2 Koranar 21 - mzwDBL

Juda Kooro Manasɛ

¹ Kooro Manasɛ aa baa di kora Juda harɛ ta la, dɛ o di bene fi dɛ anɛ. O soɡe Jerusalam di kora bene fifraanue dɛ anue. Dɛ o nya sɔne Hɛpseba.

² O ɛ wechɔɡa dɛ jo Korowii nɛ, dɛ teŋɛ harɛre nɛra baa tɔ sie ba so bela, Korowii aa doŋ ba le ba harɛre ta tɛ Israel tena we-ɛɛla baa ɛa Korowii kia la ta.

³ Kooro Manasɛ kwaarɔ cheɡ voɡa o mɛɛ Kooro Hɛsɛkea aa paɡra bela voɡtoroma aa dɛ tomɛ la, dɛ berɛ ɛ kwaa baa dɛ ɛ saraha a ta tɛ voɡbaa Baal, dɛ paaɡe voɡhaah Asera dajaŋa, ɡɛ Israel Kooro Ahab fa aa ɛa la. O berɔ tomɛ kwaa aa lɔ nyundua kɛŋɔ wee ne korobie dɛ weweela bwa.

⁴ O ɛ kwaa voɡtoroma aa dɛ ɛ saraha a ta Korowii Dea, bela Korowii aa ŋɔa belaa a chɛ kɛ baa tomɔ la.

⁵ Korowii Dea dembaahna anɛ la bini la, o ɛ kwaa baa dɛ ɛ saraha a ta baa tomɛ kwaa aa lɔ nyundua kɛŋɔ wee ne korobie, dɛ weweela.

⁶ O kpo o bibaa dɛ fuuh ɛ saraha, dɛ ɛ sɔm we-ɛɛla dɛ voɡɛ dɛ yerɛ lala, dɛ la tɛɡre tena ɡe be. O ɛ wechɔɡa taeh dɛ jo Korowii nɛɛ dɛ ir o bandia kohona.

⁷ Kooro Manasɛ sɛh Asera voɡ dajaŋ, dɛ kpɔ ka pa Korowii Dea, bela Korowii aa ŋɔ Kooro Devid ne o bibaa Kooro Solomɔn be ŋɔ, “Dea nɔ ne Jerusalamee n le cheɡ, dɛ le Israel deene bwa bini kɛŋɔ baa tom mɛ o bini saŋ bɛlbwa dɛɛ la la.

⁸ Dɛ Israel tena ɛɛ teŋɛ waa maa do ba a ta, ne mmarare la bwa n fa aa cheɡɛ n bonɔɔ Mosis nɛɛ dɛ kpɔ tɛɛ ba la ta tenaa, maa ɡel bá doŋ ba le harɛ maa kpɔa tɛ ba naawa la ta.”

⁹ Kɛ Juda tena vɛoh, Kooro Manasɛ ɡelɔ ba nyoɡre, dɛ ɛ wechɔɡa ɡwaa harɛre nɛra Korowii fa aa doŋ ba le o nɛra Israel tena sie la.

¹⁰ Korowii cheɡɛ o bonɔɔna baa ɛ o keamere nɛɛ ŋɔ,

¹¹ “Juda Kooro Manasɛ ɛ kii wa. O ɛ wechɔɡa dɛ ɡwaa ɡɛ Amɔre tena ba fa aa soɡe bonɔ la, dɛ ɡel Juda tena ɛ wechɔɡa dɛɛ tomɛ o voɡa.

¹² Anomanta, men Korowii Israel tena aa dɛ tom mɛ la ɛɛ kpɔ sibeɡraa ba ta Jerusalam ne Juda tena nɛ, ásɛ nomɛlbwa no dɛɛ ɔmɛ.

¹³ Mɛɛ bol Jerusalam tena waa dɛ́ pa ba bolchɔɡe kɛŋɔ maa ɛ Samaria tena, ne Israel Kooro Ahab, dɛ o naanar la. Mɛɛ le Jerusalam tena bwa nee kɛŋɔ, ba yon kpɔ kon fee hɛna bini, dɛ laa o doŋa bwa kpɔ dɛ berɛ pi la ken.

¹⁴ Mɛɛ vɛh n nɛra baa kaa laanee, dɛ́ kpɔ ba do ba dɔma nɔn ta. Ásɛ ba dɔma la yoo ba, dɛ́ pɔ ba nɛ, dɛ́ kpɔ ba harɛ kɛŋɔ baa dɛ pa laa ta kwaa ken.

¹⁵ Dɛkalkɛ, ba ɛ wechɔɡa dɛ jo n nɛ, dɛ ir n bandia le awola ba naawa aa le Ijipt harɛ ta ba le fini.”

¹⁶ Kooro Manasɛ kpoo nɛra baa wola wechɔɡa bɛlbwa ɛɛ dɛ warɛ taeh, asɛ ba chale ɛɛ palɛ Jerusalam fɔɡbaahna bwa. O berɔ ɡel Juda harɛ tena jo voɡa toma ta, dɛ ɛ wechɔɡa jo Korowii nɛ.

¹⁷ Kooro Manasɛ waa waa ɛa bwa, ne wechɔɡa waa ɛa te, ba chwera do Juda Koranar Waa Tɔne bini.

¹⁸ Kooro Manasɛ sewɔ ka pu o naawa, asɛ ba huɡo bodɛɛɡe bobɛl baa du daa koodem la jwɛh, ba dɛ yera Kooro Usa Daa. O bibaa Amɔn baa chiɡ o naa ta, dɛ di kora.

Juda Kooro Amɔn

¹⁹ Kooro Amɔn aa di kora la, dɛ o di bene fifraanɛ dɛ anɛ. O soɡe Jerusalam di kora bene anɛ. O nya sɔne Mɛsolɛmɛt, Mɛsolɛmɛt mɛɛ sɔne Harus dɛ le bwɛɛ bɛl baa dɛ yerɔ Jotba.

²⁰ Kooro Amɔn ɛ wechɔɡa, dɛ jo Korowii nɛɛ ɡɛ o mɛɛ Kooro Manasɛ aa ɛa la.

²¹ O teŋɛ o mɛɛ we-ɛɛla la bwa ta. O tomɛ voɡa o mɛɛ aa toma la dɛɛ ɡuŋa.

²² O berɛ habɔɔ kpo Korowii o naawa aa toma la, dɛ vɛh Korowii waa ta teŋa.

²³ Kooro Amɔn nomonome la bini bane vɔrɔwe o vɔrɔwa, dɛ kpoo o koodem.

²⁴ Asɛ Juda harɛ nɛra kpoo nɛra baa vɔrɔwe Kooro Amɔn vɔrɔwa dɛ kpoo la. Dɛ kpɔ o bibaa Josia chiɡ o naa ta, o di kora.

²⁵ Waa bwa Kooro Amɔn aa ɛa la te, ba chwera do Juda Koranar Waa Tɔne bini.

²⁶ Ba huɡo Kooro Amɔn bodɛɛɡe bobɛl baa du daa o do Usa, asɛ o bibaa Josia chiɡ o naa ta, dɛ di kora.