2 Koranar 12 - mzwDBL

Juda Kooro Joas

¹ Kooro Jehu aa di kora Israel harɛ bene anuanɛ taa Kooro Joas di kora Juda harɛ ta. O soɡe Jerusalam di kora bene fifraanaarɛ. O nya sɔne Sebea, dɛ le bwɛjen Beɛseeba.

² Kooro Joas ɛ waa aa dɛ too Korowii tea, dɛkalkɛ sɔfo Jehoiada baɡlo wa.

³ Kɛ Kooro Joas ta ɡelɛ ba chɔɡ bɔra voɡtoroma aa dɛ tomɛ ba voɡa, asɛ ba ta teŋɛ ɛ sarahare dɛɛ fuh daawiile a sɔɔh aa soma bela.

⁴ Awola bɛl, Kooro Joas ŋɔ sɔfore la be ŋɔ, “Hé lɛ suuɡare baa dɛ ba a ne baa ɛ sarahare Korowii Dea la bwa. Anɔ la baa dɛ ba a ne tɔpere bɛlbwa, ne deŋnesɔɔhna kwaa ne an la aa le bambile bini ba kpɔ dɛɛ ba bwa.

⁵ Sɔ́fo bɛlbwa lɛ suuɡare la le nɛra baa dɛ cheɡ suuɡare la be, dɛ́ ɡel bá kpɔ kwaa Korowii Dea la bela waa chɔɡa bwa.”

⁶ Kɛ Kooro Joas aa di kora bene fifraanɛ dɛ atoro la, dɛ sɔfore la ta Korowii Dea la bobɛlbwa kwaarɛ mɔɔ.

⁷ Anomanta, o yerɛ sɔfo Jehoiada ne sɔfore baa jaa la dɛ bɔɔ ba ŋɔ, “Ɛrɛɛ haa wola Korowii Dea la kwaa nɔɔ? Le fini dɛɛ kaa, he bɛ suuɡare dɛɛ lɛ nɛra baa dɛ cheɡ suuɡa la be kpa, he ba a ne bá kpɔ kwaa Korowii Dea la.”

⁸ Asɛ sɔfore la sɛh kɛŋɔ baa suuɡaa lɛ le nɛra la be, ba ɡbaɡba ɡe aa Korowii Dea laanee kwaa.

⁹ Asɛ sɔfo Jehoiada kpɔ daka bɛl dɛ forɛ o tɔ bɔɔ, dɛ kpɔ ka cheɡ kon baa kpoo kwaa ɛ saraha dɛɛ tɛ Korowii o ta la jwɛh, doonyoa baa kpɔ o ta dɛɛ jo Korowii Dea la diɡ bɔr. Sɔfore baa dɛ daah ɡɛ doonyoa la, yon kpɔ suuɡare nɛra aa dɛ ba a ne Korowii Dea bela la bwa do o bini.

¹⁰ Ba nao kɛŋɔ suuɡa warɛ o bini naa, koodem karake ne Sɔfonomoa yon ba kure dɛ́ pa do pure bini.

¹¹ Ba kuro dɛ jemɛ a nyoa aa, ba yon kpɔ do nɛra baa lee ba baa nyiŋi nɛra baa dɛ ɛ Korowii Dea toma la nɔn ta. Ba yon kpɔ a ne bɔ kapenta tena ne mamaala baa dɛ kwaa Korowii Dea la,

¹² ne nɛra baa dɛ peɡri bwea, ne anɔ la baa kpɔ yawɛ daa, ne bwea baa sɛah dɛ́ kpɔ kwaa Korowii Dea la, dɛ ane bɛlbwa ɡe aa jaa.

¹³ Ba ta suuɡa la bɛlbwa kpɔe bɔ suuɡapoŋ loɡa, ne loɡa baa do chal kɛɛ nee a bini dɛ ɛ dɛɛ merɛ kwaa ta, ne bune baa kpɔa dɛɛ menɛ kandere ŋwɛɛra ne bɛle, kɛɛ suuɡaswɛm komɛlbwa, kɛɛ suuɡapoŋ dɛ cheɡ Korowii Dea bela.

¹⁴ Ba kpɔ suuɡa la bwa tɛ tom-ɛɛra la, bá kpɔ yawɛ kwaa báa kpɔ kwaa Korowii Dea la ɡbo.

¹⁵ Nɛra baa kpɔ suuɡa la tɛ baa ɛ toma la ta soɡe ba ne tom-ɛɛra la bu nkontaa, dɛkalkɛŋɔ dɛ ba ɛ toma la kɛrɛdɛ ba waa dɔ kasinteŋ.

¹⁶ Bolchɔɡe dii saraha ne wechɔɡa kpɔe dɛ́ kɛ saraha suuɡa te, baa a te kpɔe baa do daka la bini, a te ɛ sɔfore la kwa.

¹⁷ Gɛ saŋ dɛ Siiria Kooro Hasael ne o laa tena laŋɔ ka yo bwɛjen Gat tena dɛ pɔ ba nɛ, dɛ kpɔ sie chaɡɛ Jerusalam dɛ́ fe ba yo ba ɡe.

¹⁸ Asɛ Kooro Joas kpɔ kondɛɛɡa aa do ɡoroŋ o ne o naawa koranar Jehosafat, ne Jehoram dɛ o mɛɛ Kooro Ahasia aa kpɔa do Korowii nɔn ta, dɛ kpɔ o kwaa ja dɛ suuɡaswɛm aa lɔ deene baa dɛ cheɡ laala a yoɡ aa kpeɡa a bini Korowii Dea ne koodem bwa, ka kɛ Kooro Hasael, asɛ o ɡel Jerusalam tena ba yoi.

¹⁹ Wobɛlbwa Kooro Joas aa ɛa ɡɛ saŋ waa dɛ di kora Juda harɛ ta la, ba chwera do Juda Koranar Waa Tɔne bini.

²⁰ O nomonome vɔrɔwe o vɔrɔwa dɛ ɛo dɔm, dɛ kpoo Bɛt Milo, o chɔ ŋwɛnɛ waa chɔa kaa bwɛɛ bɛl baa dɛ yerɔ Sila.

²¹ O nomonome baa kpoo ba la bɛl sɔne Josabad, o mɛɛ sɔne Simiat, dɛ Jehosabad, o ɡe mɛɛ sɔne Soma. Kooro Joas aa sewa la, ba huɡo o naawa lalbɔɔ bini Jerusalam waa ɛ Kooro Devid Bwɛjen ta, asɛ o bibaa Amasea ba chiɡ o naa ta dɛ di kora.