2 Koranar 10 - mzwDBL

Kooro Ahab naanar kpoora

¹ Dɛ Kooro Ahab dɔ bibaala fifraanuanɛ ba do bwɛjen Samaria. Kooro Jehu chwerɛ tɔne, dɛ tomɛ nɛra ba kpɔ la Samaria ka tɛ Jesreel nomonnyuune baa lɔ bela, ne bela nomonome ne nɛra baa dɛ nyiŋi Kooro Ahab bii nɛ. Tɔn la bini waa kɛŋɔ,

² “Kooro Ahab bii lɔ he be, asɛ he dɔ torɔɡore, ne jaɡre dɛ dɔmkwa, asɛ ba ma danjwɛkpeɡ bar he bwɛjen o do kpeɡri. Dɛ tɔn nɔ tel he be naa,

³ hé nyiŋi he dɔɔ bii la bini onɔ la waa maɡra o waa do wer, ásɛ he kpɔɔ so o mɛɛ buɡ ta ó di kora, ásɛ he che o mun ta dɛ́ yo dɛɛ tɛo.”

⁴ Baa kure tɔn la, ba ɔmɔ kɛrɛdɛ dɛ ŋɔ, “Kooro Joram ne Kooro Ahasia kwaraa ta wone che Kooro Jehu sie, ɛrɛɛ ya te ɛɛ ba wona ɔ?”

⁵ Koodem bela nomoa, ne onɔ la waa dɛ nyiŋi bwɛjen la ta, ne nomonnyuune ne nɛra baa dɛ nyiŋi Kooro Ahab bii nɛɛ tomɔ ba ka ŋɔ Kooro Jehu be ŋɔ, “He bonɔɔnaa yan, wobɛlbwa haa bol ya be la, yaa ɛo. Yaa kooro bɛlbwa cheɡa ba, ɛ ɡɛ bwa aa maɡra tɛɛ.”

⁶ Anee Kooro Jehu berɛ chwerɛ tɔn nɛɛte ja ŋɔ, “Dɛ he ja n nɛɛ dɛɛ no n waa tenaa, hé kpɔ Kooro Ahab bibaala nyuune ba tɛ mɛ Jesreel kere saŋ nɔ bɔr.” Dɛ Kooro Ahab bibaala fifraanuanɛ la lɔ bwɛjen Samaria nomonnyuune la be baa nyiŋi ba nɛ.

⁷ Tɔn la aa tel ba be la, ba lawɛ koobii fifraanuanɛ la, dɛ teŋni ba nyuune, dɛ pa do wɛɡrɛre bini, dɛ kpɔ la Jesreel ka tɛ Kooro Jehu.

⁸ Torome la aa bala la, o ŋɔ Kooro Jehu be kɛŋɔ, nɛra bane kpɔ kooro naanar nyuune la ba Jesreel. Asɛ Kooro Jehu ŋɔ ba be ŋɔ, bá pa darawe dɔŋa nɛɛ bɔre anɛ bwɛjen la doonyojen bela, á chɔ ka tel kere chɔɔ.

⁹ Tɔɔ aa pera chɔɔ la, Kooro Jehu le buse dɛ ba che bwɛɛ la tena bwa sie dɛ ŋɔ, “Hé ta bolchɔɡe dii, menee vɔrɔwe Kooro Joram vɔrɔwa dɛ kpoo. Aah umee kpoo banɔ bwa ɡeɔ?

¹⁰ Anɔ dɛ baɡle kɛŋɔ Kooro Ahab dem nɛra waa Korowii aa cheɡɛ o keame Elaeja nɛɛ dɛ bol la bwa ɛ kpela.”

¹¹ Kooro Jehu kpoo Kooro Ahab dem nɛra baa kaa dɛ do Jesreel bwa, ne o nomonjena ne o daamanar dɛ voɡra bwa. O ta o nomɛlbwa ɡelɛ.

