2 Koranar 23 - mzwDBL

Kooro Josia chɔɡ voɡtoroma

¹ Asɛ Kooro Josia yerɛ Juda ne Jerusalam nomonome bwa cheme.

² O ne Juda baala ne Jerusalam tena, ne sɔfore ne Korowii keamere, le bechale nɛɛ ba kaa nomonjena bwa nɛɛ ba la Korowii Dea. Asɛ o ɡel ba kure Korowii Ne Nɛwɛnyina Fɔo Tɔn waa nyoɡra ba nao Korowii Dea la, asɛ ba bwa no.

³ Kooro Josia cheɡɛ o koochebɔr pila bɛl jwɛh, o ne Korowii berɛ kwaa fɔwɛ fɔo ŋɔ wɛɛ teŋɛ Korowii nɛɛ, dɛɛ teŋɛ waa waa bola ne o Mmarare ta o bambile ne o liire bwa ne, ɡɛ tɔn la bini fɔo waa la aa dɛ baɡle la. Asɛ nɛra la bwa baɡɛ nyoa kɛŋɔ baa dɛɛ teŋɛ fɔo la taa.

⁴ Kooro Josia ɡelɔ Sɔfonomoa Hilkia ne sɔfore baa ja o nɛ, ne nɛra baa dɛ che Korowii Dea la doonyoa la laa kwaa baa ɛa tɛ voɡ Baal, ne voɡ Asera ne kwaa aa lɔ nyundua a do Korowii Dea la laa pa le. Kooro la fuah bwɛjen la dahare Kedrɔn fɛlembɔjen jwɛh, dɛ pa a tɔɔ la kaa Bɛtel.

⁵ O ir kerekpoŋra Juda koranar aa cheɡ ba baa fuh konsɔɔhsoma deŋɡarere aa lɔ Juda harɛ ne bwɛɛre aa bar Jerusalam bwa ta, dɛɛ tɛ voɡ Baal ne wee ne korobie ne weweela, dɛ kwaa aa lɔ nyundua bwa.

⁶ Dɛ fuɡri voɡ Asera dajaŋa le Korowii Dea, dɛ kpɔ le Jerusalam dahare, dɛ ka fuah Kedrɔn Fɛlembɔjen ta o ɛ mohooh ken, dɛ pa ka ta nɛra ŋwama ta.

⁷ Kooro Josia ɡelɔ ba kuuɡi voɡ Asera dea baala aa lɔ a bini dɛɛ bɔ jwamane ba mao o do Korowii Dea la bɔr la. Dɛ belaa haahna so, dɛ sɔh laala tɛ nɛra ba kpɔ dɛɛ tomɛ Asera voɡ.

⁸ Kooro la ɡelɔ ba ka kpɔ sɔfore baa lɔ Juda harɛ bwɛjena ta ba Jerusalam, dɛ kuuɡi voɡare baa dɛ fuh konsɔɔhsoma a ta, le Geba kaa Beɛseeba. O ɡelɔ ba chɔɡ voɡa aa lɔ doonyoo la ta, doonyoa bɛl baa dɛ yerɔ Josua Doonyoa la ɡal bɔr. Dɛ ɡɛ Josua la ɛ bwɛjen la nomonjen.

⁹ Kerekpoŋra baa dɛ ɛ toma voɡare ta la ta ŋwɛnɛ dɔe dɛ́ ɛ saraha Korowii saraha kon waa lɔ Jerusalam la ta. Kɛ dɛ ba ne ba bala baa dɛ ɛ toma Korowii Dea won paanoo iisi aa wola toole a ta dii.

¹⁰ Kooro Josia ɡelɔ nɛra la Henɔm Fɛlembɔjen ta, dɛ ka paɡre kon baa dɛ ɛ saraha o ta baa yerɔ Tɔfɛt la. Gɛ aa ɛ ásɛ nɛra bɛ won kpɔ ba bibaala kɛɛ ba bihaahna ɛ sarahare dɛ́ fuuh ba dɛɛ tɛ voɡ Molɛk kpa.

¹¹ O berɔ laa jaɡre ane baa mwɛɛ bune ane soo siwi ɛa Juda harɛ dɛ kpɔ dɛɛ tomɛ wee la le Korowii Dea la doonyoa. Dɛ Juda koranaree fa ɛa dɛ kpɔ tɛ voɡa. O ɡelɔ ba fuh kwaa aa do kɛ torɔɡore ba kpɔ dɛɛ tomɛ la. Dɛ ba kpɔa ka bɛne dea nomoa bɛl baa dɛ yerɔ Netan Mɛlɛk bela o fa aa soɡa bini.

