2 Koranar 18 - mzwDBL

Juda Kooro Hɛsɛkea

¹ Ɛla bibaa Kooro Hosia aa di kora Israel harɛ bene atoro la, a taa Kooro Ahas bibaa Hɛsɛkea di kora Juda harɛ ta,

² dɛ Kooro Hɛsɛkea dɔ bene fifraanɛ dɛ anue. O soɡe Jerusalam di kora bene fifraanɛ dɛ anuanaarɛ. O nya sɔne Abija. Abija ɡe mɛɛ sɔne Sekaria.

³ O ɛ waa aa too Korowii tea kɛŋɔ o nabaa Kooro Devid ken.

⁴ O chɔɡ bɔra baa dɛ tomɛ voɡare, dɛ paɡre bwea baa paaɡa dɛɛ duura, dɛ teŋni voɡ Asera dajaŋa ta. O kuuɡi ayaawa Mosis fa aa kpɔa ɛ harɛkon baa yerɔ Nehustan la. Dɛ ba tel ɡɛ saŋ la, dɛ Israel tena dɛ fuh daawiile dɛɛ tɛ harɛkon la.

⁵ Dɛ Korowii Israel tena aa dɛ tomɛ la nɛɛ Kooro Hɛsɛkea kpɔ o te dawɛ. Juda harɛ ta koranar la bwa bini, banɔ la baa di kora mɔɔ Kooro Hɛsɛkea ba di, ne banɔ la waa dia mɔɔ ba ba di la, dɛ o dɔŋ toole.

⁶ O kpɔ o te pɛl Korowii, o ta o nɛɛ teŋa ɡelɛ, dɛ do sie dɛɛ teŋɛ mmarare Korowii aa kpɔa tɛ Mosis la bwa ta.

⁷ Anomanta, Korowii ja o nɛ, asɛ wobɛlbwa waa ɛa la do wer. O ɛ Asiiria koojen dɔm, dɛ laa o te kpɔ o lɔɡa, dɛ ŋɔ waa on tomɛ kpa.

⁸ O yo Filisti tena dɛ pɔ ba nɛ, bwɛjena ne anɔ la baa ma danjwɛkpeɡ bara bwa, dɛ kpoŋe ka le bwɛjen Gasa bwa.

⁹ Kooro Hɛsɛkea aa di kora bene anaarɛ ta la, dɛ Kooro Ɛla bibaa Kooro Hosia di kora Israel harɛ ta bene anuanɛ. A taa Asiiria koojen Salmaneesa ne o laa tena ba yo bwɛjen Samaria tena dɛ tɔ ba do la.

¹⁰ Asiiria tena aa tɔ ba do bene atoro la, ba wono pɔ ba nɛ. Gɛ saŋ dɛ Kooro Hɛsɛkea di kora bene anumɛl, asɛ Kooro Hosia ɡe dɔ bene anuanaarɛ o kora ta.

¹¹ Asiiria koojen lawɛ Israel tena kaa o harɛ ta, dɛ kpɔ bane so Hala, bane so Habɔ Moo nyoa Gosan harɛ ta, bane ɡe ka so Midia tena bwɛjena ane ta.

¹² Samaria chɔɡɔ dɛkalkɛ, dɛ Israel tena ɛ wechɔɡa dɛ jo Korowii baa dɛ tomɔ nɛ. Ba koni fɔo ba ne waa fɔwa la, ba ta waa Korowii fa aa cheɡɛ o bonɔɔ Mosis nɛɛ dɛ kpɔ tɛɛ ba la noɛ, dɛ kpɔ ɛ wa.

Asiiria koojen Senakerib aah Jerusalam tena

¹³ Kooro Hɛsɛkea aa di kora bene fi dɛ anaarɛ ta la, Asiiria koojen Senakerib kpɔ o laa tena, dɛ ba yo Juda harɛ ta bwɛjena baa ma danjwɛkpeɡa bara, dɛ pɔ ba nɛ.

