2 Koranar 5 - mzwDBL

Naaman wee chaeh wa

¹ Dɛ baa bɛl lole baa yerɔ Naaman. Dɛ onee Siiria kooro laa sitɔɔ. Dɛ o ɛ nɛnjen asɛ o dɔɔ kooro ɛɛ duuru kohona. Dɛkalkɛ a cheɡɛ o nɛ Korowii cha ba, dɛ ɡel ba pɔ ba dɔma nɛ. Kɛ dɛ wee lɔ Naaman nɛ.

² Dɛ Siiria laa tena boa nyoa ka yo dɛ lawɛ Israel bitolo bɛl laa ta, o do Naaman haah sie.

³ Awola bɛl, bitolo la ŋɔ o nya la be ŋɔ, “N dɛ nyin kɛ n dɔɔ fe aa la Korowii keame bɛl waa lɔ Samaria be! O fe ɛɛ chaoh o wee nɔ kaa.”

⁴ Ate, Naaman ka bol kooro be ɡɛ Israel harɛ ta tolo la aa bola la.

⁵ Kooro la ŋɔ, “Ir, mɛɛ chwerɛ tɔnee tɛɛ he kpɔ ka tɛ Israel kooro.” Ate, Naaman ir kpɔ suuɡapoŋa a tɔɡre aa ɛ kilore lafraatoro fifraanaarɛ, ne suuɡaswɛm kaɡboŋa anumɛl, dɛ yadɛɛɡa bele fi.

⁶ Waa aa lɔ tɔn Siiria kooro aa chwera ba kpɔ ka tɛ Israel kooro laanee kɛŋɔ, “Menee dɛɛ tomɛ n bonɔɔ Naaman tɔn nɔ ne, kɛŋɔ wee lɔ o nɛ hé chaoh.”

⁷ Israel kooro aa cha tɔn la nyoa dɛ kure la, o kɛɛ o batakaare a baɡle kɛ o liire chɔɡɔ, dɛ ŋɔ, “Na Siiria kooro aa dɛ nyin n ne waa ɡɛ! Korowiirii men n dɔ mkpa ne seo kpeɡri, he ŋɔ n chah baa nɔ naa? A ɛ kasinteŋ kɛŋɔ o dɛ nyin mɛ naɡra!”

⁸ Korowii keame Elaesa aa noa kɛŋɔ Israel kooro laa o batakaare kɛɛ la, o tomɔ ba ka pɛɛro ŋɔ, “Bɔkwa waa bala he laa he batakaare kɛɛ? Tomɛ Naaman ó ba n be, ásɛ n baɡlo kɛŋɔ Korowii keame bɛl lɔ Israel harɛ ta.”

⁹ Naaman kpɔ o jaɡre ne o torɔɡore baa vɔwa pɛl jaɡre, dɛ ir la Elaesa be dɛ ka che o dem doonyoa.

¹⁰ Elaesa tomɛ o bonɔɔna la bini bɛl o be dɛ ka ŋɔ o be ŋɔ, “Ir la ka sɔ Jɔɔdan Moo kera anuanɛ, wee la ɛɛ le he nɛɛ he bwara berɛ kwaa kɛrɛdɛ.”

¹¹ Ate, Naaman baah di o laa berɛ dɛɛ naɡre waa ŋɔ, “N te dɛ lii kɛŋɔ wɛɛ leo dɛ́ ba soŋe Korowii waa dɛ tomɔ, dɛ́ kpɔ o nɔn viwe wee la ta dɛ́ chaah mɛ.

¹² Anɔ bwa habɔɔ, bwɛjen Damaskɔs Mojena Abana ne Faapar laa wera Israel harɛ ta neerare bwa ta, ń fee ka sɔ n bwara kwaa raa?” Anomanta, o laa berɛ bandia ne dɛ kaa.

¹³ Belaa Naaman bonɔɔna suuh tel o jwɛh dɛ ŋɔ, “Nomoa, dɛ wejena anee Korowii keame la ŋɔ he be ŋɔ he ɛ aa, he fe aa sɛh aa? Ɛrɛɛ haa wola won ka sɔ nee la ɡɛ waa bola la, ásɛ dɛ dɔ chaah nɔɔ?”

¹⁴ Anomanta, Naaman iro dɛ ka jo Jɔɔdan Moo la bini, dɛ sɔ kera anuanɛ ɡɛ Korowii keame la aa ŋɔ o be la, asɛ o bwara berɛ kwaa dɛ do wer kɛrɛdɛ kɛŋɔ bechala bwara ken.

