2 Koranar 22 - mzwDBL

Juda Kooro Josia

¹ Juda Kooro Josia aa di kora dɛ o dɔ bene anuatoro. O soɡe Jerusalam dɛ di kora bene fifraatoro dɛ beŋkpoŋ. O nya sɔne Jedida dɛ le bwɛɛ bɛl baa dɛ yerɔ Boskat. O nya la mɛɛ sɔne Adaya.

² O ɛ waa aa too Korowii tea, o teŋɛ waa o nabaa Kooro Devid aa ɛa ta. O teŋɛ Korowii waa ta kɛrɛdɛ.

Korowii Mmara Tɔn nae wa

³ Kooro Josia aa di kora bene fi dɛ anuatoro ta la, o tomɛ o koodem karake baa dɛ yerɔ Safan Korowii Dea. O mɛɛ sɔne Asalia, o nabaa sɔne Mɛsolam. O ŋɔ Safan be ŋɔ,

⁴ “La Sɔfonomoa Hilkia be, ásɛ o lɛ suuɡa nɛra aa dɛ ba a ne Korowii Dea la le nɛra baa dɛ nyiŋi doonyoone ta la be cheɡ.

⁵ Ŋɔ ó kpɔ do nɛra baa dɛ nyiŋi Korowii Dea la kwaara ta la nɔn ta, ásɛ ba kpɔ bɔ tom-ɛɛra baa dɛ kwaa Korowii Dea la kem.

⁶ Kapenta tena ne mamaala ne nɛra baa dɛ sɛh bwea, dɛ́ ɡel ba kpɔ suuɡa la ane yawɛ daa ne bwea baa sɛah, dɛ́ kpɔ kwaa Korowii Dea la.

⁷ Nɛra suuɡa la aa lɔ ba be la dɛ di kasinteŋ ba toma ta, anomanta, a ta chɛ kɛŋɔ bá bu nkontaa bɛlbwa.”

⁸ Sɔfo nomoa Hilkia ŋɔ koodem karake Safan waa chwerɛ waa dɛɛ bil la be ŋɔ, “N na Korowii Mmara Tɔn waa nyoɡra la Korowii Dea.” Asɛ dɛ kpɔ tɛ Safan o kure.

⁹ Ate, Safan berɛ kaa Kooro Josia be, dɛ ŋɔ, “N naa kooro, he nomonome la kpɔ suuɡa aa lɔ Korowii Dea la do nɛra baa dɛ nyiŋi tom-ɛɛra la nɛɛ ne tom-ɛɛra la nɔn ta.”

¹⁰ Safan berɛ ŋɔ kooro be ŋɔ, “N naa, sɔfo Hilkia kpɔ tɔn bɛl tɛ mɛ.” Asɛ Safan kure waa aa lɔ o bini baɡle kooro.

¹¹ Kooro la aa no Mmara Tɔn la bini waa la, o laa o laala waa doa la kɛɛ, a baɡle kɛ o loo kuu.

¹² Buɡ la ta, Kooro do sɔfo Hilkia ne Safan bibaa Ahikam, ne Mikaya bibaa Akbɔ, ne Safan waa ɛ karake dɛ chwerɛ waa dɛɛ bil, dɛ o bonɔɔ Asaya be ŋɔ,

¹³ “Hé la ka bɔɔ le Korowii be tɛ n ne nɛra baa ka Israel ne Juda, tɔn nɔ baa ɡaaɡa dɛ ka nao nɔ wa. Korowii baah di n ne Juda harɛ nɔ ta nɛra bwa nɛɛ taeh, dɛkalkɛ ya naawa ta waa aa lɔ tɔn nɔ bini nɔ ta teŋɛ.”

¹⁴ Anee sɔfo Hilkia ne Ahikam ne Akbɔ ne Safan, dɛ Asaya la Korowii keame bɛl waa ɛ haah baa yerɔ Hulda be, dɛ ka bɔɔ le o be. Dɛ Korowii keame Hulda soɡe Jerusalam bampera bofale. O jaaree Tikva bibaa Salum, asɛ o nabaa sɔne Haahas. Onee dɛɛ nyiŋi Korowii Dea batakaarere ta.

¹⁵ Korowii keame Hulda ŋɔ ba be ŋɔ, Korowii Israel tena aa dɛ tomɔ la ŋɔ, “Hé la ka ŋɔ Kooro Josia waa tomɛ heyaa la be ŋɔ,

¹⁶ Korowii ŋɔ o dɛ ba Jerusalam nɛra deŋne tɛra, ɡɛ waa baa chwera do Juda kooro tɔn bini aa dɛ baɡle la,

¹⁷ dɛkalkɛ ba vɛɛh mɛ, dɛ ka fuh konsɔɔhsoma voɡa ta, dɛɛ muɡli n baah voɡa ba ɡbaɡba aa ɛa ne. N baah ɛɛ di ba nɛɛ bonɔ kohonaa, aa wola sɔɔh bwa.

¹⁸ Hé ŋɔ Juda kooro waa tomɛ heyaa ŋɔ hé ka bɔɔ le Korowii be la be ŋɔ, waa Korowii Israel tena aa dɛ tomɔ aa bola, waa waa noa dɛ le tɔn la bini laanee nɔ,

¹⁹ ‘Haa kure tɔn la, dɛ no Jerusalam nɛra deŋnetɛra, ne ba taahna waa he loo ku he kɛɛ he batakaare haa doa, dɛ ba he te ne harɛ dɛɛ wi nomanta, n no he wii haa wia la bwa.

²⁰ Anomanta, mɛɛ ɡeloo he sewɛ deŋnesɔɔhna ta ka pu he naawa. Haa deŋnetɛra kohona men Korowii aa dɛ ba a ne bala ba ta Jerusalam ta laanee na.’ ” Asɛ toroma la ka ŋɔ waa la Kooro Josia be.