¹⁴ Ate, Kooro Hɛsɛkea tomɛ ŋɔ bá la Asiiria koojen be bwɛjen Lakes ta, dɛ́ ka ŋɔ o be ŋɔ, “N naa, n poori, n ɛ wechɔɡa, suuɡa bɛlbwa haa dɛ nyin la mɛɛ bɔɔ tɛɛ, ásɛ he le n nɛɛ kaa.” Asɛ Asiiria koojen ŋɔ o kpɔ suuɡapoŋa a tɔɡre aa ɛ kilore kaɡboŋa fi lafraanɛ, ne suuɡaswɛm a tɔɡre aa ɛ kilore kaɡboŋ fifraanɛ ba tɛo.

¹⁵ Asɛ Kooro Hɛsɛkea kpɔ suuɡapoŋa aa lɔ Korowii Dea, ne anɔ la aa lɔ dejeɡre baa dɛ cheɡ laala a yoɡ aa kpeɡa a bini koodem bwa ka tɛo.

¹⁶ Kooro Hɛsɛkea berɔ laa suuɡaswɛm o ɡbabir aa kpɔa bɔle Korowii Dea ɡbeni, ne anɔ la waa kpɔa bɔle doonyoa daa la ta swe, dɛ kpɔa ja ka tɛ Asiiria koojen la.

¹⁷ Asiiria koojen tomɛ o nomonjena batoro, laa sitɔɔla nomoa ne o ɡbaɡba nachiɡe ne o laa nomoa ŋɔ, bá le Lakes, dɛ́ kpɔ laa tena baa wara ja, dɛ́ la Kooro Hɛsɛkea be Jerusalam. Baa laŋa la, ba kaa che ŋwɛnɛ waa bɛne bobɛl nee aa pala dɛɛ kpɔ, dɛ le nyundua tam bɛl ta dɛɛ jo bwɛjen la ta, bela nɛra bane baa dɛ ɛ yale aa lole.

¹⁸ Ba kaa yerɛ Kooro Hɛsɛkea, asɛ o tomɛ Hilkia bibaa Eliakim, onee dɛɛ nyiŋi koodem bela waa ta, ne Sɛbna waa ɛ koodem bela karake, dɛ Asaf bibaa Joa waa chwerɛ harɛ la waa dɛɛ do tɔne bini, asɛ ba bwa le, dɛ ka chem ba.

¹⁹ Asiiria laa sitɔɔla la bini bɛl ŋɔ ba be ŋɔ, Asiiria koojen dɛ nyin ó jemɛ waa Kooro Hɛsɛkea a dena dɛɛ hwɛɡɛ a ta.

²⁰ O ŋɔ, “He dɛ lii kɛŋɔ nyoa wobol do kɛ wejema, ne kpeɡri ba kpɔ dɛɛ yo laa kɛɛ? Ume nɛɛ he kpɔ he te dawɛ, dɛ ɛɛ mɛ dɔm nɔɔ?

²¹ Na, dɛ Ijipt Kooro nɛɛ he kpɔ he te dawɛ aa, aa doo kɛŋɔ haa kpɔ pul ɛ daŋɡbala, ásɛ o ku dɛ́ tɔɡɛ he nɔn. Gɛɛ Ijipt kooro do tɛ nɛra baa kpɔ ba te dawɛ o nɛɛ bwa.”

²² Asiiria nomoa la berɛ ŋɔ, “Kɛ, hɛɛ ŋɔɔ Korowii haa dɛ tomɔ la nɛɛ hɛɛ hwɛɡɛ aa? Saraha kwaa baa kpoo kwaa a ta dɛɛ tɛ Korowii la laa on Kooro Hɛsɛkea chɔɡ, dɛ ŋɔ Juda ne Jerusalam tena bwa be ŋɔ, báa tomɛ Jerusalam bonɔ ɡbo la aa?

²³ N ne hɛɛ ŋwɛɛroo n naa Asiiria koojen sɔn ta. Mɛɛ tɛɛ jaɡre kaɡboŋa anɛɛ, dɛ hɛɛ won dɔ laa tena ba so a bwa ta naa.

²⁴ Haa won kpɔ he te maɡɛ Asiiria koojen nomonome la bini bechala kwara, kɛ he dɛ hwɛɡɛ Ijipt kooro nɛɛ kɛ ó ba tɛɛ kwaa aa do kɛŋɔ torɔɡore, ne laa tena baa dɛ so jaɡre ta.

