2 Koranar 8 - mzwDBL

Sunem haah bera dɛ́ ba wa

¹ Dɛ Korowii keame Elaesa fa ŋɔ haah bɛl waa le Sunem o chum o bie seo ta la be ŋɔ, “Kpɔ he dem tena ka so bobɛlbwa haa dɛ nyin tama. Korowii ŋɔ lɔr ɛɛ chiɡ harɛ nɔ ta bonɔɔ bene anuanɛ.”

² Haah la ɛ ɡɛ Elaesa aa ŋɔa la, o ne o dem tena iro, dɛ ka so Filisti tena harɛ ta bene anuanɛ.

³ Bene anuanɛ la habɔɔ la, haah la le Filisti harɛ ta dɛ berɛ kaa Israel harɛ ta. Waa laŋa la, o la kooro be dɛ ka soŋo kɛŋɔ ó berɛ kpɔ o dem ne o harɛ tɛo.

⁴ Dɛ kooro fa bol waa Korowii keame Elaesa bonɔɔ Gehasi be ŋɔ, “Baɡ mɛ nyokpowe-ɛɛla bwa Elaesa aa ɛa.”

⁵ Gehasi aa dena dɛɛ bol kooro be ɡɛ Elaesa aa chum bibaa bɛl seo ta la, dɛ haah la Elaesa aa chum o bibaa seo ta la, deno baa soŋe kooro ŋɔ, ó berɛ kpɔ o dem ne o harɛ tɛo. Gehasi ŋɔ, “N naa kooro, haah laanee la, o bie Elaesa aa ɡela o berɛ dɔ mkpa la ɡee la.”

⁶ Asɛ kooro la pɛɛ haah la, o ŋɔ, “Kpelaa.” Anee kooro ŋɔ o nomoa bɛl be ŋɔ, “N dɛ nyin kɛŋɔ he berɛ kpɔ haah nɔ komɛlbwa, ne kwaa aa le o koo ta suuɡa bwa tɛo, dɛ le ɡɛ saŋ waa le bonɔ dɛ kaa bwa.”

Elaesa ne Siiria Kooro Bɛn Hadad

⁷ Korowii keame Elaesa la bwɛjen Damaskɔs dɛ ka na kɛŋɔ Siiria Kooro Bɛn Hadad bwara dɛ weo. Kooro Bɛn Hadad aa noa kɛŋɔ o ba bela la,

⁸ o ŋɔ Hasael waa ɛ o nomonome la bini bɛl be ŋɔ, “Kpɔ koŋkɛɛla, dɛ́ la Korowii keame la be, dɛ́ ɡel ó bɔɔ le Korowii be kɛŋɔ mɛɛ ir n weela nɔ taa yaa?”

⁹ Ate, Hasael kpɔ kondɛɛɡa bwa soo siwi baa dɛ ɛa Damaskɔs choɡ nyoɡmare fifraanaarɛ dɛ ka kɛ Elaesa. O laŋɔ dɛ ka che o sie dɛ ŋɔ, “He bonɔɔ Siiria Kooro Bɛn Hadad tom mɛ ŋɔ n bɔɔ kɛŋɔ wɛɛ ɡbaŋre o weela la taa yaa?”

¹⁰ Elaesa ŋɔ o be ŋɔ, “Ka ŋɔ o be ŋɔ wɛɛ ɡbaŋroo te, kɛ kasinteŋ, Korowii pili a bini baɡ mɛ kɛŋɔ wɛɛ sewɔɔ.”

¹¹ Asɛ Elaesa kpɔ sie pa Hasael nɛɛ dɛ nyiŋu jeiih ken, sihiih kpo Hasael. Ate, buɡ la ta, Elaesa pa mun dɛɛ wi.

¹² Anee Hasael ŋɔ, “N dɔɔ, ɛrɛɛ hɛɛ wi nɔɔ?” Elaesa ŋɔ, “N jemɛ wechɔɡa haa dɛ ba Israel tena ɛɛ. Hɛ́ɛ fuh ba bwɛjena baa ma danjwɛkpeɡa bara laanee. Dɛ́ kpoo ba bonɔɔna keri ne, dɛ́ tiɡri ba bechale nɛɛ do harɛ, dɛ́ ya ba tekpoŋra teene keri ne.”

