2 Koranar 25 - mzwDBL

Jerusalam paɡra wa

¹ Kooro Sedekia aa di kora bene anuanaarɛ, korobie fi tɔpera fi ta la, Babelɔn Kooro Nebukadnesa kpɔ o laa tena bwa kaa Jerusalam, dɛ ka yoo ba. Ba baŋre ba tɛnte deene bwɛɛ la dahare, dɛ ma kwaa sawɛ bwɛjen la danjwɛɛ baa che a ta teeh jo o bini.

² Ba teŋɔ tɔ bwɛɛ la tena do, ka tel Kooro Sedekia aa di kora bene fi dɛ beŋkpoŋ ta.

³ A ɡɛ benanyoa la korobinaarɛ tɔpenuanaarɛ ta, dɛ lɔr o nyoa aa do kpeɡri kohona chole bwɛjen Jerusalam, kondikwaa toole nɛra di.

⁴ Babelɔn laa tena la kuuɡi danjwɛɛ waa bar Jerusalam la. Kooro Sedekia ne Jerusalam laa tena kpɔ doonyoa bɛl waa chɔ danjwɛɛre anɛ baah ta, ba kpɔ bela dɛɛ kaa kooro bodɛɛɡe waa du daa ta, dɛ le kpɔ sie chaɡɛ kaa Jɔɔdan Fɛlembɔjen ta jwaana,

⁵ kɛ Babelɔn laa tena la ti Kooro Sedekia, dɛ ka lawɔ Jeriko harɛ waa chɔa kaa ta, asɛ o laa tena bwa chwa ɡelo.

⁶ Ba lawɔ kaa bwɛjen Ribla ka tɛ Babelɔn Kooro Nebukadnesa o ka bol o waa dɛ pao bolchɔɡe.

⁷ Ba kpoo Kooro Sedekia bibaala o siwi ta, dɛ foromi o ɡe sibie, dɛ doo ayaawa jɔɡrɔre, dɛ kpɔɔ kaa Babelɔn.

Korowii Dea chɔɡa wa

⁸ Babelɔn Kooro Nebukadnesa aa di kora bene fi dɛ anuanaarɛ, korobie anue tɔpera anuanɛ ta la, o laa sitɔɔ Nebusaradan la Jerusalam.

⁹ O kaa fuh Korowii Dea ne koodem, dɛ Jerusalam deremi bwa. O fuh nomonjena dedɛɛɡe te bɛlbwa,

¹⁰ asɛ Babelɔn laa tena Nebusaradan aa chɔ ba nyoa la kuuɡi danjwɛɛ waa bar Jerusalam la.

¹¹ Laa sitɔɔ Nebusaradan lawɛ nɛra baa ka bwɛjen la ta, ne tom-ɛɛra, dɛ banɔ la baa le Kooro Sedekia habɔɔ, dɛ ka teŋɛ Kooro Nebukadnesa nɛɛ la bwa kaa Babelɔn harɛ ta.

¹² Kɛ o ɡel nyaara baa lɔ Juda harɛ la bane ŋɔ baa ɛ toma daa kooni ne kooni aa lɔ bela la ta.

¹³ Babelɔn laa tena la kuuɡi ayaawa pilare ne kwaa aa dɔ nakpale baa taɡa a do Korowii Dea, dɛ ayaawa loɡ baa dɛ yerɔ Mpo la, dɛ kpɔ a bwa kaa Babelɔn harɛ ta.

¹⁴ Dɛ berɛ pa viine ne soofire ne kwaa baa pa tɔɔ dɛɛ do a bini, ne kwaa baa kpɔa dɛɛ menɛ kandea ŋwɛɛra, ne loɡa baa kpɔa dɛɛ chaɡɛ kwaa baa dɛ kpoo chale, ne loɡa baa dɛ fuh daawiile a bini, dɛ ayaawa kwaa bwa soo siwi baa kpɔa dɛɛ ɛ toma Korowii Dea bwa kaa.

¹⁵ Laa sitɔɔ la kpɔ kwaa baa kpɔa dɛɛ buh nii, ne loɡa baa do nee kɛɛ chal a bini dɛ ɛ dɛɛ merɛ la, komɛlbwa baa kpɔ suuɡaswɛm tenten ne suuɡapoŋ ɛa te, ba kaa a bwa ne.

¹⁶ Ayaawa aa lɔ pilare anɛ la ta, ne kwaa aa dɔ nakpale baa taɡa, ne loɡbajen baa dɛ yerɔ Mpo Kooro Solomɔn ɛa cheɡ Korowii Dea la, a kan kohona kɛŋɔ ba won maɡɛ a tɔɡre.