Kooro Ahasia lolanar kpoora

¹² Awola bɛl, Kooro Jehu chiɡ ŋwɛnɛ ta dɛɛ kaa Samaria, dɛ ka tel bobɛl baa dɛ yerɔ Bɛt Ɛkɛd, o munii kɛŋɔ Peteɡra Cheremibɔr.

¹³ Kooro Jehu cheme Juda Kooro Ahasia lolanar bini bane bela, asɛ dɛ pɛɛ ba ŋɔ, “Heyaa bamewa ɔ?” Ba chaŋe ŋɔ, “Kooro Ahasia lolanaree yan. Ya dɛ la Jesreel ka chɔɔ haŋkooro Jɛsɛbɛl bii ne o lolanar bwa.”

¹⁴ Ate, Kooro Jehu do o nɛra baa teŋɛ o nɛɛ ŋɔ, “Hé laɡ ba dɛ bɛ ban kpoo!” Asɛ ba laɡ ba, dɛ ba lɔ nɛra fifraanaarɛ dɛ banɛ. Ba kpoo ba bwa Bɛt Ɛkɛd bela bule bɛl bɔr, bɛlbwa ta kae.

Kooro Ahab lolanar kabora kpoora

¹⁵ Kooro Jehu aa le bela ɡe dɛɛ kaa la, o cheme Rekab bibaa Jɛhɔnadab. Asɛ Kooro Jehu jaamo dɛ pɛɛro ŋɔ, “N ne he liire bwa beŋkpoŋ, hɛɛ ja n nɛɛ kɛɛ?” Jɛhɔnadab chaŋe ŋɔ, “N sɛh ɡɛ.” Kooro Jehu ŋɔ, “Dɛ ɡɛɛ tenaa ɡwaa mɛ.” Asɛ ba ɡwa dɔŋa, Jehu chao dɛ lawɔ o teeh torɔɡo waa soɡe o bini la.

¹⁶ Kooro Jehu ŋɔ o be ŋɔ, “Ya kaa ásɛ he ka na ɡɛ Korowii waa aa lɔ n bini kɛrɛdɛ.” Asɛ ba bwa che Kooro Jehu torɔɡo la bini, dɛ kaa bwɛjen Samaria.

¹⁷ Baa tel Samaria la, Kooro Jehu kpoo Kooro Ahab nɛra baa kaa dɛ do bela la bwa. Beŋkpoŋ kwaraa ta kae, ɡɛ Korowii aa cheɡɛ o keame Elaeja nɛɛ dɛ bol la.

Voɡ Baal toroma kpoora

¹⁸ Ate, Kooro Jehu yerɛ Samaria tena bwa cheme dɛ ŋɔ, “Kooro Ahab tomɛ voɡ Baal tama, kɛ n te ɛɛ tomɔɔ kohona.

¹⁹ Hé yerɛ Baal voɡra ne o kerekpoŋra ne o keamere bwa ba. He bɛ ɡel bɛlbwa ka, n dɔ sarahajen dɛɛ ba ɛɛ tɛ Baal. Nomɛlbwa waa wola balɛ la aa o nyuu dɔ.” Kɛ dɛ neɡra ŋwɛnɛɛ Kooro Jehu ɛɛ kpɔ, dɛ́ kpoo nɛra baa dɛ tomɛ voɡ Baal bwa.

²⁰ Kooro Jehu ŋɔ, “Hé bol dɛ ɡel nomɛlbwa jemɛ kɛ ya le tɔpere yaa cheme cheɡ dɛ́ tomɛ voɡ Baal.” Asɛ ba bol.

²¹ Ate, Kooro Jehu tomɛ nɛra Israel harɛ ta bwa, asɛ nɛra baa dɛ tomɛ voɡ Baal bwa la, bɛlbwa toole waa wola laŋɛ. Ba bwa kaa su voɡ Baal dea, le doonyoa kaa bini bwa.

²² Ate, Kooro Jehu ŋɔ nɛn waa dɛ nyiŋi kon voɡ batakaani aa lɔ o bini be ŋɔ, “Kpɔ batakaani ba tɛ Baal toroma bwa.” Asɛ o ka pa batakaani la ba tɛɛ ba.

