɛsɛbɛl ŋɔ, “He ba deŋnesɔɔhna ne naa? Nɛŋkpoa te bɛl le! Henee Simri waa kpo o dɔɔ la!”

³² Asɛ Kooro Jehu ha sie dɛ nao tokoro ta dɛ ŋɔ, “Umee ja n nɛɔ?” Asɛ nomonome banɛ kɛɛ batoro baa lɔ koodem bela ba fɔɡɛ ba lure baa daah kooro haahna ba sie ne harɛ dɛɛ nyiŋu.

³³ Anee Kooro Jehu ŋɔ ba be ŋɔ, “Hé lawɔ dɛ́ kpɔɔ viɡri harɛ.” Asɛ ba lawɛ Jɛsɛbɛl viɡri harɛ, o chal yaɡre danjwɛɛ ne jaɡre la, asɛ a tiɡru do harɛ.

³⁴ Asɛ Kooro Jehu jo koodem bela, dɛ ka di kwaa dɛ nyɔ sen. Dɛ ŋɔ, “Hé ka kpɔ haah baa taahno la dɛ́ ka kwaaro, o fa ɛ koobie, hé nyiŋi dɛ́ huɡo kɛrɛdɛ.”

³⁵ Baa laŋa ŋɔ ba ka kpɔɔ ka huɡe la, ba ta o bobɛlbwa nae ka ja o nyuhoɡ ne nakpahoɡa dɛ o nɔnhoɡa nɛ.

³⁶ Ate, ba la dɛ ka ŋɔ Kooro Jehu be. Asɛ o ŋɔ, “A ɛ ɡɛ Korowii aa cheɡɛ o keame Elaeja Tisbe te nɛɛ dɛ bol ŋɔ, ‘Jesreel harɛ taa nyootena ɛɛ ba Jɛsɛbɛl ola dii la ɛ kasinteŋ.

³⁷ O hoɡa ɛɛ doo kɛŋɔ bena aa chɔ puldoa ken do harɛ la ta, nomɛlbwa aa wola o jema ba.’ ”