2 Kɔrent 5 - mzwDBL

Ya Korowii doa bwadabii wa

¹ Ya harɛ nɔ ta bwadabii nɔ do kɛ pata ya do o ta. Ya jemɔ kɛ dɛ o chɔɡaa, Korowii ɛɛ tɛ yaa defale o ɡbaɡba aa doa waa wola chɔɡ bwa nyunduaa.

² Ya bwadabii nɔ te pe yaa. Ya sie cheɡɛ chiŋ yaa hime, dɛɛ nyin kɛŋɔ Korowii kpɔ ya Korowii doa bwadabii la do yaa,

³ ásɛ ya bɛ bwadabii nya.

⁴ Ya taa lɔ ya bwadabii aa do kɛ patare ta nɔ, ya bwara dɛ nyɛɡ, yaa hime. Ya bwadabii nɔ kpɔe dɛ le ya nɛɛ waa laa dena swɛɛ ya siwi. Ya Korowii doa bwadabii la doe waa swɛɛ ya siwi kohona, ásɛ o chiɡ bwadabii waa won sewa nɔ naa ta ya dɔ mkpa.

⁵ Korowiirii cheɡ ɡɛ waa nɔ tɛ yaa, dɛ kpɔ o Domadɛɛɡe tɛ yaa a baɡle kɛŋɔ wɛɛ ba tɛ yaa o mkpa laanee.

⁶ Anomanta, ya bwara aa yaa hwah bwa. Ya jemɔ kɛ ya lɔ ya bwadabii nɔ bini naa, ya toole ya Dɔɔ be,

⁷ dɛkalkɛŋɔ waa yaa dɛ na la ne laa ya so. Waa yaa dɛ yarada a waa la nee ya so.

⁸ Ya bwara aa yaa hwah tamaa bɛlbwa. Dɛ ya ɡel ya bwadabii nɔ waa do kɛ dea nɔ dɛ ka do ya Dɔɔ be naa, ɡɛɛ yaa nyin.

⁹ Anomanta, ya bwadabii nɔ binii ya do oo, ya Dɔɔ bee ya do oo, ya dɛ nyin ya waa bwa won su o siwi,

¹⁰ dɛkalkɛŋɔ ya bwa ɛɛ ba che Yeesu Kristo sie o bol ya waa dɛ́ pa bole, ásɛ bɛlbwa dɔ waa o fa aa soɡe le dɛɛ ɛ la kembɔr. Dɛ bɛlbwa we-ɛɛla wer oo, aa were oo, wɛɛ dɔ a kembɔree.

Yeesu nɛɛ cheɡa ya ne Korowii kpɔ darame

¹¹ Yaa jemɛ ɡɛ Korowii aa do ɔma la waa ya bol waa dɛɛ baɡle nɛra ásɛ ba jemɛ kasinteŋ la. Korowii jemɛ ya bambile bini bwa. N dɛ lii kɛŋɔ he ɡe jemɛ ya nɛnsoore he bambile bini.

¹² Anɔ dɛ baɡle kɛ kpɛɛraa ya kpɛɛ ya te dɛɛ baɡle heyaa ja kɛɛ? Akai! Ya dɛ nyin ya baɡle heyaa wa, ásɛ he che a ta dɛ́ won dɛɛ maŋkura yaa nɛra baa dɛ chɔɡ yaa la be. Waa nɛwɛnyina aa dɛ naa laanee baa maŋkura. Baa nɛn bambile bini waa nyiŋi.

¹³ Dɛ ya nyu toole naa, Korowii waa a ba ɡɛ. Ya sie chɔ harɛ ɡe aa, he wesomee a ba ɡɛ.

¹⁴ Yeesu Kristo nyina waa dɛ nyin yaa laanee dɛɛ do yaa ya we-ɛɛla bwa ta. Gɛ yaa naa laanee kɛŋɔ dɛ nɛmbeŋkpoŋ lɛ nɛra bwa seo sewaa, a kaa chaa kɛ nɛra la bwa sewɔ.

¹⁵ O sewɔ tɛ nɛra bwa. Anomanta, nɛra baa soɡe le la ta chɛ kɛ ba so ba ɡbaɡba soɡa kpa. Bá so tɛ naate waa sewa tɛɛ ba asɛ Korowii iru seo ta la.

¹⁶ Anomanta, fini habɔɔ, yaa nɛra nyiŋi ɡɛ nɛwɛnyina aa dɛ nyiŋ ba la. Ya fa dɛ nyiŋi Yeesu Kristo ɡba ɡɛ, kɛ yaa on ɡɛ nyiŋi kpa.

¹⁷ Nomɛlbwa o ne Yeesu Kristo aa pɛa la, o berɛ nɛnfale. O ɡel o webena o fa aa dɛ ɛ la, dɛ charɛ dafale.

¹⁸ Korowiirii ɛ a bwa. Yeesu Kristo nɛɛ o che, dɛ kwaa ya ne o baah ya ne o pɛ, dɛ tɛ yaa toma nɔ ŋɔ yá nyin nɛra dɛɛ tɛo, ásɛ ba ne o baah kwaa bá won pɛ.

¹⁹ Korowii cheɡɛ Yeesu Kristo nɛɛ dɛ kwaa o ne nɛwɛnyina baah, dɛ laɡ ba dɛɛ pɛl o te, waa wola ba wechɔɡa nyiŋi. Yanee o kpɔ o waa tɛ ŋɔ yá baɡle ɡɛ waa kwaa o ne ba baah, dɛ́ laɡ ba ásɛ o ne ba pɛ.

²⁰ Taraken nɔ, Yeesu Kristoo tomɛ yaa ŋɔ yá bol waa dɛɛ tɛo la. A kaa ɛ kɛŋɔ Korowiirii cheɡɛ ya nɛɛ dɛɛ bol waa nɛra be la. Ya cheɡɛ Yeesu Kristo naa ta dɛɛ soŋe heyaa kɛŋɔ, hé ɡel he ne Korowii baah kwaa he pɛ.

²¹ Dɛ wechɔɡa bɛlbwa toole Yeesu Kristo nɛ, kɛ ya kɛrɛdɛ nomanta, Korowii ɡelɔ o lɛ ya wechɔɡa che, ásɛ dɛ ya ne o pɛo waa, ya waa won su Korowii siwi ó lɛ yaa kɛ nɛndɛɛɡaa yan.