2 Koranar 14 - mzwDBL

Juda Kooro Amasea

¹ Kooro Jehoahas bibaa Jehoas aa di kora Israel harɛ bennɛɛte taa Kooro Joas bibaa Amasea di kora Juda harɛ ta.

² O di bene fifraanɛ dɛ anue mɔɔ, dɛ di kora. O di kora Jerusalam bene fifraanɛ dɛ anuanaarɛ. O nya sɔne Jehoadin dɛ le Jerusalam.

³ Kooro Amasea ɛ waa aa too Korowii tea, kɛ dɛ a ta o nabaa Kooro Devid kwaa tele. Wobɛlbwa ta la, dɛ o dɛ teŋɛ waa o mɛɛ Kooro Joas aa ɛa ta.

⁴ O ta ɡelɛ ba chɔɡ bɔra baa dɛ tomɛ voɡa la, asɛ ba ta kpoo kwaa dɛɛ ɛ sarahare, dɛɛ fuh daawiile bela.

⁵ Kooro Amasea kora aa baa che kiŋkiŋ name la, o kpoo nomonome baa kpo o mɛɛ o fa aa di kora la.

⁶ Kɛ o ta ɡɛ nomonome la bii kpoorɛ ɡɛ Korowii aa chwera Mosis Mmara la ta kɛŋɔ, “Mɛɛ kɛɛ nya ɛ wechɔɡa aa, haa won kpɔ kpo o bie, bii ɡe ɛ wechɔɡa aa, haa won kpɔ kpo mɛɛ kɛɛ nya. Nɛn o ɡbabir aa ɛ wechɔɡa laanee chɛ kɛ ó sewɛ o wechɔɡa wa.”

⁷ Kooro Amasea ne o laa tena kpoo Edom laa tena kaɡboŋa fi Yar Fɛlembɔjen ta. Dɛ berɛ yo lɛ bwɛjen Sela, dɛ kwaa pa o sɔn Jokteel, ba ta dɛ yerɔ ɡɛ ba le fini.

⁸ Awola bɛl, Kooro Amasea tomɛ toroma Israel Kooro Jehoas be dɛ ŋɔ, “Ba chem mɛ ásɛ ya yo laa.”

⁹ Anee Juda Kooro Amasea tomɛ toroma Israel Kooro Jehoas be, dɛ sɛɡlo ŋɔ, “Lɛbanɔn harɛ ta jabalnadaŋɛ bɛlee fa ira, dɛ ka ŋɔ bela dajen bɛl be ŋɔ, ‘Kpɔ he bihaah tɛ mɛ ń tɛ n bie ó mo.’ Asɛ kpɔɡ bini ol bɛl ɡe ir, dɛ ba tiɡri jabalnadaŋɛ la ta dɛ laa kuuɡi.

¹⁰ Na, he fa yo Edom tena dɛ pɔ ba nɛ, he nyu bini do he som, ɡel a maɡre he ne dɛ́ so he dem. Ɛrɛɛ hɛɛ nyin waa ba dawɛ ya nɛ, dɛ́ chɔɡ he kora ne Juda tena nɔɔ?”

¹¹ Kooro Amasea ta a mun noɛ, anomanta, Israel Kooro Jehoas kpɔ laa tena ba ne Kooro Amasea ne o laa tena ka cheme Bɛt Sɛmɛs waa lɔ Juda harɛ ta, dɛ yo.

¹² Israel laa tena pɔ Juda laa tena nɛ, asɛ ba chwa peɡre kaa ba bwɛɛre.

¹³ Israel Kooro Jehoas lawɛ Juda Kooro Amasea, dɛ kpɔɔ kaa Jerusalam, dɛ ka kuuɡi danjwɛɛ waa baro la. Ba kuuɡu le Efrem Doonyoa ka tel bobɛl baa dɛ yerɔ Loŋkora Doonyoa. O jaŋne ɛɛ ɛ naɡale lafraanumɛlee.

¹⁴ Kooro Jɛhoas pa suuɡaswɛm ne suuɡapoŋa ne kwaa aa lɔ Korowii Dea, ne koodem bela laala a yoɡ aa do kpeɡri kaa Samaria. O lawɛ nɛra ɡe ja kaa.

