2 Koranar 11 - mzwDBL

Juda haŋkooro Atalia

¹ Kooro Ahasia nya baa dɛ yerɔ Atalia aa naa kɛ o bibaa Kooro Ahasia sewɔ la, o ŋɔ bá kpoo koobii baa ba di kora la bwa.

² Kɛ Jehoseba waa ɛ Kooro Jehoram bihaah, dɛ berɛ ɛ Ahasia nimambie, lawɛ Ahasia bibaa Joas la le koodem bela. Dɛ ba fe dɛ nyin bá kpo o ne o bala. Anomanta, o nyaana la lawɛ o ne naate waa dɛ nyiŋi o nɛɛ la ka sɔh Korowii Dea, bobɛl baa dɛ chɔ o bini le Atalia nɔn ta, asɛ ba ta on kpoe.

³ Jehoseba kpɔ Joas sɔh Korowii Dea bela bene anumɛl, ɡɛ saŋ haŋkooro Atalia aa dɛ nyiŋi harɛ la ta la.

⁴ Joas lawa ka sɔh bene anuanɛ habɔɔ la, sɔfo Jehoiada ɡelɔ ba yerɛ laa sitɔɔla baa dɛ nyiŋi laa tena baa dɛ daah kooro, ne laa tena baa dɛ daah koodem. Asɛ o ɡel ba ba bane o be Korowii Dea, o ne ba fɔwɛ fɔo ba ŋwɛɛ ntam Korowii Dea bela. O kpɔ Kooro Ahasia bibaa Joas baɡ ba.

⁵ O do ba ŋɔ, “Gɛ maa dɛ nyin kɛ he ɛ laanee kɛŋɔ, he balɔ dɛɛ ba ba daah Korowii Dea Ona Tɔpere aa, he bini bele batoro ba daah koodem,

⁶ bele batoro ɡe ka so doonyoa baa dɛ yerɔ Sur la nyoa, ásɛ bele batoro ɡe ɛɛ daah doonyoa waa lɔ koodem doonyoa habɔɔ la.

⁷ Nɛmbele banɛ baa wola la ka daah Ona Tɔpere la bwa ka so Korowii Dea dɛɛ daah kooro.

⁸ Hé kpɔ he dɔmkwaa kpoŋe dɛ́ che bar kooro, dɛ́ so o jwɛh bobɛlbwa waa kaa. Ásɛ nomɛlbwa ba dɛ kaa kooro jwɛh aa, hé kpoo.”

⁹ Laa sitɔɔla la ɛ ɡɛ sɔfo Jehoiada aa do ba la bwa. Ba bini bɛlbwa kpɔ o nɛra baa dɛ ba toma ta Ona Tɔpere ta, ne banɔ la baa wola toma ta ba Ona Tɔpere ta la bwa ba sɔfo Jehoiada be.

¹⁰ Sɔfo Jehoiada kpɔ lampeare ne kwaa baa kpɔa dɛɛ tɔ ɡbemɡbe laa ta, a ɛ Kooro Devid kwaa ba kpɔ cheɡ Korowii Dea la tɛ laa sitɔɔla la.

¹¹ Ate, o ɡel nɛra baa dɛ daah la bɛlbwa kpoŋe o dɔmkon ba che Korowii Dea, ne saraha kon la sie, dɛ bar Kooro Joas.

¹² Name sɔfo Jehoiada ka lawɛ Joas le buse, dɛ kpɔ kooɡbɛrɛ piu, dɛ kpɔ fɔo baa fɔwa dɛ che o ta dɛɛ di kora harɛ la ta do o nɔn ta. Dɛ fuɡe noo do o nyu ta dɛ cheɡo kora ta, asɛ ba lɔ kpaŋa dɛ moo ŋɔ, “Kórowii tɛ kooro mkpajaŋ!”

¹³ Haŋkooro Atalia aa no moola nɛra baa dɛ daah ne nɛra baa lɔ bela aa dɛ moo la, o ɛ warane la ba be Korowii Dea bela.

¹⁴ O baa na kɛŋɔ kooro la cheɡɛ Korowii Dea la sie pila bɛl jwɛh ɡɛ ba nawee wa aa doa. Asɛ laa sitɔɔla ne bɛlhoohla che kooro jwɛh. Asɛ harɛ la ta nomɛlbwa sie lɛ, baa hoh bɛle. Belaa haŋkooro Atalia laa o batakaare kɛɛ a baɡle kɛ o baah diu kohona, dɛ ŋɔ, “He bwa lee mɛ tɛ! He ɛɛ mɛ dɔm!”

¹⁵ Dɛ sɔfo Jehoiada aa nyin kɛ bá kpo Atalia Korowii Dea bɔr bela, anomanta, o do laa sitɔɔla la ŋɔ, “Hé lawɔ le laa tena nɔ baah ta, dɛ́ kpo nomɛlbwa waa dɛ nyin kɛ ó ba lɛo.”

¹⁶ Ate, ba tɛɡro le, dɛ kpoo Jaɡre Doonyoa, bela jaɡre aa cheɡa dɛɛ jo koodem la ta.

Jehoiada mmara waa chara

¹⁷ Sɔfo Jehoiada ne Kooro Joas fɔwɛ fɔo, o chɔ Korowii ne kooro ne harɛ la ta nɛra baah ta, kɛŋɔ nɛra la ɛ Korowii nɛra. Sɔfo Jehoiada bɔɔ Kooro Joas ne o nɛra ŋɔ bá baɡɛ nyoa ŋɔ ba wa ɛɛ dɔ kasinteŋii tɛ dɔŋa ne Korowii.

¹⁸ Harɛ la ta nɛra bwa la voɡ Baal dea, dɛ ka paɡre kwaa baa kpoo kwaa a ta dɛ ɛ saraha dɛɛ tɛo, ne voɡare aa lɔ dea la bini bwa kwaraa. Dɛ lawɛ o kerekpoŋri baa dɛ yerɔ Matan, dɛ kpoo kon baa dɛ ɛ saraha o ta la sie. Asɛ sɔfo Jehoiada ɡel nɛra baa dɛ daah la ka che dɛɛ daah Korowii Dea la.

¹⁹ Sɔfo Jehoiada ɡelɔ laa sitɔɔla baa dɛ nyiŋi laa tena baa dɛ daah kooro, ne laa tena baa dɛ daah koodem, ne harɛ la ta nɛra bwa kpɔ kooro la le Korowii Dea bela, dɛ kpɔɔ kpɔ ŋwɛnɛ nɛra baa dɛ daah la aa dɛ kpɔ o ta, dɛ ba o ne koodem o ba so kookara ta.

²⁰ Asɛ harɛ la ta nɛra bwa sie lɛ, bwɛjen la sɔɔh, kpoe baa kpo haŋkooro Atalia koodem la wa.

²¹ Kooro Joas aa di kora Juda harɛ dɛ o dɔ bene anuanɛ.