2 Koranar 13 - mzwDBL

Israel Kooro Jehoahas

¹ Kooro Ahasia bibaa Joas aa di kora Juda harɛ ta bene fifraanɛ dɛ atoro taa Kooro Jehu bibaa Kooro Jehoahas di kora Israel harɛ ta. Dɛ bwɛjen Samariaa o so, dɛ di kora bene fi dɛ anuanɛ.

² Kooro Jehoahas teŋɛ waa Kooro Nɛbat bibaa Kooro Jɛroboam aa ɛa, dɛ ɡel Israel tena che a ta ɛ wechɔɡa, dɛ jo Korowii nɛɛ la ta, o ta an ɡelɛ.

³ Anomanta, Korowii baah di Israel tena nɛɛ taeh, asɛ o kpɔ ba do Siiria Kooro Hasael, ne o bibaa Bɛn Hadad lɔɡa biɡri.

⁴ Kooro Jehoahas soŋe Korowii a wa, asɛ o no. Dɛ Korowii na fiiɡa Siiria kooro aa dɛ fiiɡi Israel tena kohona.

⁵ Korowii le nɛn tɛ Israel tena, asɛ o lɛɛ ba le Siiria tena lɔɡa, ba berɛ so deŋnesɔɔhna ta ɡɛ ba fa aa soɡa wubwa la.

⁶ Kɛ ba ta wechɔɡa Kooro Jɛroboam aa ɡela Israel tena ɛ dɛ jo Korowii nɛɛ la ta leɛ, dɛ ta teŋɛ dɛɛ ɛa. Ba ta voɡhaah Asera dajaŋa baa paaɡa Samaria la chɔɡɛ.

⁷ Siiria Kooro Hasael ne o laa tena pɔ Israel tena nɛ, dɛ ɡel Kooro Jehoahas laa tena mule. O laa tena baa kaa laanee, nɛra baa jemɛ jaɡre ta soɡa fifraanue, ne torɔɡore fi, dɛ laa tena baa dɛ valɛ harɛ nɛra kaɡboŋa fi. Siiria laa tena kpoo ba kabora, dɛ tiɡri ba do harɛ kɛŋɔ pɛla ta teera ken.

⁸ Wobɛlbwa ɡe Kooro Jehoahas aa ɛa la, ba chwera do Israel Koranar Waa Tɔne bini.

⁹ Kooro Jehoahas baa sewɛ, asɛ ba huɡo bela baa huɡe o naawa bwɛjen Samaria. Asɛ o bibaa Jehoas chiɡ o naa ta dɛ di kora.

Israel Kooro Jehoas

¹⁰ Kooro Joas aa di kora Juda harɛ ta bene fifraatoro dɛ anuanɛ taa Kooro Jehoahas bibaa Kooro Jehoas di kora Israel harɛ ta. O soɡe Samaria di kora bene fi dɛ anumɛl.

¹¹ Kooro Jehoas ɡe ɛ wechɔɡa, dɛ jo Korowii nɛ, dɛ teŋɛ wechɔɡa Kooro Jɛroboam waa ɛ Nɛbat bibaa waa waa ɛa, dɛ ɡel Israel tena ɡe ɛ wechɔɡa la ta.

¹² Wobɛlbwa Kooro Jehoas aa ɛa ne laa o ne Juda Kooro Amasea aa yoa la, ba chwera do Israel Koranar Waa Tɔne bini.

¹³ Kooro Jehoas sewɔ dɛ ka chɔ o naawa Israel koranar hoɡa ta Samaria. Asɛ o bibaa Jɛroboam waa teŋa nɛɛ chiɡ o naa ta dɛ di kora.

Elaesa seo wa

¹⁴ Korowii keame Elaesa bwara weo, a taa o che dɛ sewɛ. Asɛ Israel Kooro Jehoas la dɛ ka nao dɛ wi baɡlo dɛ ŋɔ, “N dɔɔ! N dɔɔ! Nɛn waa cheɡɛ Israel tena habɔɔ!”

