2 Koranar 6 - mzwDBL

Kpanfɛbii waa jaah nee sie wa

¹ Awola bɛl, Korowii keamere bane baa pɛa dɛɛ valɛ ŋɔ Elaesa waa ɛ ba sitɔɔ be ŋɔ, “Bela ya ne haa dɛ cheme la aa kanɛ.

² Gel ya kaa Jɔɔdan Moo ta, daa lɔ bela, ya ka teŋe dɛ́ kpɔ kwaa bɔr dɛ́ so bela.” Asɛ o ŋɔ, “Hé kaa.”

³ Ba bini bɛl ŋɔ Elaesa be ŋɔ, “N dɔɔ, n poori ba ja ya nɛɛ ya kaa,” asɛ o sɛh

⁴ ba bwa kaa. Baa tel Jɔɔdan Moo ta la, ba pa mun teŋni daa la.

⁵ Ba bini bɛl kpanfɛbii fomo le nee bini, asɛ o do lɔŋɔ ŋɔ, “N dɔɔ, nomɛl konee n ka kemɛ, ɛrɛɛ mɛɛ ba ɛɛ yɔ?”

⁶ Anee Korowii keame Elaesa ŋɔ, “Leperaa o leo?” Asɛ o baɡlo, Elaesa teŋe daa dɛ kpɔ ta bela, asɛ kpanfɛ la le jaah.

⁷ Elaesa ŋɔ, “Laa kpɔ.” Asɛ baa la ha nɔn, dɛ laa kpɔ.

Siiria laa tena nɛɛ pɔe wa

⁸ Dɛ laa chɔ Siiria kooro ne Israel tena baah. Siiria kooro ŋɔ o laa nomonome be, asɛ ba le bobɛl baa kpɔ ba laa tena ka so cheɡ.

⁹ Asɛ Korowii keame Elaesa tomɛ ba ka ŋɔ Israel kooro be ŋɔ, ó nyiŋi kɛrɛdɛ dɛ bɛ ɡel Israel tena la kpɔ bela, dɛkalkɛ Siiria kooro ne o laa tena soɡe bela.

¹⁰ Anee Israel kooro pese bela Korowii keame la aa ŋɔa la. Dɛ saŋ bɛlbwaa Elaesa teŋɛ dɛɛ bol ɡɛ bɔra la waa Israel kooro be, asɛ wɛɛ do a waa dɛɛɡɔ.

¹¹ Siiria kooro baa na waa aa dɛ chiɡ, asɛ o baah di kohona o yerɛ o laa nomonome cheme dɛ bɔɔ ba ŋɔ, “He bini umee kpɔ ya waa kaa taa Israel kooro be nɔ?”

¹² Ba bini bɛl ŋɔ, “N naa kooro, ya bini bɛlbwa laa. Korowii keame Elaesa waa lɔ Israel laanee. Onee dɛɛ no wobɛlbwa haa dɛ bol, dɛ́ ka bol Israel kooro be. Hale waa haa sɔh so he dea dɛ́ bol bwa.”

¹³ Kooro la ŋɔ, “Hé nyin bela waa lole, mɛɛ ɡeloo ba ka lawɔ ba.” Asɛ ba no kɛŋɔ o lɔ bwɛjen Dotan.

¹⁴ Belaa kooro tomɛ laa tena baa wara, dɛ tɛɛ ba jaɡre ne kwaa aa do kɛ torɔɡore bela. Ba leɔ jwaana dɛ ka bar bwɛjen la cheme.

¹⁵ Tɔ aa pera chɔmbibi la, Korowii keame Elaesa bonɔɔ iro dɛɛ le buse dɛ na kɛŋɔ, laa tena kpɔ jaɡre dɛ kwaa aa do kɛ torɔɡore bar bwɛjen la cheme. Anee o ka ŋɔ o dɔɔ be ŋɔ, “N dɔɔ, akwe! Ya na wa. Ɛrɛɛ yaa ba ɛɛ yɔ?”

¹⁶ O chaŋe ŋɔ, “Dɛɛ berɛ ɔma, ya dɔ laa tena ba warɛ ɡwaa ba kwa.”

¹⁷ Belaa Elaesa soŋe Korowii ŋɔ, “N Naa Korowii, pili o sie ó won dɛɛ na.” Asɛ Korowii ɡel bonɔɔ la sie pili, o na kɛŋɔ jaɡre ne kwaa aa do kɛ torɔɡore, ne niirare su deŋɡarere la ta dɛ bar Elaesa.

¹⁸ Siiria laa tena la aa dɛ tel Elaesa be la, o soŋe ŋɔ, “N Naa Korowii, ɡel baala nɔ nyoŋe, ba bɛ won na bela baa dɛ kaa.” Asɛ a ɛ ɡɛ.

