2 Kɔrent 4 - mzwDBL

Korowii toma do kɛŋɔ kondɛɛɡe aa lɔ viine bini

¹ Korowiirii sune ya nɛɛ dɛ tɛ yaa toma nɔ, anomanta, ya bwara aa yaa hwah.

² Ya ɡel waa baa ɛa dɛɛ sɔh ne sihihwaa bɛlbwa. Yaa nɛra neɡre, yaa Korowii waa yaa dɛ baɡle la sie berɛ. Kasinteŋ ɡboo yaa di Korowii sie. A taa ya che dɛ ɡel nɛra ɛɛ jemɛ ya da.

³ Yeesu Kristo Amanesoma nɔ yaa dɛ bol nɔ, dɛ a sɔɔh kwaraa naa, dɛ nɛra baa dɛ nyoɡre la bee a sɔh.

⁴ Bɔnsam baa dɛ maŋkurao harɛ nɔ ta kɛŋɔ Korowii la, o chɔɡ nɛra baa wola Yeesu yarada la liire. Waa nyin kɛŋɔ Amanesoma nii aa le Yeesu Kristo o wa aa dɔ jirima kohona be la chaah ba. Yeesu do ɡɛ Korowii aa doa.

⁵ Ya ɡbaɡba waa laa yaa baɡle nɛra nɔ. Yeesu Kristo waa yaa baɡle kɛŋɔ onee komɛlbwa Dɔɔ, dɛɛ baɡle kɛŋɔ o nomanta, he bonɔɔnaa yan.

⁶ Korowii waa pere bochaah le biro ta, dɛ ɡel bɔr chaah la, onee ɡela o nii chaah ya bambile ne ya sie, asɛ ya won jemɛ ɡɛ o jirima yaa naa Yeesu Kristo be la aa doa.

⁷ Waa nɔ bwa yaa jema nɔ do kɛŋɔ baa kpɔ kondɛɛɡa do viine bini la. Yanee viine la. Yaa kpeɡe, kɛ Korowii kpɔ o toma tɛ yaa asɛ yaa ɛ. O ɛ ɡɛ dɛ́ won baɡle kɛŋɔ kpeɡri aa ɡwaa kpeɡri bwa la le o be. Ya be laa a le.

⁸ Nɛra dɛ ha yaa kohona, kɛ baa ya nɛɛ pɔ. Waa dɛ hiah yaa ya nyiŋi ɡɛ yaa ɛ kahonɛ, kɛ ya bwara aa yɔr, yaa ɡel.

⁹ Nɛra cheɡɛ ya nɛ, kɛ Korowii te ta ya habɔɔ leɛ. Ba ɡo yaa bil te, kɛ ba ta wone kpo yaa.

¹⁰ Wenaale nɔ yaa dɛ na nɔ dɛ baɡle kɛ ya sɛoh kɛ yaa sewɛ Yeesu seo la dɔŋee, ásɛ nɛra na dɛ́ jemɛ kɛ ya dɔ o mkpa la.

¹¹ Yaa soɡe le nɔ, Yeesu nomanta, saŋ bɛlbwaa ya so seo nyoa, ásɛ nɛra na o mkpa ya bwadabii waa won sewa nɔ aa dɔa.

¹² Anomanta, a kaa ɛ kɛ ya te dɛ sewɛ, asɛ he te ɛɛ dɔ mkpa dɛ le ya seo la ta.

¹³ Ba chwerɔ do Korowii Tɔn bini ŋɔ, “Maa yaradaa waa n bol.” Gɛɛ ya ɡee yarada. Yaa yaradaa waa yaa bol.

¹⁴ Ya jemɔ kɛŋɔ Korowii waa ir ya Dɔɔ Yeesu seo ta la, onee dɛɛ ba ya banɔ la ya ne Yeesu aa pɛa la seo ta ira, dɛ́ kpɔ ya ne heyaa kaa o be.

¹⁵ He waa Korowii ɛ anɔ bwa. Waraa nɛra Korowii aa na ba sum den na dɛɛ warɛ. Baa kpɔ jam kohonaa tɛ Korowii ásɛ o dɔ jirima.

¹⁶ Ken nɔ nomanta, bɔhwaah aa yaa lawɛ. Tɔ aa dɛ per nɔ bwaa ya bwadabii ɡwɛɡre dɛɛ la. Kɛ ya bini te la, kpeɡrii ya yarada do dɛɛ la.

¹⁷ Wahala tama nɔ yaa dɛ na tɔpera anɛ bɛl nɔ ɛɛ ɡeloo ya dɔ jirima aa wola jaɡa dɔe, ásɛ a ɡwaa wahala nɔ kwaraa ken.

¹⁸ Kwaa baa dɛ naa siwi ne la ta laa ya te sie dawɛ. Anɔ la baa wola an na la taa ya sie dawɛ. Kwaa baa dɛ naa la te, tɔpera anɛ bɛlee aa di. Asɛ anɔ la baa wola an na ɡe la, a ta jaɡa dɔe bwa.