²⁵ He dɛ lii kɛŋɔ Korowii habɔɔ n le dɛɛ ba dɛ́ ba yo he harɛ nɛra nɔ kɛɛ? Korowii ɡbabirii ŋɔ n be ŋɔ, ń ba dɛ́ ba chɔɡ harɛ nɔ.”

²⁶ Anee Eliakim baa dɛ yerɛ o mɛɛ Hilkia ne Sɛbna, dɛ Joa ŋɔ Asiiria koojen laa sitɔɔ la be ŋɔ, “Nomoa, ya dɛ soŋe, bol Aram tena wobol baɡle he bonɔɔna. He bolaa, ya dɛ no. Bɛ Hibru tena wobol kpɔ bol ya be. Nɛra baa cheɡɛ bwɛjen nɔ danjwɛɛ nɔ ta dɛ no he be.”

²⁷ Anee laa sitɔɔ la chaŋe ŋɔ, “Hé dɛ lii kɛŋɔ he ne he kooro ɡbo bee n nomoa tom mɛ ŋɔ ń ba bol waa nɔ kɛɛ? He ɡbo laa, nɛra baa sosoɡe bwɛjen nɔ danjwɛɛ nɔ ta ɡe jao, baa di ba ɡbaɡba benaa, dɛ́ nyɔ ba feene kɛ heya.”

²⁸ Ate, laa sitɔɔ la ir che, dɛ kpɔ Hibru tena wobol bol waa takpeɡ ne ŋɔ, “Hé no waa Asiiria koojen la aa dɛ bol he be!

²⁹ O dɛ kah heyaa ŋɔ he bɛ ɡel Kooro Hɛsɛkea neɡre heya. Waa won lɛ heyaa le n nɔn ta.

³⁰ He bɛ o nɛɛ teŋɛ, dɛ́ ɡel hé kpɔ he te dawɛ Korowii nɛɛ ŋɔ, wɛɛ lɛ heyaa, waa bwɛjen nɔɔ kpɔ do Asiiria koojen nɔn ta.

³¹ He bɛ Kooro Hɛsɛkea waa no. Asiiria koojen dɛ bol ŋɔ, hé le bwɛjen la bini ba o be, dɛ́ kpɔ he te ba do o lɔɡa. Wɛɛ ɡeloo he bini bɛlbwa dɔ o fiɡ ne o ɡrepo daa kooni nɔna di, dɛ́ nyɔ o kɔlɔŋ bini ne.

³² Ásɛ mɔɔ koojen la ba kpɔ heyaa kaa bojaŋ harɛ waa do kɛŋɔ he kon nɔ ta. Harɛ daa kooni aa lole he dɔ sen le a ta, ne mea baa kpɔ ɛ paanoo. O ɛ harɛ ɔleve no ne tooh aa lɔ o ta kohona. Hé teŋɛ waa koojen la aa do heyaa a ta la tenaa, hɛɛ dɔ he nyuunee. He bɛ ɡel Kooro Hɛsɛkea neɡre heyaa ŋɔ Korowii ɛɛ lɛ heyaa.

³³ Harɛ bɛl voɡ wono lɛ harɛ la nɛra le Asiiria koojen nɔn ta ka aa?

³⁴ Leperaa bwɛjena Hamat ne Aapad tena voɡa dɔɔ? Sefavaim ne Hena dɛ Iva tena ɡe voɡare sɛ? A wono lɛ Samaria tena aa?

³⁵ Harɛre nɔ voɡ besoo wona lɛ o harɛ le n be nɔ? Ɛrɛɛ Korowii ɛɛ ba wona lɛ Jerusalam ɔ?”

³⁶ Asɛ nɛra la hel jeiih ken, ba ta nentane tae ta harɛ, dɛkalkɛŋɔ dɛ Kooro Hɛsɛkea tɔ sie ŋɔ ba be ŋɔ ba bɛ on chaŋe.

³⁷ Ate, Eliakim ne Sɛbna, dɛ Joa kɛɛ ba laala, a baɡle kɛ ba loo kuu, dɛ la Kooro Hɛsɛkea be, dɛ ka bol waa Asiiria koojen laa sitɔɔ la aa bola la o be.