2 Kɔrent 8 - mzwDBL

Gɛ aa chɛ kɛ asɔre tena ɛɛ kɛ kwa

¹ Yabala, ya dɛ nyin he jemɛ ɡɛ Korowii aa sune Makidoonia asɔre tena nɛɛ dɛ cha ba ba dɔ bonya kohona.

² Ba na wahala kɛrɛdɛ. A lole kɛ nyaaraa ban kohona, kɛ ba sie aa lɛ Yeesu lɛɛ waa lɛɛ ba la ta kohona nomanta, ba wono ta suuɡa kohona asɛ ba kpɔ cha nɛra.

³ Mɛɛ wonoo ŋɔ ba ta tea tɛ yaa kwaa ɡɛ ba bokpeɡa aa tela, hale ba tɛo ɡwaa ba bokpeɡa del kwara. Ba ɡbaɡba tetooraa ba ɛ ɡɛ, nɛn laa do ba.

⁴ Ba ɡbaɡbaa soŋe yaa sibeɡra ne ŋɔ yá ɡel ba ja Korowii nɛra ba wa aa toɡra la nɛ.

⁵ Ba ɛ waa dɛ ɡwaa ɡɛ ya te fe aa dɛ lii. Ba tɔ sie kpɔ ba te do N Naa Korowii nɔn ta, mɔɔ dɛ kpɔ ba te do ya ɡe nɔn ta ɡɛ Korowii aa dɛ nyin.

⁶ Anomanta, ya ŋɔ Taetos be ŋɔ tondɛɛɡa nɔ soo waa pa a mun la, ó den ba choŋi a ta, ásɛ dɛ cha heyaa he ɛ wedɛɛɡa haa dɛ ɛ kwaa kɛɛ bɔr la ka tonɛ.

⁷ He dɛ ɛ waa Yeesu waa bwa ta, yarada ta, waa bola ta, wejema ta, ne nyina haa dɛ nyin nɛra chae ta, ne nyina haa dɛ nyin yaa la ta. Anomanta, ya dɛ nyin kɛ hɛɛ ɛ waa kwaa kɛɛ ɡe ta.

⁸ N ta bolɛ dɛɛ bil a ɛ lao kɛŋɔ hɛ́ɛ kɛ. N dɛ nyin n jemɛ kɛŋɔ he nɛnnyin la ɛ nɛnnyin kasinteŋ. A waa n baɡle ɡɛ bane siwi aa swɛɛ kwaa kɛɛ ta la.

⁹ Kɛ he na ɡɛ ya Dɔɔ Yeesu Kristo aa sune ya nɛɛ dɛ cha yaa kenɛ? He nao kɛŋɔ o fa dɔ kwaa nɔ bwa, dɛ koh he waa dɛ berɛ nya, ásɛ a che o nyae ta he berɛ dɔɔhna.

¹⁰ Gɛ n te aa naa kɛŋɔ hé den tonɛ waa haa pa a mun bena ken la. Heyaa tɔ sie dɛ baɡle kɛŋɔ he dɛ nyin nɛra chae.

¹¹ Hé swɛɛ siwi dɛ tonɛ warane. Hé swɛɛ siwi dɛ tonɛ ɡɛ haa vɔrɔwa la. Hé tɛ anɔ la haa dɔa.

¹² Dɛ he bambile lawɔ kɛ hɛɛ tɛ suuɡaa yaa, ɡɛ bwa haa dɔa dɛ tɛ la, aa su Korowii siwii. Waa ŋɔ hé tɛ ɡwaa ɡɛ haa dɔa.

¹³ Koeh laa n laa dɛɛ kpɔ bane nɛɛ dɛ kpɔ baa dawɛ he nɛ.

¹⁴ Haa dɔa kohona taraken nɔ, a wer kɛŋɔ he cha banɔ la aa kpeɡa tɛɛ ba. He ɛ ɡɛ naa, a baa do kpeɡri tɛ heyaa asɛ ba ɡe dɔ aa, baa cha heyaa. Dɛ he bwa kɛrɛdɛ.

¹⁵ Anee ba chwerɛ Korowii Tɔn bini la. “Naate waa pa kondikwaa kohona la, kondikwaa ta o nɛɛ ɡwaalɛ. Naate waa wola kondikwaa pae kohona la, o ta kondikwaa nyae.”

Taetos toma bwɛjen Kɔrent

¹⁶ Ya dɛ jam Korowii kohona kɛŋɔ waa ɡela Taetos siwi swɛɛ wɛɛ cha heyaa kɛŋɔ ya siwi aa swɛɛ he nɛɛ la.

¹⁷ Waa yaa ŋɔa Táetos ɛ la, o sɛoh ŋɔ wɛɛ ɛo. Dɛ o siwi swɛɛrɔ kɛŋɔ o cha heya, anomanta, o tetooraa o ba he be la.

¹⁸ Ya dɔŋ la asɔre tena bwa aa dɛ kpɛɛro Amanesoma la bola ta la, o ne Taetosee yaa tomɛ he be la.

¹⁹ A ɡbo laa, asɔre tena la bwaa leo ŋɔ ó ja ya nɛɛ ya kpɔ koŋkɛɛla nɔ kaa Jerusalam, ɡɛ aa ɛ ásɛ ya Dɔɔ Yeesu dɔ sɔn. Ya dɛ ɛ toma nɔ dɛ kpɔ dɛɛ baɡle kɛŋɔ ya dɛ nyin Korowii nɛra chae.

²⁰ Ya dɛ nyiŋi kɛrɛdɛ ásɛ nomɛlbwa bɛ waane ba dɔ bol dɛ́ le ɡɛ yaa dɛ nyiŋi koŋkɛɛla damanta nɔ ta.

²¹ Waa aa swɛɛ ya siwi kɛŋɔ yaa ɛ laanee waa aa toɡra. Waa aa toɡra Korowii be ɡbo laa yaa ba ɛɛ. Yaa ɛ waa aa toɡraa nɛwɛnyini ɡe be.

²² A waa ya tomɛ ya dɔŋ ŋɔ ó ne ba ba la. Ya daahno na kera aŋwɛnɛ bwa, dɛ na kɛŋɔ saŋ bɛlbwa la, o siwi swɛɛrɔ kɛŋɔ o cha toma nɔ. Taraken te kwaraa la, o siwi beɡrɔ kɛŋɔ ó cha heyaa kohona, dɛkalkɛŋɔ o dɛ yarada heyaa kohona.

²³ Taetos te la, n ne onee dɛɛ ɛ toma nɔ dɛɛ cha heya. Yabala baa ja o nɛɛ la ɡe la, asɔre tenaa lee ba. Ba nɛɛ Yeesu Kristo che dɔ sɔn.

²⁴ Anomanta, hé ɡel ba na ɡɛ haa dɛ nyin nɛn, ásɛ asɔre tena bwa no, dɛ́ jemɛ kɛŋɔ yaa koh he waa dɛɛ maŋkura ya te la, pɛɛ laa.