2 Koranar 15 - mzwDBL

Juda Kooro Ussia

¹ Kooro Jɛroboam waa teŋa nɛɛ aa di kora Israel harɛ ta bene fifraanɛ dɛ anuanɛ taa Kooro Amasea bibaa Ussia di kora Juda harɛ ta.

² Waa di kora dɛ o dɔ bene fi dɛ anumɛl. O soɡe Jerusalam di kora bene fifraanue dɛ anɛ. O nya sɔne Jekolia dɛ le Jerusalam.

³ Kooro Ussia ɛ waa a too Korowii tea ɡɛ o mɛɛ Kooro Amasea fa aa ɛa la.

⁴ O ta bɔra voɡtoroma aa dɛ ɛ sarahare la chɔɡɛ. Dɛ nɛra la teŋɔ kpo kwaa dɛɛ ɛ sarahare dɛɛ fuh daawiile a sɔɔh aa soma bela.

⁵ Korowii kpɔ wee ta Kooro Ussia nɛɛ ka tel kɛŋɔ waa baa sewɛ. O ta koodem soɡee kpa, asɛ o bibaa Jotam so koodem bela, dɛ nyiŋi Juda harɛ la ta.

⁶ Waane aa chiɡ Kooro Ussia kora dii ta, ne anɔ la bwa waa ɛa la, ba chwera do Juda Koranar Waa Tɔne bini.

⁷ Kooro Ussia baa sewɛ, asɛ ba huɡo Jerusalam, bela baa huɡe o naawa, Kooro Devid Bwɛjen ta. O bibaa Jotam chiɡ o naa ta dɛ di kora.

Israel Kooro Sekaria

⁸ Juda Kooro Ussia di kora bene fifraatoro dɛ anuatoro. A taa Kooro Jɛroboam waa teŋa nɛɛ bibaa Sekaria di kora Israel harɛ ta. O soɡe Samaria di kora korobie anumɛl.

⁹ Kooro Sekaria ɛ wechɔɡa ɡɛ o naawa fa aa ɛa la, dɛ jo Korowii nɛ. Wechɔɡa Kooro Nɛbat bibaa Kooro Jɛroboam aa ɛa dɛ ɡel Israel tena ɡe ɛ wechɔɡa la, o ta an ɡelɛ.

¹⁰ Asɛ Jabes bibaa Salum vɔrɔwe o vɔrɔwa, dɛ kpoo nɛra o siwi ta Ibleam, dɛ kpɔ kora la di.

¹¹ Waa ane ɡe Kooro Sekaria aa ɛa o kora dii ta la, ba chwera do Israel Koranar Waa Tɔne bini.

¹² Anee Korowii baɡɛ Kooro Jehu nyoa dɛ teŋɛ a ta la. Korowii ŋɔ, “He naanar ɛɛ ɛ koranaree ka tel naanar bele banaarɛ baa ka ba nɛ, dɛɛ di kora Israel harɛ ta.”

Israel Kooro Salum

¹³ Kooro Ussia aa di kora Juda harɛ ta bene fifraatoro dɛ anuanaarɛ taa Jabes bibaa Salum di kora Israel harɛ ta. O soɡe Samaria di kora korobie.

¹⁴ Dɛ Gadi bibaa Kooro Mɛnahem le Tirsa, dɛ la Samaria dɛ ka kpo Jabes bibaa Kooro Salum, dɛ chiɡ o naa ta di kora.

¹⁵ Kooro Salum waane ɡe waa ɛa ɡɛ saŋ waa di kora la, ne vɔrɔwa waa tɔ a sie la, ba chwera do Israel Koranar Waa Tɔne bini.

¹⁶ Gɛ saŋ dɛ Kooro Mɛnahem iro le Tirsa, dɛ la bwɛjen Tifsa, o ne o laa tena ka kpoo nɛra baa lɔ o ta, dɛ bwɛɛre aa baro tena. Dɛkalkɛ ba ta ba te kpɔe ba do o lɔɡa. O doŋi Tifsa tena, dɛ ya tekpoŋra teene.

Israel Kooro Mɛnahem

¹⁷ Kooro Ussia aa di kora Juda harɛ ta bene fifraatoro dɛ anuanaarɛ taa Gadi bibaa Kooro Mɛnahem di kora Israel harɛ ta. O soɡe Samaria di kora bene fi.

¹⁸ Kooro Mɛnahem ɛ wechɔɡa, dɛ jo Korowii nɛ o kora dii ta bwa, ka tel o serewe wee. Wechɔɡa Nɛbat bibaa Kooro Jɛroboam aa ɛa, dɛ ɡel Israel tena ɡe ɛ wechɔɡa la, Kooro Mɛnahem ɡe ta an ɡelɛ.

¹⁹ Asiiria harɛ ta Koojen Tiɡlat Pilesa la Israel harɛ ta ka yoo ba, asɛ Kooro Mɛnahem tɛo suuɡapoŋa a tɔɡre aa ɛ kaɡboŋa lafraatoro fifraanaarɛ ŋɔ ó chao, ásɛ o kora la do kpeɡri.