¹⁵ Waa Kooro Jehoas aa ɛa ja, ne laa o ne Juda Kooro Amasea a yoa la, ba chwera do Israel Koranar Waa Tɔne bini.

¹⁶ Kooro Jehoas baa sewɛ, ba ka huɡo o naawa hoɡa ta Samaria, bela baa dɛ huɡe Israel koranar. Asɛ o bibaa Jɛroboam waa teŋa nɛɛ, ba chiɡ o naa ta dɛ di kora.

Juda Kooro Amasea seo

¹⁷ Juda Kooro Joas bibaa Kooro Amasea di bene fi dɛ anue, Israel Kooro Jehoahas bibaa Kooro Jehoas seo habɔɔ.

¹⁸ Waa aa bera chiɡ Juda Kooro Amasea kora dii ta la, ba chwera do Juda Koranar Waa Tɔne bini.

¹⁹ Dɛ ba dɛ vɔrɔwe Kooro Amasea kpoe vɔrɔwa Jerusalam, anomanta, o chwao kaa bwɛjen Lakes ta, asɛ ba tomɛ nɛra ba teŋɛ dɛ ka kpoo bela.

²⁰ Ba kpɔ o chɔɔ dawɛ jaaɡɔ ta ba Jerusalam, asɛ ba huɡo bela baa huɡe o naawa Jerusalam waa ɛ Kooro Devid Bwɛjen la ta.

²¹ Ate, Juda tena bwa lawɛ Kooro Amasea bibaa Ussia, o chiɡ o mɛɛ naa ta dɛ di kora, dɛ o di bene fi dɛ anumɛl.

²² Onee yoa dɛ berɛ lɛ bwɛɛ bɛl baa dɛ yerɔ Elat tɛ Juda tena dɛ kwaa vɔrɔwo, o mɛɛ Kooro Amasea seo habɔɔ.

Israel Kooro Jɛroboam waa teŋa nɛɛ

²³ Kooro Amasea aa di kora Juda harɛ bene fi dɛ anue taa Kooro Jɛroboam waa teŋa nɛɛ ba di kora Israel harɛ ta. O soɡe Samaria di kora bene fifraanaarɛ dɛ beŋkpoŋ.

²⁴ O ɛ wechɔɡa dɛ jo Korowii nɛ. Wechɔɡa Nɛbat bibaa Kooro Jɛroboam aa ɛa a che a ta Israel tena ɡe ɛ wechɔɡa la, o ta an ɡelɛ.

²⁵ Kooro Jɛroboam waa teŋa nɛɛ yoo lɛ Israel harɛ o jwɛhre aa lɔ Hamat waa lɔ weekaŋle harɛbɔr, dɛ kaa Yar Mpo waa lɔ weekaŋle nyunduabɔr. Dɛ ɡɛɛ Korowii Israel tena aa dɛ tomɔ la che o keame Jona nɛɛ dɛ bol. Jona le bwɛɛ bɛl baa dɛ yerɔ Gat Hɛfa, o mɛɛ sɔne Amitai.

²⁶ Dɛ Korowii na wahala kohona Israel tena aa lɔ a ta, deheɛre ne yoma bwa, nomɛlbwa aa wola toole dɛ́ lɛɛ ba.

²⁷ Korowii aa wola ŋɔe ŋɔ, wɛɛ ɡeloo Israel nɛra tonɛ kwaara le harɛ la ta la, o cheɡɛ Kooro Jehoas bibaa Kooro Jɛroboam waa teŋa nɛɛ la nɛ, dɛ lɛɛ ba.

²⁸ Kooro Jɛroboam waa teŋa nɛɛ bwara waa aa kaa, ne anɔ la waa ɛa, laa waa yoa, ne ɡɛ waa lɛ bwɛjena Damaskɔs ne Hamat aa lɔ Juda harɛ ta tɛ Israel tena la, ba chwera do Israel Koranar Waa Tɔne bini.

²⁹ Kooro Jɛroboam waa teŋa nɛɛ sewɔ ka pu o naawa Israel koranar, asɛ o bibaa Sekaria chiɡ o naa ta, dɛ di kora.