¹³ Anee Hasael bɔɔ ŋɔ, “He bonɔɔ, n ɡee ume maa wola toole wobɛlbwa bini kɛ nyoate, ásɛ n won ɛ ɡɛ wejena nɔ dɔŋa ɔ?” Elaesa chaŋe ŋɔ, “Korowii ɡelɔ n jemɛ kɛŋɔ, henee dɛ́ chiɡ Kooro Bɛn Hadad naa ta di kora Siiria harɛ ta.”

¹⁴ Asɛ Hasael berɛ kaa Kooro Bɛn Hadad be, asɛ o pɛɛro ŋɔ, “Bɔkwa waa Elaesa bol he be nɔ?” Hasael chaŋe ŋɔ, “Dɛ hɛɛ ɡbaŋroo.”

¹⁵ Kɛ tɔ aa pera la, Hasael kpɔ yatɔɡ pweh ne, dɛ kpɔ tɔ Kooro Bɛn Hadad siebɔr asɛ o sewɛ. Asɛ o chiɡ o naa ta dɛ di kora Siiria harɛ ta.

Juda Kooro Jehoram

¹⁶ Kooro Ahab bibaa Joram aa di kora Israel harɛ ta bene anue taa Jehosafat bibaa Jehoram ba di kora Juda harɛ ta.

¹⁷ Kooro Jehoram di bene fifraatoro dɛ anɛ mɔɔ dɛ di kora, dɛ so Jerusalam di kora bene anuatoro.

¹⁸ O teŋɛ waa Israel koranar aa ɛa la ta. Dɛ o mo Kooro Ahab bihaah, anomanta, o ɛ wechɔɡa Kooro Ahab ne o dem tena aa ɛa la dɔŋa, dɛ jo Korowii nɛ.

¹⁹ Kɛ ane a bwa, dɛ Korowii koh o bonɔɔ Kooro Devid waa dɛ ŋɔ waa Juda harɛɛ chɔɡ. Dɛ Korowii baɡɛ nyoa ŋɔ Kooro Devid naanar la bini bɛlee dɛ́ di kora Jerusalam saŋ bɛlbwa dɛɛ la.

²⁰ Kooro Jehoram aa di kora saŋee Edom tena vɛh o toma, dɛ ka chiɡ ba kooro.

²¹ Belaa Kooro Jehoram kpɔ o laa sitɔɔla ne kwaa aa do kɛ torɔɡore, dɛ ka yo bwɛjen Sai tena. Edom tena la bar o ne o laa sitɔɔla baa dɛ nyiŋi kwaa aa do kɛ torɔɡore, kɛ o ne o laa tena iro dɛ ka yoo ba. Kooro Jehoram ne o laa sitɔɔla iro jwaana, dɛ jo ba baah le dɛ chwa kaa, asɛ laa tena la ɡe chwa kaa ba deremi.

²² Ba le fini, Edom tena vɛh Juda kooro toma. Gɛ saŋee bwɛjen Lebna tena ɡe vɛh o toma.

²³ Kooro Jehoram bwara waa kabora ne waa waa ɛa bwa la, ba chwera do Juda Koranar Waa Tɔne bini.

²⁴ Kooro Jehoram baa sewɛ ka pu o naawa, asɛ ba ka huɡo Jerusalam waa ɛ Kooro Devid Bwɛjen ta. Asɛ o bibaa Ahasia chiɡ o naa ta, dɛ di kora.

Juda Kooro Ahasia

²⁵ Ahab bibaa Joram aa di kora Israel harɛ bene fi dɛ anɛ ta la, a taa Jehoram bibaa Ahasia di kora Juda harɛ ta.

²⁶ Kooro Ahasia di bene fifraanɛ dɛ anɛ mɔɔ dɛ di kora. O soɡe Jerusalam di kora benanyoa beŋkpoŋ. O nya sɔne Atalia, dɛ Kooro Omri o fa aa di kora Israel harɛ ta ka la naa.

²⁷ Kooro Ahasia aa ɛ Kooro Ahab lole nomanta, o teŋɛ ŋwɛnɛ waa kpɔ o ta dɛ di kora la ta, dɛ ɛ wechɔɡa jo Korowii nɛɛ kɛŋɔ ɡɛ Kooro Ahab dem tena aa ɛa la.

²⁸ Kooro Ahasia ne Israel Kooro Joram pɛ nyoa ka yo Siiria Kooro Hasael Ramɔt Gelead. Yoi la ta la, Siiria laa tena do Kooro Joram bol.

²⁹ Anomanta, Kooro Joram laa berɛ ba bwɛjen Jesreel dɛ baa chah, asɛ Kooro Ahasia la bela dɛ ka nao o bol baa doo la wa.