²⁰ Kooro Mɛnahem lɛ suuɡapoŋa fifraanue le baa bɛlbwa o nɔn bini aa wera be, dɛ kpɔ tɛ Asiiria koojen la, asɛ o le Israel harɛ ta dɛ kaa.

²¹ Waa ane ɡe Kooro Mɛnahem aa ɛa ɡɛ saŋ waa dɛ di kora la, ba chwera do Israel Koranar Waa Tɔne bini.

²² Kooro Mɛnahem baa sewɛ, ba ka huɡo o naawa hoɡa ta, asɛ o bibaa Pɛkahea chiɡ o naa ta dɛ di kora.

Israel Kooro Pɛkahea

²³ Juda Kooro Ussia di kora bene fifraanue. A taa Kooro Mɛnahem bibaa Pɛkahea di kora Israel harɛ ta. O soɡe Samaria di kora bene anɛ.

²⁴ O ɛ wechɔɡa dɛ jo Korowii nɛ. O ta wechɔɡa Kooro Nɛbat bibaa Kooro Jɛroboam aa ɛa, dɛ ɡel Israel tena ɡe ɛ wechɔɡa la ta leɛ.

²⁵ Anee Remalia bibaa Pɛka waa ɛ Kooro Pɛkahea laa nomoa vɔrɔwe Kooro Pɛkahea vɔrɔwa, dɛ kpɔ Gelead tena fifraanue ja o nɛ. Ba kaa kpo Kooro Pɛkahea ne baala bane baa dɛ yer ba Aaɡob ne Arie, koodem bela waa ma danjwɛkpeɡ baro bwɛjen Samaria. Asɛ dɛ chiɡ o naa ta di kora.

²⁶ Wobɛlbwa ɡe Kooro Pɛkahea aa ɛa o kora dii ta ne anɔ la waa ɛa bwa, ba chwera do Israel Koranar Waa Tɔne bini.

Israel Kooro Pɛka

²⁷ Kooro Ussia aa di kora Juda harɛ ta bene fifraanue dɛ anɛ taa Remalia bibaa Kooro Pɛka di kora Israel harɛ ta. O soɡe Samaria di kora bene fifraanɛ.

²⁸ Kooro Pɛka ɛ wechɔɡa dɛ jo Korowii nɛ. Wechɔɡa Kooro Nɛbat bibaa Jɛroboam aa ɛa, dɛ ɡel Israel tena ɡe ɛ wechɔɡa la, o ta an ɡelɛ.

²⁹ Kooro Pɛka aa di kora Israel harɛ ta la taa Asiiria koojen Tiɡlat Pilesa kpɔ o laa tena ba yo, dɛ lɛ bwɛjena ane baa dɛ yera Ijon ne Ebel Bɛt Maaka, ne Janoa ne Kedes dɛ Hasɔ. O berɔ ka lɛ Gelead ne Galilia harɛre, dɛ kpɔ Naftale dea harɛ bwa ja, dɛ larawe Israel tena baa lɔ bela kaa Asiiria harɛ ta.

³⁰ Ussia bibaa Kooro Jotam aa di kora Juda harɛ bene fifraanɛ taa Ɛla bibaa Hosia vɔrɔwe Remalia bibaa Kooro Pɛka vɔrɔwa dɛ kpoo. O chiɡ o naa ta dɛ di Israel harɛ ta kora.

³¹ Waa Kooro Pɛka aa ɛa o kora dii ta la, ba chwera do Israel Koranar Waa Tɔne bini.

Juda Kooro Jotam

³² Remalia bibaa Kooro Pɛka aa di kora Israel harɛ ta la, bennɛɛte taa Kooro Ussia bibaa Jotam di kora Juda harɛ ta.

³³ Kooro Jotam aa di kora dɛ o dɔ bene fifraanɛ dɛ anue. O soɡe Jerusalam di kora bene fi dɛ anumɛl. O nya sɔne Jerusa, asɛ o nya ɡe mɛɛ sɔne Sadɔk.

³⁴ Kooro Jotam ɛ waa aa too Korowii tea, dɛ teŋɛ waa o mɛɛ Kooro Ussia aa ɛa la ta.

³⁵ O ta voɡa baa kpoo kwaa a ta dɛ ɛ sarahare dɛɛ fuh daawiile a ta la chɔɡɛ. Nɛra teŋɔ kpoo kwaa ɛ sarahare dɛɛ fuh konsɔɔhsoma a ta. Kooro Jotam berɔ kwaa ma Korowii Dea doonyoa baa dɛ yerɔ Weekaŋle Nyundua Doonyoa la.

³⁶ Waa aa chiɡ Kooro Jotam kora dii ta ne waa waa ɛa, ba chwera do Juda Koranar Waa Tɔne bini.

³⁷ Kooro Jotam kora dii saŋ taa Korowii ɡel Siiria Kooro Resin, ne Remalia bibaa Israel Kooro Pɛka pa mun ka yo Juda tena.

³⁸ Kooro Jotam aa baa sewɛ la, ba huɡo Jerusalam waa ɛ Kooro Devid Bwɛjen bela baa huɡe o naawa. Asɛ o bibaa Ahas chiɡ o naa ta, dɛ di kora.