2 Koranar 2 - mzwDBL

Korowii kpɔ o keame Elaeja kaa nyundua

¹ Saŋ bɛl telo kɛŋɔ dɛ Korowii dɛ ba Elaeja kpɔe dɛ́ kaa nyundua kawulewule ne. Dɛ Elaeja ne o bonɔɔ bɛl baa dɛ yerɔ Elaesa dɛ ba Gelɡal lee dɛ́ kaa.

² Baa dɛ kaa la, Elaeja ŋɔ Elaesa be ŋɔ, “So bonɔ, Korowii tom mɛ bwɛɛ bɛl baa dɛ yerɔ Bɛtel.” Anee Elaesa ŋɔ, “N ŋwɛɛ Korowii waa lole saŋ bɛlbwa, asɛ he ɡe do le nɔ kɛŋɔ n ne henee.” Asɛ ba bwa chiɡ ŋwɛnɛ ta kaa Bɛtel.

³ Dɛ Korowii keamere bane baa pɛa dɛɛ valɛ lɔ Bɛtel. Ba ba Elaesa be dɛ ba bɔɔro ŋɔ, “He jemɔ kɛŋɔ fini Korowii dɛ ba he dɔɔ kpɔe le he be kaa a ka he ɡbo aa?” Anee o chaŋe ŋɔ, “N jemɔ, hé hel, he bɛ a waa bol.”

⁴ Elaeja ŋɔ Elaesa be ja ŋɔ, “Korowii tom mɛ bwɛjen Jeriko, so bonɔ.” Elaesa ŋɔ, “N ŋwɛɛ Korowii waa lole, asɛ he ɡe do le nɔ kɛ n ne henee.” Anomanta, ba kaa Jeriko.

⁵ Korowii keamere baa pɛa dɛɛ valɛ dɛ do Jeriko baa bɔɔ Elaesa ŋɔ, “He jemɔ kɛŋɔ fini Korowii dɛ ba he dɔɔ kpɔe le he be kaa a ka he ɡbo aa?” Elaesa ŋɔ, “N jemɔ, hé hel, he bɛ a waa bol.”

⁶ Elaeja berɛ ŋɔ Elaesa be ja ŋɔ, “Korowii tom mɛ Jɔɔdan Moo la ta, kɛ so bonɔ.” Elaesa ŋɔ, “N ŋwɛɛ Korowii waa lole, asɛ he ɡe do le nɔ kɛ n ne henee.” Asɛ ba bwa kaa.

⁷ Korowii keamere baa pɛa dɛɛ valɛ fifraanue teŋɔ, dɛ ka jaɡɛ che ba ne ba baah tɛr tama, ba sie chaɡɛ bela Elaeja ne Elaesa aa kaa che Jɔɔdan Moo la nyoa la.

⁸ Asɛ Elaeja foo o batakaare, dɛ laa kpɛwɛ dɛ kpɔ lɔ nee la, asɛ nee la bini pere anɛ, asɛ ba valɛ kpɔ harɛpɛɛ ta le nee la baŋ.

⁹ Baa le nee la baŋ la, Elaeja ŋɔ Elaesa be ŋɔ, “Korowii ɛɛ ba kpɔ mɛɛ kaa taraken, bɔkwaa hɛɛ nyin kɛ ń ɛ tɛɛ mɔɔ ó ba kpɔ mɛ kaalɔ?” Asɛ Elaesa chaŋe ŋɔ, “Tɛ mɛ he kpeɡri nɔ dɔŋa bele anɛ, ásɛ n chiɡ he naa ta.”

¹⁰ Anee Elaeja ŋɔ, “Waa haa dɛ soŋe la kpeɡri kɛŋɔ ń won tɛɛ. Dɛ he na mɛ mɛɛ kaa tenaa, hɛɛ dɔɔ, kɛ dɛ he ta men nae tenaa, haa dɔ.”

¹¹ Ba taa bol waa dɛ valɛ dɛɛ kaa la, buɡ la ta, dɛ torɔɡo ne jaɡre baa che Elaesa ne Elaeja baah ta a bwa ɛɛ lawɛ nii, asɛ buɡ la ta, kawulewule den ba kpɔ a ne Elaeja kaa nyundua.