¹² O ɡelɔ ba paɡre Juda koranar kwaa baa dɛ ɛ saraha a ta Kooro Ahas abrɔsane doa, ne ane Kooro Manasɛ ɡe aa kwaara a do Korowii Dea dembaahna anɛ ta. Dɛ paɡra a do mohooh ken ka ta Kedrɔn Fɛlembɔjen ta.

¹³ Kooro Josia chɔɡ saraha kwaa Kooro Solomɔn aa maa cheɡ Jerusalam wee leebɔr, ne Ɔlevere Bwejen weekaŋle harɛbɔr baa tomɛ voɡhaah Astɔrɛt, Sidon tena aa dɛ tomɛ, dɛ Moab tena voɡ Kemɔs, dɛ Amɔn tena voɡ Molɛk a bwa aa ɛ kii kwaa la.

¹⁴ Kooro Josia ɡelɔ ba paɡre bwea baa paaɡa dɛɛ duura, dɛ kuuɡi voɡ Asera dajaŋa ta, dɛ pa nɛra hoɡa bil a buɡ ta.

¹⁵ O berɔ ɡel ba paɡre kon baa dɛ ɛ saraha dɛɛ tomɛ voɡa a ta, Nɛbat bie Kooro Jɛroboam aa ɛa Bɛtel la. Kooro Jɛroboam ɡelɔ Israel tena ɛ wechɔɡa dɛ jo Korowii nɛ, hale Kooro Josia paɡre kon baa dɛ ɛ saraha o ta, dɛ fuh bela baa dɛ tomɛ voɡa a ɛ mohooh kɛŋɔ bomboɡ ken, dɛ fuh voɡ Asera dajaŋ ɡe.

¹⁶ Kooro Josia nyiŋo, dɛ na ŋwama ane deŋɡare bɛl ta. Asɛ o ɡel ba huɡri hoɡa la, dɛ fuah kon voɡtoroma aa dɛ ɛ saraha o ta la ta. Gɛɛ o ɛ dɛ kpɔ doŋa kaoh, asɛ waa Korowii keame la fa aa tɔ sie bol ba tɔpejen bɛl dii, ɡɛ saŋ Kooro Jɛroboam aa cheɡɛ saraha kon jwɛh la ɛ kasinteŋ.

¹⁷ Kooro Josia ŋɔ, “Ume ŋwamee ka lɔ le nɔɔ?” Asɛ nɛra baa lɔ bwɛjen Bɛtel ta la ŋɔ, “Korowii keame waa le Juda, dɛ ba bol waa haa ɛ saraha kon nɔ ta la ŋwamee.”

¹⁸ Kooro Josia ŋɔ, “Hé ɡel ŋwam la, nomɛlbwa bɛ o hoɡa la huɡri.” Asɛ ba ta o ne Korowii keame waa le Samaria la hoɡa huɡre.

¹⁹ Gɛ waa ɛ Bɛtel la, Kooro Josia paɡre kwaa baa dɛ ɛ voɡa sarahare a ta aa lɔ Samaria bwɛɛre ta, dɛ kpɔ doŋa kaah, Israel koranar aa maa dɛ kpɔ ir Korowii bandia kohona la.

²⁰ Kooro Josia kpoo kerekpoŋra baa soɡe voɡa la ta bwa, dɛ fuh nɛra hoɡa saraha kwaa la ta, dɛ laa berɛ kaa Jerusalam.

Kooro Josia Galekaa Tɔpejen Dii

²¹ Kooro Josia do harɛ la ta bwa nɛra ŋɔ, “Hé di Galekaa Tɔpejen la Korowii haa dɛ tomɔ sɔn ta, ɡɛ baa chwera do Korowii Ne Nɛwɛnyina Fɔo Tɔn bini la.”

²² Dɛ Israel koranar kɛɛ Juda koranar bɛlbwa ta Galekaa Tɔpejen bɛlbwa waa do ken dii bwa, le ɡɛ saŋ koranar aa wola toole, asɛ sitɔɔla yon tɔ Israel tena sie dɛɛ nyiŋi ba waa bini la.

²³ Kɛ a bwa habɔɔ la, Kooro Josia aa di kora bene fi dɛ anuatoro taa ba di ɡɛ Galekaa Tɔpejen nɔ Jerusalam.

Kooro Josia wefala ane ɡe ja

²⁴ Waa aa jaa laanee kɛŋɔ, Kooro Josia le nɛra baa dɛ yerɛ lala, ne tɛɛɡa tena ne deremi voɡa, dɛ voɡa baa ɛa cheɡ, dɛ kii kwaa waa naa Juda harɛ ta ne Jerusalam bwa ne. Gɛ aa ɛ ásɛ tɔn waa nyoɡre Korowii Dea sɔfo Hilkia ka nao la waa won ɛ kasinteŋ.