¹⁷ Pilare anɛ la le dɔŋa, bɛlbwa jaŋne dɛ́ kaa nyundua lɔ naɡale fifraanɛ dɛ anuanɛ, asɛ ayaawa baa kpɔa ɛ a tɔɡre la, ɡe jaŋne dɛ́ kaa nyundua ɛɛ ɛ naɡale anaarɛ ne tama. Asɛ ba kpɔ ayaawa ɛ kafola a do ɡuleɡule kɛŋɔ, daa nɔna ane baa dɛ yera pɔmeɡranet ken, dawɛ pila la bɛlbwa doa dɛ bar.

Juda tena lawa dɛ́ kaa Babelɔn harɛ ta

¹⁸ Laa sitɔɔ Nebusaradan lawɛ Sɔfonomoa Seraya ne o dɔŋ Sefania o ɡe aa dɛ chao, dɛ nomonome batoro bane baa dɛ daah doonyoa la laa ta kaa.

¹⁹ Ba bini banɔ la baa ka bwɛjen la bini la, o lawɛ nomoa waa chɔ laa tena nyoa, ne nɛra banue baa dɛ ja kooro la. Dɛ lawɛ laa nomoa la nɛn waa dɛ chao dɛ chwerɛ waa dɛɛ bil, dɛ laa tena fifraanumɛl baa jaa dɛ do bwɛɛ la bini.

²⁰ Babelɔn laa sitɔɔ Nebusaradan kpɔ ba bwa kaa bwɛjen Ribla ka tɛ Babelɔn koojen.

²¹ Ribla waa lɔ Hamat harɛ taa Babelɔn kooro ɡel ba kpoo ba bela. Gɛɛ a do ba lawɛ Juda tena le ba harɛ ta, dɛ kaa ba ne bojaŋ harɛfale ta.

Gedalia ɛ Juda harɛ nomoa

²² Babelɔn Kooro Nebukadnesa le Ahikam bibaa Gedalia ŋɔ wɛɛ nyiŋi nɛra baa ka Juda harɛ la nɛ. Ahikam ɡe mɛɛ Safan.

²³ Juda laa nomonome la bwa ne ba laa tena baa wola ban lawɛ kaa la aa noa kɛŋɔ Babelɔn kooro le Gedalia o ɛ ba harɛ nomoa la, ba la o be Mispa. Banee Nɛtanea bibaa Ismael, ne Karea bibaa Johanan, ne Tanhumet bibaa Seraya, o ɛ Nɛtɔfa te. Dɛ Jaasania, waa ɛ Maaka te bɛl bie, dɛ ba bala.

²⁴ Belaa Gedalia ŋwɛɛ ntam baɡ ba ŋɔ, “Hɛɛ berɛ Babelɔn nomonome nɔ ɔma, hé so bonɔ dɛɛ tomɛ Babelɔn kooro, aa chiɡ heyaa kɛrɛdɛɛ.”

²⁵ Korobie anuanɛ ta la, Nɛtanea bibaa Ismael, waa ɛ koobie, iro dɛ lawɛ baala fi ja o nɛɛ ba la Gedalia be Mispa, dɛ ka kpoo o ne Juda ne Babelɔn tena baa lɔ bela. Ismael nabaa sɔne Elisama.

²⁶ Aa ba ɡɛ la, Juda tena nyaara ne kpeɡnɛra bwa, dɛ ba laa nomonome la chwao kaa Ijipt harɛ ta, dɛkalkɛ ba dɛ ɔmɛ Babelɔn tena.

Ba le Kooro Jehoiachin dea

²⁷ Baa lawɛ Juda Kooro Jehoiachin laa ta kaa Babelɔn harɛ bene fifraatoro dɛ anuanɛ la, ɡɛ saŋee Babelɔn Kooro Evil Mɛrɔdak di kora. O tɛ ŋwɛnɛ dɛ ɡel ba le Kooro Jehoiachin dea korobie fi dɛ anɛ, tɔpera fifraanɛ dɛ anuanɛ ta.

²⁸ Kooro Evil Mɛrɔdak bol wobodɛɛɡa tɛ Kooro Jehoiachin, dɛ tɛo jirima ɡwaa koranar baa ja o nɛɛ ba laɡ ba kaa bojaŋ harɛ ta Babelɔn bela la bwa.

²⁹ Anomanta, Kooro Jehoiachin dɔ ŋwɛnɛ dɛ laa laala waa doa ba doo dea la foo bil, dɛ kpɔ anfala do, asɛ o ne Babelɔn kooro pɛ nɔn dɛɛ di kwa o soɡa bini bwa.

³⁰ Kooro Jehoiachin soɡa bini bwa la, dɛ Babelɔn Kooro Evil Mɛrɔdak dɛ tɛo suuɡa waa kpɔ yawɛ kwaa aa hiaoh.