2 Koranar 16 - mzwDBL

Juda Kooro Ahas

¹ Remalia bibaa Kooro Pɛka aa di kora Israel harɛ ta bene fi dɛ anuanɛ la, a taa Juda Kooro Jotam bibaa Kooro Ahas di kora Juda harɛ ta.

² Kooro Ahas di bene fifraanɛ mɔɔ dɛ di kora. O soɡe Jerusalam dɛ di kora bene fi dɛ anumɛl. Dɛ o ta doe kɛŋɔ o nabaa Kooro Devid. O ɛ wechɔɡa dɛ jo Korowii waa dɛ tomɔ nɛ,

³ dɛ teŋɛ waa Israel koranar aa ɛa la ta. Hale o kpo o bibaa dɛ fuuh ɛ saraha. Dɛ ɡɛ waa la ɛ voɡtoroma harɛre nɛra Korowii aa doŋ ba tɛ Israel tena, ba tɔ sie ba so o ta la nawee wa. Dɛ Korowii kia.

⁴ Kooro Ahas kpoo kwaa dɛ ɛ saraha, dɛ fuh daawiile tɛ voɡare bela voɡtoroma aa dɛ tomɛ, ne deŋɡarere dor, dɛ dajen bɛlbwa mun.

⁵ Asɛ Siiria Kooro Resin ne Israel Kooro Pɛka kpɔ laa tena dɛ ba yo Jerusalam tena dɛ tɔ Kooro Ahas do, kɛ ba ta wone pɔ o nɛ.

⁶ Gɛ saŋ dɛ Siiria Kooro Resin berɔ ba lɛ bwɛjen Elat, dɛ doŋi Juda tena le o ta. Asɛ Edom tena ba so bela, ba soɡe bela ba le fini.

⁷ Ate, Kooro Ahas tomɛ nɛra Asiiria koojen Tiɡlat Pilesa be kɛŋɔ, “N ɛ he bonɔɔ tenten, ba lɛɛ mɛ, Siiria kooro ne Israel kooro dɛ yoo mɛ.”

⁸ Anee Juda Kooro Ahas kpɔ suuɡapoŋa ne suuɡaswɛm aa lɔ Korowii Dea, ne deene baa dɛ cheɡ laala a yoɡ aa kpeɡa a bini koodem la, dɛ tomɛ ba kpɔ ka kɛ Asiiria koojen la.

⁹ Asiiria koojen Tiɡlat Pilesa aa sɛh waa la ta la, o kpɔ o laa tena ba Siiria dɛ ba yo bwɛjen Damaskɔs tena. Dɛ larawe bela tena ka so bwɛɛ bɛl baa dɛ yerɔ Kir, dɛ kpo Kooro Resin.

¹⁰ Asɛ Kooro Ahas la Damaskɔs, dɛ ka pu Asiiria koojen Tiɡlat Pilesa. Waa la bela la, o na kon baa kpoo kwaa dɛɛ ɛ saraha o ta bela, dɛ nyiŋi o mar, dɛ ma o dɔŋ dɛ tomɛ torome o kpɔ ka baɡle sɔfo Uria.

¹¹ Asɛ sɔfo Uria ɡel ba ma kon baa kpoo kwaa dɛɛ ɛ saraha o ta la dɔŋ. O mao tonɛ mɔɔ Kooro Ahas le Damaskɔs dɛ la.

¹² Kooro Ahas aa le Damaskɔs kaa la, o kaa na kon la, asɛ dɛ ka ɛ saraha o ta.

¹³ O ɛ saraha baa dɛ fuah ne mea saraha, dɛ fuɡe sen saraha ta o ta, dɛ ɛ deŋnesɔɔhna saraha waa ɛa la chal merɛ saraha kon la ta.

¹⁴ Dɛ ɛ ayaawa kon baa dɛ ɛ saraha o ta, dɛ kpɔ do Korowii nɔn ta, o che saraha konfale la ne Korowii Dea la baah ta. Anomanta, Kooro Ahas kaa kpɔ ombene la ka cheɡ onfale la weekaŋle nyunduabɔr.

¹⁵ Anee Kooro Ahas ŋɔ sɔfo Uria be ŋɔ, “Chɔɔbɔr sarahare baa fuah ne mea sarahare baa ɛa jɔmɔra, ne kooro sarahare waa fuah ne mea sarahare ne harɛ la nɛra bwa sarahare baa fuah, ne mea sarahare dɛ sen sarahare bwa la, ɛa saraha konjen onfale la ta. Kpɔ kwaa baa kpoora fuh ɛ saraha la chal merɛ saraha kon la ta. Kɛ saraha kon baa kpɔ ayaawa ɛo, dɛ kpoo kwaa dɛɛ ɛ saraha o ta la te, ó ɛ n ɡbo kon ń kpɔ dɛɛ voɡɛ.”

¹⁶ Asɛ sɔfo Uria ɛ ɡɛ Kooro Ahas aa doo ŋɔ ó ɛ la.

¹⁷ Ate, Kooro Ahas laa kwaa aa maɡre ayaawa saraha kon la keŋkeŋni la, ne loɡa aa do kɛŋɔ torɔɡo nakpale la laa kpɔ a chebɔra. Dɛ berɛ laa ayaawa loɡbajen baa dɛ yerɔ Mpo o chɔŋɛ nabali fi dɛ anɛ baa kpɔ ayaawa ɛa la ta, dɛ kpɔ chɔŋɛ bwe ta.

¹⁸ Asiiria koojen nomanta, Kooro Ahas laa Korowii Dea baa dɛ tomɔ o bini Ona Tɔpere la kpɔ. Dɛ tɔ doonyoa Juda harɛ koranar aa kpɔ o ta dɛɛ jo Korowii Dea la.

¹⁹ Wobɛlbwa Kooro Ahas aa ɛa la, ba chwera do Juda Koranar Waa Tɔne bini.

²⁰ Kooro Ahas sewɔ, asɛ ba ka huɡo Jerusalam o naawa huɡribɔr, Kooro Devid Bwɛjen ta. Asɛ o bibaa Hɛsɛkea chiɡ o naa ta dɛ di kora.