¹⁹ Anee Elaesa ŋɔ ba be ŋɔ, “He koni ŋwɛnɛ, bwɛjen haa dɛ kaa o ta la laa nɔ. Hé teŋɛ n nɛ, ń la he ne nɛn haa dɛ nyinu la be.” Asɛ o tɔ ba sie dɛ kaa ba ne bwɛjen Samaria.

²⁰ Baa dena jo bwɛjen Samaria la, Elaesa soŋe ŋɔ, “N Naa Korowii, ɡel ba berɛ dɛɛ na.” Asɛ Korowii no o wesoŋa dɛ pili ba sie, ba na kɛŋɔ ba cheɡɛ Samaria fɔɡbaah.

²¹ Israel kooro aa na ba la, o bɔɔ Elaesa ŋɔ, “N dɔɔ, ń kpoo ba kɛɛ?”

²² Elaesa ŋɔ, “Akai, he yo nɛra laa dɛ laɡ ba aa, he dɛ kpoo ba aa? Tɛɛ ba kondikwaa ne nee bá nyɔ, dɛ́ berɛ tɛɛ ba ŋwɛnɛ ba kaa ba dɔɔ be.”

²³ Anomanta, kooro ɡelɔ ba ɛ kondikonjena tɛɛ ba ba di, o tɛɛ ba nee ne sen ba nyɔ. Dɛ ta ba ŋwɛnɛ ba kaa ba dɔɔ be. Le bela dɛɛ kaa la, a biɡro Siiria laa tena ta Israel harɛ ta balɛ dɛ ba lɔ tɔ ba nɛɛ kpa.

Laa tena baa kaa chɔ bar bwɛjen Samaria

²⁴ A habɔɔ la, Siiria Kooro Bɛn Hadad kpɔ o laa tena bwa ba ka yo Israel tena, dɛ ka chɔ bar bwɛjen Samaria tena ɡe.

²⁵ Baa tɔ Samaria tena do la ɡelɔ lɔr chole Samaria, asɛ ba yoɡ keeɡo nyu suuɡapoŋa fifraanuatoro. Dɛ yoɡ kweah bena lakaja del suuɡapoŋa anue.

²⁶ Awola bɛl, dɛ Israel kooro dɛ valɛ Samaria danjwɛɛ baa maa baro doa, asɛ haah bɛl do lɔŋɔ o be ŋɔ, “N naa kooro, n poori cha mɛ!”

²⁷ O chaŋe ŋɔ, “Dɛ Korowii ta hen chae yaa, bɔkwaa mɛɛ ba wona ɛɔ? N ta mea kɛɛ sen dɔe dɛ́ chae.”

²⁸ Kooro la berɛ bɔɔ haah la ŋɔ, “Bɔkwa waa dɛɛ hae nɔ?” Haah la ŋɔ, “Awola bɛl, n dɔŋ nɔ ŋɔ n be ŋɔ yá lawɛ n bie chwe, ásɛ tɔɔ peraa, yá lawɛ o ɡe kon.”

²⁹ N sɛoh ya daa n kon la chwe, asɛ tɔ aa pera la n la dɛ ka ŋɔ ó ɡel ya kpo o kon la chwe, asɛ o lawɔ sɔh.

³⁰ Kooro la aa no ɡɛ haah la aa bola la, o laa o batakaare kɛɛ, a baɡle kɛ a we o nɛ. Kooro la aa dɛ valɛ danjwɛɛ la doa la, nɛra nao kɛŋɔ waa tɔ lweyal do o batakaare lɔɡa, aa baɡle kɛŋɔ o lɔ lwe ta.

³¹ A habɔɔ, kooro la ŋwɛɛ ŋɔ, “Dɛ n ta Safat bibaa Elaesa nyu teŋe fini naa, Korowii kpo mɛ!”

³² Asɛ o tomɛ ŋɔ bá ka yerɛ Elaesa ba, dɛ o lɔ o dem Israel nomonome so o be. Torome la aa wola tele mɔɔ la, Elaesa ŋɔ nomonome la be ŋɔ, “He ta nae kɛŋɔ nɛn waa dɛ kpoo nɛra nɔ aa tomɛ nɛn ŋɔ ó ba kpo mɛ naa? Dɛ torome la balaa, hé laa ɡbera tɔ dɛ bɛ ɡel o dɔ bɔr jo. O dɔɔ kooro nakpale sio teŋɛ o nɛɛ wɛɛ ba.”

³³ Elaesa ne ba ta aa dɛ bol waa la, dɛ kooro la dɛ tel o be dɛ ŋɔ, “Korowiirii ɡela wechɔɡa nɔ ba, n berɛ kpa Korowii ka tel saŋ besoo jaɔ?”