²³ Kooro Jehu ne Rekab bibaa Jɛhɔnadab jo Baal dea bela. Kooro Jehu ŋɔ voɡ Baal toroma la be ŋɔ, “Hé nyiŋi he bini dɛ́ na kɛŋɔ Korowii toroma toole he bini, voɡ Baal toroma ɡboo he bwa.”

²⁴ Asɛ Baal toroma jo dea la bini dɛ ka ɛ sarahare ne saraha baa dɛ fuah tɛ voɡ Baal. Dɛ Kooro Jehu le laa tena fifraanuatoro ba che buse dɛ bar dea la. O ŋɔ ba be ŋɔ, “A chɛ kɛ hé kpoo nɛra nɔ bwa, he bini bɛlbwa waa ɡel bɛlbwa dɔ bɔr chwa la, wɛɛ kpɔ o nyuu charɛ o kon!”

²⁵ Kooro Jehu aa dena ka ɛ saraha baa fuah la tonɛ la, o baa do nɛra baa cheɡɛ buse dɛɛ daah ne nomonome la ŋɔ, “Hé la ka kpoo ba, he bɛ ɡel bɛlbwa dɔ bɔr chwa.” Anomanta, ba kaa kpoo ba keri ne, dɛ pa ba lala ta buse, dɛ jo voɡ Baal dea la bini kaa,

²⁶ dɛ kpɔ bwe baa pao ɛ voɡ dɛɛ tomɔ la le dea la bini dɛ fuuh.

²⁷ Anomanta, ba paɡre voɡ Baal bwe la, dɛ kuuɡi o dea la dɛ kpɔ bela berɛ bembɔɔ dɛ ba le fini.

²⁸ Gɛɛ Kooro Jehu chɔɡ voɡ Baal toma le Israel harɛ ta.

²⁹ Kɛ dɛ o ta teŋɛ Kooro Jɛroboam wechɔɡa waa ɛa dɛ ɡel Israel tena ɡe ɛ wechɔɡa dɛ jo Korowii nɛɛ la ta, suuɡaswɛm baa kpɔa ɛ nabali a che bwɛɛre anɛ ane baa dɛ yera Bɛtel ne Dan la.

³⁰ A habɔɔ Korowii ŋɔ Kooro Jehu be ŋɔ, “He ɛ ɡɛ maa ŋɔa he chɔɡ Kooro Ahab naanar bwa, anomanta, mɛɛ ɡeloo he naanar ɛ koranar ka tel naanar bele banaarɛ baa ka ba nɛ, dɛɛ di kora Israel harɛ ta.”

³¹ Kɛ ane a bwa, Kooro Jehu ta Korowii Israel tena aa dɛ tomɔ la mmarare ta teŋɛ o bambile bwa ne, dɛ teŋɛ wechɔɡa Kooro Jɛroboam aa ɛa, dɛ ɡel Israel tena ɡe ɛ wechɔɡa la ta.

Kooro Jehu seo

³² A ɡɛ saŋ Korowii pa mun dɛ ɡel Israel harɛ mule, Siiria Kooro Hasael yoo ba, dɛ lɛ ba harɛ la bobɛla,

³³ le Jɔɔdan Moo wee leebɔr harɛ dɛ kaa Arowa weekaŋle nyundua, dɛ kaa Aanɔn Moo ta, dɛ kpɔ Gelead harɛ bwa ne Basan, bela Gad ne Rubin deene, dɛ Manasɛ wee leebɔr dea tena aa soɡa bwa.

³⁴ Kooro Jehu bwara waa kar ne anɔ la waa wona ɛ bwa, ba chwera do Israel Koranar Waa Tɔne bini.

³⁵ Kooro Jehu sewɔ ba huɡo Samaria, asɛ o bibaa Jehoahas chiɡ o naa ta dɛ di kora.

³⁶ Kooro Jehu soɡe Samaria dɛ di Israel harɛ ta kora bene fifraanɛ dɛ anuatoro.