¹⁵ Naaman ne o bonɔɔna la bwa berɔ ba Korowii keame Elaesa be, asɛ Naaman ka che o sie dɛ ŋɔ, “N nao kɛŋɔ Korowii bɛlbwa toole harɛ nɔ ta bobɛlbwa ka ja Israel harɛ ta. N dɔɔ, n poori lɛ koŋkɛɛla he bonɔɔ aa ba a ne ba tɛɛ nɔ.”

¹⁶ Belaa Elaesa chaŋe ŋɔ, “N ŋwɛɛ Korowii waa lole mɛɛ tomɔ kɛŋɔ, maa komɛlbwaa lɛ.” Naaman cheɡɛ o nɛɛ nɔ bwa o vɛh.

¹⁷ Ate, Naaman ŋɔ, “Dɛ haa komɛlbwaa lɛ tenaa, amɔ tɛ men he bonɔɔ ŋwɛnɛ n ɛ bonɔ teera keeɡore anɛ aa dɛ ba wona che kaa dem. Maa kwaa kpoo fuh ɛ saraha tɛ voɡ bɛlbwa kpa atane Korowii ɡbo.

¹⁸ Kɛ kombeŋkpoŋ maa dɛ soŋe Korowii kɛŋɔ, dɛ n ne n dɔɔ kooro kaa jo Siiria harɛ voɡ Remɔn dea dɛ ɡuŋu harɛ naa, ó kpɔ kɛ mɛ.”

¹⁹ Anee Elaesa ŋɔ o be ŋɔ, “Kpɔ deŋnesɔɔhna kaa.” Asɛ Naaman kaa, waa tel sie tama la,

²⁰ Korowii keame Elaesa bonɔɔ Gehasi lii dɛ ŋɔ, “N dɔɔ kpɔ Siiria te Naaman nɔ bwara kɛo, o ta koŋkɛɛla waa ba a ne bɛlbwa lɛɛ. N ŋwɛɛ Korowii waa lole kɛŋɔ mɛɛ chwao tiu dɛ́ ka lɛ komɛl le o be.”

²¹ Ate, Gehasi chwa tiu, Naaman aa naa kɛŋɔ nomɛl chwao teŋɛ o nɛɛ la, o tuo le torɔɡo la bini dɛɛ chemo, dɛ bɔɔro ŋɔ, “A som aa?”

²² Gehasi ŋɔ, “A som, n dɔɔree tom mɛ he be ŋɔ Korowii keamere baa pɛa dɛɛ valɛ banɛ bane le Efrem deŋɡarere harɛ ta dɛ ba o be taraken. Dɛ he tɛo suuɡapoŋa a tɔɡre aa ɛ kilore fifraatoro dɛ anaarɛ ne yadɛɛɡa bele anɛ.”

²³ Ate, Naaman ŋɔ, “Lɛ suuɡapoŋa a tɔɡre aa ɛ kilore fifraanumɛl dɛ anuatoro,” dɛ kpɔ do pure anɛ bini ja yadɛɛɡa bele anɛ ta dɛ tɛ Gehasi o lɛ. Dɛ ɡel o bonɔɔna banɛ kpɔ che tɔ Gehasi sie.

²⁴ Ba tel deŋɡare harɛ ta bela Elaesa aa soɡa la, asɛ Gehasi lɛ kwaa la dɛ kpɔ ka bil dea, dɛ ɡel bonɔɔna la laa berɛ kaa.

²⁵ Ate, Gehasi berɛ la ka che o dɔɔ Elaesa sie. Elaesa bɔɔro ŋɔ, “Leperaa he leɔ?” Gehasi ŋɔ, “N dɔɔ, n ta bobɛlbwa laŋɛ.”

²⁶ Elaesa ŋɔ, “Haa jemɛ kɛŋɔ ɡɛ saŋ Naaman aa le o torɔɡo bini, dɛ ba cheme he ne wɛɛ bol waa la, dɛ n lɔ bela n doma ja he nɛɛ kɛɛ? Saŋ ta tele kɛ he lɛ suuɡa kɛɛ yale ne ɔleve ne daa kooni, ne kooni ne peera, dɛ nae kɛɛ bonɔɔna ne toli.

²⁷ Gɛ haa ɛa nɔ nomanta, wee a fa aa lɔ Naaman nɛɛ la ɛɛ ba he ne he naanar nɛɛ saŋ bɛlbwa dɛɛ la.” Asɛ Gehasi le Elaesa be kaa, dɛ wee lawɛ o bwa dɛ to kɛŋɔ yabi ken.