2 Koranar 7 - mzwDBL

¹ Korowii keame Elaesa ŋɔ, “Hé no Korowii wa. Waa Korowii aa dɛ bol laanee kɛŋɔ, ‘Kere saŋ nɔ bɔr tenten, lakaja baa do mea o ta Samaria aa yoɡii dɔ, baa yawɔɔ suuɡapoŋ beŋkpoŋii.’ ”

² Anee nomoa waa dɛ cha kooro ŋɔ Korowii keame la be ŋɔ, “Hale Korowii ɡelɔ bwaala mun pili kohona bɛlbwa kwaraa naa, ɡɛ waa nɔ ɛɛ won maɡre aa?” Elaesa ŋɔ, “Hɛɛ nao kɛŋɔ aa chiɡuu, kɛ kondikwaa la bɛlbwa aa he nyoa jo.”

Siiria laa tena kaala wa

³ Dɛ baala banaarɛ bane weechɔɡa aa lɔ ba nɛɛ soɡe bwɛjen Samaria doonyoa. Ba ŋɔ dɔŋa be ŋɔ, “Ásɛ ya so bonɔ dɛ́ serewe aa?

⁴ Dɛ ya jo bwɛɛ nɔ ta naa, lɔr la lɔ bela, yaa serewoo. Ya soɡe bonɔ ɡe aa, yaa serewoo, he den ɡel yá kaa bela Siiria laa tena aa soɡa, dɛ́ kpɔ ya te ka do ba nɔn ta. Dɛ ba ɡel yaa aa, dɛ ya dɔ ya nyu, ba kpoo yaa ɡe aa, ya den serewe.”

⁵ Bɔr aa dɛ jo la, baala banaarɛ la leɔ dɛ kaa bela Siiria laa tena la aa soɡa la. Baa tel bela dɛ nomɛlbwa toole,

⁶ dɛkalkɛ Korowii ɡelɔ Siiria laa tena la no ɡbɔɡa kɛŋɔ torɔɡore, ne jaɡre nakpale sii dɛ laa tena damanta ɡbɔɡa kɛŋɔ baa dɛ ba ba be, asɛ ba ŋɔ dɔŋa be ŋɔ, “Hé na, Israel kooro kaa kpɔ Hiti ne Ijipt koranar ŋɔ, ba laa tena ba yo yaa.”

⁷ Gɛ aa ɛ bá dɔ ba nyuune nomanta, ba iro chwa awola jɔmɔra la ne, dɛ ɡel ba tɛnte deene ne jaɡre dɛ keeɡore, bela chɔ pɛɛ.

⁸ Baala weechɔɡa aa lɔ ba nɛɛ la aa dɛ tel bela Siiria laa tena la fa aa soɡa la, ba kaa jo tɛnte deene la bɛl bini, dɛ ka di kwaa dɛ nyɔ sen, dɛ pa suuɡapoŋa ne suuɡaswɛm ne yale dɛ kpɔ ka sɔh. Dɛ berɛ ka jo tɛnte denɛɛte bini, dɛ pa o ɡe bini laala ka sɔh.

⁹ Dɛ ŋɔ dɔŋa be ŋɔ, “Kɛrɛdɛ laa yaa ɛ la, fini ɛ amanesoma tɔpere asɛ ya ɡbo kpɔ so la. Dɛ ya ɡelɔ bɔr chaah a ta naa, yaa dɔ waa. Ya den la kooro dem dɛ́ ka bol a wa.”

¹⁰ Asɛ ba la dɛ ka yerɛ nɛra baa dɛ daah bwɛjen la doonyoone ta, dɛ bol ba be ŋɔ, “Ya la bela Siiria laa tena aa baa so la, ba kaalɔ dɛ ɡel ba tɛnte deene a che pɛɛpɛɛ. Ba jaɡre ne keeɡore ta vɔrɔwɔ che, ya ta nɛn nae, ya ta nɛn ɡbɔɡa ɡe noɛ.”

¹¹ Ate, nɛra baa dɛ daah bwɛjen la doonyoone la kpɔ takpeɡ bol waa la, asɛ nɛra baa lɔ koodem bwa ɡe no.

¹² Anee kooro la ir jwaana la ne dɛ ŋɔ o nomonome be ŋɔ, “Mɛɛ ɡeloo he jemɛ waa Siiria tena aa ɛ yaa. Ba nao kɛŋɔ lɔr chole ya nɛ, anomanta, ba le bela baa soɡa la dɛ ka sɔh kpɔɡ bini, dɛɛ lii kɛŋɔ yaa leo dɛ baa nyin kondikwa, ásɛ ba lawɛ yaa dɛ́ ba jo bwɛjen nɔ ta dɛ́ lɛ dɔɔh.”

¹³ Belaa o nomonome la bɛl ŋɔ, “Nɛra yaa lɔ bwɛjen nɔ ta lɔ bonyɛɡa ta wubwa kɛŋɔ, banɔ la baa serewa la ken. Gel ya tomɛ baala bá kpɔ jaɡre anue aa ka bwɛjen nɔ ta nɔ, dɛ́ la Siiria tena sobɔr bela ka na waa aa chiɡa.”

¹⁴ Ba le baala bane, dɛ nyin kwaa aa do kɛ torɔɡore anɛ, ne a jaɡre ŋɔ bá ti Siiria tena, asɛ kooro do baala baa dɛ ba laŋa la ŋɔ, “Hé la ka na waa aa chiɡ Siiria laa tena sobɔr bela.”

¹⁵ Ba ti ba ka tel Jɔɔdan Moo nyoa, dɛ Siiria tena pa ba yale ne ba laala ta ŋwɛnɛ ta, warane baa dɛ nyin dɛ chwa kaa nomanta. Asɛ toroma la berɛ ba dɛ ba ŋɔ kooro be.

¹⁶ Ate, nɛra le bwɛjen Samaria ta, dɛ ka kah kwaa aa lɔ bela Siiria tena aa baa so la. Ba pa kwaa kohona, a ɡel ba yoɡ lakaja baa do mea suuɡapoŋ beŋkpoŋ, ɡɛ Korowii aa ŋɔa la.

¹⁷ Dɛ Israel kooro kpɔ o laa sitɔɔla la bini bɛl waa dɛ chao ŋɔ wɛɛ nyiŋi bwɛjen la doonyojen la ta, asɛ nɛra aa wura dɛɛ le la, ba tiɡri o nɛ dɛ kpoo. Gɛ Korowii keame Elaesa faa ŋɔ kooro la be ɡɛ saŋ kooro aa la o dem la.

¹⁸ Gɛ Korowii keame la aa bola la, ɡɛɛ a chiɡ. O ŋɔ, “Kere saŋ nɔ bɔr tenten, lakaja baa do mea o ta Samaria aa yoɡii dɔ, baa yawɔ suuɡapoŋ beŋkpoŋii.”

¹⁹ Dɛ kooro nomoa waa dɛ chao la fa ŋɔ Korowii keame la be ŋɔ, “Hale Korowii ɡelɔ bwaala mun pili kohona bɛlbwa kwaraa naa, ɡɛ waa nɔ ɛɛ won maɡre aa?” Asɛ Korowii keame la fa chaŋo ŋɔ, “Hɛɛ nao kɛŋɔ aa chiɡuu, kɛ kondikwaa la bɛlbwa aa he nyoa jo.”

²⁰ Gɛ waa la tentenee puu, nɛra tiɡri o nɛɛ bwɛjen la doonyojen ta bela o sewɛ.