2 Koranar 1 - mzwDBL

Korowii pa Kooro Ahasia bole

¹ Israel Kooro Ahab seo habɔɔ la, Moab harɛ ta tena le o bibaa Kooro Ahasia habɔɔ.

² Awola bɛl, Kooro Ahasia le o abrɔsane waa lɔ Samaria saldoa bobɛl waa kpɔ daa sam o koodem bela, dɛ le ba le harɛ dɛɛ we weela. Asɛ o tomɛ toroma Filisti tena bwɛjen bɛl baa dɛ yerɔ Ekron voɡ Baal Sibab ta ŋɔ bá ka voɡɛ kɛ wɛɛ dɔ o nyuu yaa.

³ Kɛ Korowii nyundua torome bɛl ŋɔ Korowii keame Elaeja waa le Tisbe be ŋɔ, ó ka cheme Samaria kooro toroma la dɛ́ bɔɔ ŋɔ, “Korowii Israel tena aa dɛ tomɔ toole kpa, asɛ he berɛ dɛɛ la Ekron voɡ Baal Sibub ta ka bɔɔ le o be nɔ naa?

⁴ Anomanta, ŋɔ kooro be ŋɔ waa Korowii aa dɛ bol laanee kɛŋɔ, ‘Haa ɡbaŋre dɛ́ ir le bela haa chɔa la, hɛɛ sewɔɔ.’ ” Asɛ Elaeja ɛ ɡɛ Korowii aa doo la.

⁵ Asɛ toroma la berɛ laa berɛ ba Kooro Ahasia be, asɛ o bɔɔ ba ŋɔ, “Ɛrɛɛ he den ba warane ken?”

⁶ Ba ŋɔ, “Baa bɛl cheme yaa ŋwɛnɛ ta, dɛ ŋɔ yá berɛ ka ŋɔ kooro waa tomɛ yaa be ŋɔ, waa Korowii aa dɛ bol laanee nɔ, ‘Korowiirii wola toole Israel harɛ ta waa he tomɛ baala ŋɔ, bá la ka bɔɔ le Ekron tena voɡ Baal Sibub ta he weela waa nɔ naa? Anomanta, hɛɛ ka kalaŋ taa, sewaa chɛ kɛŋɔ he sewɛ.’ ”

⁷ Kooro la berɛ bɔɔ ba ŋɔ, “Ɛrɛɛ baa waa cheme heyaa dɛ bol ɡɛ waa nɔ la doɔ?”

⁸ Ba chaŋe ŋɔ, “Batakaare waa doa la ɛ oltɔn, dɛ berɛ kpɔ oltɔn ɡe vɔwɛ kiriso.” Kooro la ŋɔ, “Tisbe te Elaeja laanee.”

⁹ Ate, kooro la tomɛ o laa sitɔɔ, dɛ laa tena fifraanue ŋɔ bá ka kpɔ Elaeja ba. Dɛ Elaeja soɡe deŋɡare bɛl doa, asɛ laa sitɔɔ la la o be dɛ ka ŋɔ, “Korowii keame, kooro ŋɔ he tu ba o be he ne ó bol wa.”

¹⁰ Anee Elaeja ŋɔ laa sitɔɔ la be ŋɔ, “Dɛ Korowii keamee men aa, ate nii le nyundua dɛ́ ba fuh he ne he laa tena fifraanue nɔ bwa.” Buɡ la ta, nii den le nyundua dɛ ba fuh laa sitɔɔ la ne o laa tena la bwa ba serewe.

¹¹ Asɛ Kooro Ahasia berɛ tomɛ laa sitɔɔ bɛl ɡe ne o laa tena fifraanue Elaeja be ja, asɛ laa sitɔɔ la ka ŋɔ Elaeja be ŋɔ, “Korowii keame, kooro ŋɔ he tu ba o be he ne ó bol wa taraken.”

¹² Elaeja ŋɔ, “Dɛ Korowii keamee men aa, ate nii le nyundua dɛ́ ba fuh he ne he laa tena fifraanue nɔ bwa.” Ate, Korowii den ɡel nii le nyundua, dɛ ba fuh laa sitɔɔ la ne o laa tena la bwa ba serewe.

¹³ Kooro Ahasia berɔ tomɛ laa sitɔɔ bɛl ɡe ne o laa tena fifraanue ɡe toorotena. Nomontooro te la teehnɔ la Elaeja be, dɛ ka ɡuŋi harɛ o sie dɛ soŋo ŋɔ, “Korowii keame, na n ne n laa tena fifraanue nɔ sum, dɛ́ ɡel ya dɔ ya nyuune.

¹⁴ Nyiŋi na, ɡɛ nii aa le nyundua dɛ ba fuh laa sitɔɔla banɛ la ne ba laa tena bwa ɡɛ! N poori, na n sum dɛ bɛ ɡel a ba n nɛ.”

¹⁵ Belaa Korowii nyundua torome bɛl ŋɔ Elaeja be ŋɔ, “Tu he ne o kaa, dɛɛ berɛ ɔma.” Asɛ Elaeja tu ba o ne nomoa la la kooro la be.

¹⁶ Elaeja aa tel bela la, o ŋɔ Kooro Ahasia be ŋɔ, “N naa kooro, waa Korowii aa dɛ bol he be laanee kɛŋɔ, Korowiirii wola toole Israel harɛ ta waa he tomɛ toroma ŋɔ bá la ka bɔɔ le Ekron voɡ Baal Sibub ta he weela nɔ waa naa? A ɡɛ nomanta, haa kalaŋ ta ira ba, sewaa chɛ kɛ he sewɛ.”

¹⁷ Anomanta, Kooro Ahasia sewɔ ɡɛ Korowii aa cheɡɛ o keame Elaeja nɛɛ dɛ bol la ta. Dɛ Kooro Ahasia ta bibaa dɔe, asɛ o nime Joram chiɡ o naa ta dɛ di Israel kora. Kooro Jehosafat bibaa Kooro Jehoram aa di kora Juda harɛ ta bennɛɛte taa Kooro Joram di kora.

¹⁸ Waa Kooro Ahasia aa ɛa o kora dii ta bwa la, ba chwera do Israel Koranar Waa Tɔne bini.