¹⁵ Anee Korowii keame Elaesa ŋɔ, “Ka kpɔ to ne hɛma ba.” Asɛ kooro la ka kpɔ ba tɛo.

¹⁶ Asɛ Korowii keame Elaesa ŋɔ Israel kooro la be ŋɔ, “Kpɔ to la kpoŋe.” Asɛ o kpɔ kpoŋe, asɛ Elaesa kpɔ o nɔɔra dawɛ o nɔɔra ta.

¹⁷ Korowii keame Elaesa ŋɔ kooro la be ŋɔ, “Laa wee leebɔr tokoro nɔ pili.” Asɛ o laa pili. Elaesa ŋɔ o be ŋɔ, “Ta hɛm la.” Asɛ kooro la ta hɛm la ta. Korowii keame Elaesa ŋɔ, “Henee cheɡa tɛ Korowii hɛm waa che o ta dɛ́ ɡel he pɔ Siiria tena nɛ. Hɛɛ yoo ba bwɛjen Afɛk waa lɔ Siiria harɛ taa, ka tel kɛŋɔ haa pɔ ba nɛ kwaraa ken.”

¹⁸ Asɛ Korowii keame Elaesa ŋɔ kooro be ŋɔ, “Kpɔ hɛma aa kaa la lɔ harɛ.” Asɛ kooro la kpɔ hɛma la lɔ harɛ kera atoro dɛ ɡel.

¹⁹ Korowii keame Elaesa baah di kooro la nɛ dɛ ŋɔ, “A chɛ kɛŋɔ he fee kpɔ lɔ harɛ kera anue kɛɛ kera anumɛl, dɛ́ fee won pɔ Siiria tena nɛɛ kwaraa dɛ́ chɔɡ ba, kɛ kera atoro ɡboo hɛɛ ba wona pɔ ba nɛ.”

²⁰ Korowii keame Elaesa baa sewɛ asɛ ba huɡo. Dɛ benanyoa bɛlbwa, Moab tena yon lɔ ba tɔ Israel tena nɛɛ dɛ́ kah ba kwa, dɛ́ berɛ kaa warane.

²¹ Awola bɛl, dɛ Israel tena dɛ huɡe nomɛl, asɛ dɛ na Moab nɛnlaa bane baa dɛ ba ba kah ba kwa. Anee Israel tena la kpɔ chɔɔ la ta bwebɔɔ baa huɡe Elaesa o bini la, dɛ chwa kaa. Chɔɔ la aa dena ka leɡe Elaesa hoɡa la, o berɔ dɔ mkpa dɛ ir che o naa ta.

Israel ne Siiria tena laa yoi

²² Siiria Kooro Hasael fiiɡi Israel tena, ɡɛ saŋ bwa Kooro Jehoahas fa aa di kora Israel harɛ ta la,

²³ kɛ Korowii dɔ tedoma ba nɛ dɛ na ba sum, fɔo o ne ba naawa Abraham ne Aesek ne Jekɔb aa fɔwa la wa. Ba le fini, waa nyin kɛŋɔ ó chɔɡ ba, kɛɛ dɛ́ doŋ ba le o sie.

²⁴ Siiria Kooro Hasael baa sewɛ, asɛ o bibaa Bɛn Hadad chiɡ o naa ta dɛ di kora.

²⁵ Asɛ Israel Kooro Jehoas waa ɛ Kooro Jehoahas bibaa la, berɛ ba lɛ Israel harɛ ta bwɛjena Kooro Bɛn Hadad be. Dɛ ɡɛ saŋ o mɛɛ Jehoahas aa di kora laanee ba lɛ Israel bwɛjena la. Kera atoro bwaa Kooro Jehoas ne o laa tena ka yo Siiria tena, dɛ pɔ ba nɛ.