²⁵ Kooro bɛlbwa ta do kɛ Kooro Josia, dɛ nyin Korowii o bambile bwa, o hweera dɛ o bokpeɡa bwa ne, ɡɛ waa aa lɔ Mosis Mmara la bini bwa aa dɛ baɡle la.

²⁶ Kɛ ane a bwa, Korowii bandichɔɡe waa lɔ Juda harɛ ta tena nɛɛ la, dɛ o ta sɔɔhnɛ, Kooro Manasɛ waa waa ɛa dɛ kpɔ ir o bandia la wa.

²⁷ Korowii ŋɔ, “Mɛɛ le Juda harɛ nɛra ɡe nee, ɡɛ maa le Israel harɛ nɛra ne la. Dɛ́ vɛh bwɛjen Jerusalam tena maa lee ba cheɡ tɛ n te, ne Dea nɔ maa ŋɔa baa tom mɛ o bini nɔ ta.”

Kooro Josia kora dii jaɡa

²⁸ Wobɛlbwa Kooro Josia aa ɛa la bwa, ba chwera do saŋ la Juda Koranar Waa Tɔne bini.

²⁹ Gɛ saŋ Kooro Josia aa di kora la, Ijipt harɛ ta Kooro Neko kpɔ o laa tena ba Yufretis Moo ta ba cha Asiiria koojen. Kooro Josia kpɔ o laa tena ka pu Kooro Neko yo, asɛ Kooro Neko kpoo bwɛjen Meɡido.

³⁰ Kooro Josia bonɔɔna kpɔ o chɔɔ la do torɔɡo bini, dɛ kpɔɔ kaa Jerusalam, dɛ ka huɡo o ɡbaɡba lalbɔɔ bini. Juda harɛ tena lawɛ Kooro Josia bibaa Jehoahas, dɛ fuɡe noo do o nyu ta, o chiɡ o mɛɛ naa ta, dɛ di kora.

Juda Kooro Jehoahas

³¹ Kooro Jehoahas di bene fifraanɛ dɛ atoro mɔɔ dɛ di kora Juda harɛ ta. O soɡe Jerusalam di kora korobie atoro. Dɛ o nya sɔne Hamutal, o ɡe mɛɛ sɔne Jeremia, o le bwɛjen Lebna ta.

³² Kooro Jehoahas teŋɛ o naawa wechɔɡa baa ɛa ta dɛ ɡe ɛ wechɔɡa jo Korowii nɛ.

³³ Ijipt Kooro baa dɛ yerɔ Neko yo Kooro Jehoahas, dɛ lawɔ bwɛjen Ribla waa lɔ Hamat harɛ ta, dɛ vɔrɔwo jɔɡrɔre ne, asɛ o kora dii jaɡɛ bela. Dɛ ɛɡre Juda tena lɛ toɔ suuɡapoŋa a tɔɡre aa ɛ kilore kaɡboŋa atoro lafraanaarɛ, ne suuɡaswɛm a tɔɡre aa ɛ kilore fifraatoro dɛ anaarɛ.

³⁴ Ijipt Kooro Neko kpɔ Kooro Josia bibaa Eliakim chiɡ o mɛɛ naa ta, o di kora Juda harɛ. Kooro Neko charɛ Eliakim sɔn la dɛ pao Jehoiakim. Dɛ kpɔ Kooro Jehoahas kaa Ijipt harɛ ta, asɛ o ka sewɛ bela.

³⁵ Kooro Jehoiakim bɔ suuɡapoŋa ne suuɡaswɛm Ijipt Kooro Neko aa ɛɡ ba dɛɛ lɛ la. Gɛ nomɛlbwa aa dɔa taa Kooro Jehoiakim nyiŋi dɛ lɛ suuɡa la, ɡɛ aa ɛ ó won bɔ toɔ la ɡɛ Kooro Neko aa dɛ nyin la.

Juda Kooro Jehoiakim

³⁶ Kooro Jehoiakim di bene fifraanɛ dɛ anue mɔɔ dɛ di kora Juda harɛ ta. O soɡe Jerusalam di kora bene fi dɛ beŋkpoŋ. Dɛ o nya sɔne Sebida, o ɡe mɛɛ sɔne Pɛdaya, o le Ruma.

³⁷ Kooro Jehoiakim ɛ wechɔɡa, dɛ jo Korowii nɛɛ ɡɛ o naawa fa aa ɛa la.