¹² Elaesa nao dɛ do lɔŋɔ yerɛ Elaeja ŋɔ, “N dɔɔ! N dɔɔ! Nɛn waa cheɡɛ Israel tena habɔɔ! He kaalɔ.” Elaesa ta on nae kpa. O kɛɛ o laala waa doa la bini anɛ, a baɡle kɛŋɔ o loo kuu kohona.

¹³ Dɛ Elaeja yal waa tɔɔ dɛɛ dawɛ o laala ta la leo le, asɛ Elaesa kpɔ dɛ berɛ la ka che Jɔɔdan Moo la nyoa.

¹⁴ O kpɔ Elaeja yal la lɔ nee la dɛ lii ŋɔ, “Leperaa Korowii Elaeja aa tomɔ la dɔɔ?” Waa bera kpɔ lɔ nee la, o bini pero anɛ, asɛ harɛpɛɛ chɔ o valɛ o bini le o baŋ.

¹⁵ Dɛ Korowii keamere baa pɛa dɛɛ valɛ fifraanue ba le Jeriko la ta cheɡɛ bela nao, asɛ dɛ ŋɔ dɔŋa be ŋɔ, “Elaeja kpeɡri la ba Elaesa nɛ!” Asɛ ba la o be, dɛ ka ɡuŋi o sie,

¹⁶ dɛ ŋɔ o be ŋɔ, “Yan yaa ɛ he bonɔɔna lɔ baala fifraanue ya bwara aa kpeɡa bonɔ. Gel yá ka ɡaaɡe he nomoa bɔr, Korowii domaa ken baa kpɔɔ kaa dɛ ka ɡelo bwejen bɛl doa kɛɛ fɛlembɔjen bɛl bini.” Anee Elaesa ŋɔ, “Akai, he bɛ nomɛlbwa tomɛ.”

¹⁷ Ba soŋo a ba peo, asɛ o ŋɔ, “Hé tom ba.” Asɛ ba tomɛ baala fifraanue la ba ka ɡaaɡe Elaeja bɔr tɔpera atoro ba ta on nae.

¹⁸ Asɛ ba laa berɛ ba Jeriko, dɛ Elaesa ta lɔ bela, anee o ŋɔ ba be ŋɔ, “N ta he be ŋɔe ŋɔ hé ɡel o bɔr ka ɡaaɡa aa?”

Elaesa nyokpowa waa ɛa

¹⁹ Awola bɛl, bwɛjen Jeriko tena la Elaesa be dɛ ka ŋɔ, “Ya dɔɔ, he ɡbabir nao kɛŋɔ ya bwɛɛ nɔ chɔe wer, kɛ nee yaa dɛ nyɔ aa were, kondikwaa ɡe aa wer do ya harɛ nɔ ta.”

²⁰ Asɛ Elaesa ŋɔ, “Hé ɛ yar tama do loɡfale ta ba tɛ mɛ.” Asɛ ba ɛ ba tɛo.

²¹ Anee o kpɔ la ba bule la ta, dɛ ka fuɡe yar la do o ta dɛ ŋɔ, “Waa Korowii aa dɛ bol laanee kɛŋɔ, ‘N ɡelɔ nee nɔ do wer, harɛ la ɡe ta kwaa ɛɛ do wer nomɛlbwa aa wola sewɛ kpa.’ ”

²² Nee la wer dɛ ba le fini ɡɛ Elaesa aa ŋɔa o do la.

²³ Elaesa le Jeriko dɛɛ kaa Bɛtel, waa dɛ kaa la, bechale bane le bwɛɛ la ta dɛ baa ɛo nɛnhɛla ŋɔ, “Le bonɔ, nyuɡbaale te bɛl le!”

²⁴ Asɛ Elaeja ke nyiŋ ba dɛ taah ba Korowii sɔn ne, asɛ sisirere anɛ le daa ane bini, dɛ ba kpoo bii la bini fifraanaarɛ dɛ banɛ dɛ toɡri ba ola.

²⁵ Elaesa le bela dɛ teeh kaa Kaamɛl Bwejen doa, dɛ le bela kaa bwɛjen Samaria ta.