2 Kɔrent 7 - mzwDBL

¹ N dandɛɛɡa, yanee Korowii baɡɛ a ɡɛ nyoa nɔ bwa. Anomanta, hé ɡel ya do kaih. Yá laa ya bwadabii ne ya bambile kpɔ wechɔɡa bɛlbwa ta. Hé ɡel ya swɛɛ siwi dɛ do ɡoroŋ, ɔma yaa dɛ ɔmɛ Korowii nomanta.

Pɔɔl silɛɛ wa

² Hé kpɔ he bambile tɛ yaa dɛɛ no ya wa. Ya ta he bɛlbwa wechɔɡa ɛɛ. Ya ta bɛlbwa chɔɡɛ, ya ta bɛlbwa neɡrɛ di ɡe bwa.

³ Waa maa bola nɔ, pwaeh laa mɛɛ pwah heya. Anee n faa bol la, ya dɛ nyin heyaa taeh. Seo taa yoo, bokpeɡa taa yoo, ya ne heyaa.

⁴ He waa dɔ kasinteŋ n be. He ɡelɔ n baŋa ɛɛ pa taeh. Ya wenaale yaa dɛ na bwa habɔɔ la, n bwara ta hwaeh. N sie ta dɛ lɛ taeh.

⁵ Yaa ba Makidoonia harɛ ta habɔɔ kwaraa la, ya bwara ta yaa sɔɔhnɛ. Bobɛlbwa yaa kpɔ la, ya ne wahalaa. Dɛ yoi laa nɛra ɛɛ yo yaa kwara naa, dɛ ya ne bambiwɔrɔbaa.

⁶ Kɛ Korowii aa dɛ larawe tebinichɔɡ te bwara la nomanta, Taetos bala la ɡelɔ ya dɔ bɔlarawa.

⁷ O bala la ɡbo laa larawe ya bwara. O baa baɡle ɡɛ waa baa na heyaa o ɡbabir bambile sɔɔhno he wa. O bolɔ ŋɔ n waa dɛ ɛ heya, dɛ ŋɔ waa n fa aa bola la ɡelɔ he tea bini chɔɡ. O baɡle ɡɛ haa cheɡɛ n habɔɔ dɛ yo dɛɛ tɛ mɛ. Anomanta, name kwaraa n sie lɛ kohona.

⁸ N fa aa chwerɛ heyaa tɔn he tea bini chɔɡ la, a we n nɛ. Kɛ aa berɛ dɛɛ we n nɛ, dɛkalkɛŋɔ he tea bini ta chɔɡɛ la sie.

⁹ Kɛ taraken te n sie lɛo. He tea bini aa chɔɡa waa laa n sie lɛ. He tebinichɔɡ la aa ɡela he charɛ da la, a waa n sie lɛ. Gɛɛ Korowii ɛɛ nyin kɛ nɛwɛnyini tea bini ɛɛ chɔɡ. Anomanta, ya ta heyaa wechɔɡe bɛlbwa ɛɛ.

¹⁰ Nɛwɛnyini tea bini chɔɡɔ ɡɛ Korowii aa dɛ nyin kɛ wɛɛ ɛ aa, a ɡelɔ wɛɛ charɛ o liire. A ɡɛ waa nɔɔ dɛɛ ba Korowii mkpa ne. Anomanta, a ta chɛ kɛ ya ɡel ya tea bini chɔɡ a ta. Kɛ harɛ bonɔ tebinichɔɡ te, seo nee aa ba.

¹¹ Tebinichɔɡ Korowii aa dɛ nyin he dɔ laanee he dɔ la. Hé na waa aa lea tɛ heya. Hé na ɡɛ haa dɛ takapɔ, asɛ he siwi swɛɛ hɛɛ nyin he baɡle kɛ he ta wechɔɡa ɛɛ. Hé na ɡɛ he bwaawee aa ir wechɔɡa ta, hé na ɡɛ haa dɛ ɔmɛ. A ɡelɔ he pɛla lawɛ yaa, asɛ he siwi swɛɛ waa aa toɡra ta. A ɡelɔ he siwi swɛɛ nɛra baa wola wedɛɛɡa ɛɛ nɛɛ he tɛr ba deŋne. He wono baɡle kɛ he ta wechɔɡa bɛlbwa ɛɛ waa la ta.

¹² Maa chwerɛ heyaa tɔn la la, a ta ɛɛ kɛ naate waa ɛ o dɔŋ wechɔɡa, kɛɛ naate o dɔŋ aa ɛo wechɔɡa waa n chwerɔ. Korowii ɡba nao kɛ n chwerɔ ásɛ he won jemɛ ɡɛ haa dɛ nyin yaa.

¹³ Anee larawe ya bwara. A ɡbo laa. Yaa na ɡɛ haa cha Taetos o dɔ silɛɛ la, a ɡelɔ ya sie lɛ.

¹⁴ N fa bol he waa Taetos be, dɛ kpɛɛ heya. He ta ɡelɛ sihiih kpo mɛ. Waa yaa bol he be la bwa ɛ kasinteŋ. Gɛɛ waa yaa bol Taetos be dɛ kpɛɛ heyaa la bwa ɛ kasinteŋ.

¹⁵ O lii ɡɛ he bwa fa aa dɛ no o waa ne ɡɛ he fa aa dɛ tɛo duure dɛɛ ɛ yalayala la aa, dɛ o nyina waa dɛ nyin heyaa la, dɛ jae a na dɛɛ ja.

¹⁶ N sie lɛo kohona kɛŋɔ maa dɔ heyaa dɛ won kpɔ hwɛɡa do he nɛɛ wobɛlbwa ta nɔ.