2 Kɔrent 2 - mzwDBL

¹ Anomanta, n ɛ n liire kɛŋɔ maa he bee ba ásɛ dɛ ba ɡel he tea bini chɔɡ kpa.

² N ɡelɔ he tea bini chɔɡ aa, umee dɛ́ lar mɛ bwara jaɔ? Nɛn toole, nemenɛ he tenten maa chɔɡ he tea bini la.

³ A waa n chwerɛ heyaa tɔn la. Dɛ maa nyin kɛ he nɛra haa chɛ kɛ he ɡel n sie lɛ la, n ba he be ásɛ he berɛ ba ɛɛ mɛ tebinichɔɡ wa, dɛkalkɛŋɔ n jemɛ he bwa waa kɛ n silɛɛ he silɛɛ.

⁴ Tɔn la n fa aa chwerɛ heyaa la, dɛ a dɛ we n nɛɛ taeh, asɛ n tea bini chɔɡ mɛɛ wi siniire dɛɛ chwerɔ. N fa ta on chwerɛ dɛ́ ɡel he tea bini chɔɡ, kɛ n chwerɔ ásɛ he na ɡɛ del maa dɛ nyin he bwa.

Wechɔɡa kpɔe dɛ́ kɛ wechɔɡ-ɛɛ

⁵ Nɛn o fa aa ba tebinichɔɡ ne la, n ɡbo tea bini laa o chɔɡ. He bwa tea binii o chɔɡ ŋwɛnɛ bɛl ta. Maa nyin kɛ n do naate siswɛm, a waa n bola ken la.

⁶ Gɛ he kɛrɛdɛ nyoa aa pɛa he tɛr naate deŋne nɔ, a maɡrɔ. He bɛ ane ɛ ja kpa.

⁷ A chɛ kɛ he kpɔ o wechɔɡa kɛo name, dɛɛ doo ɡbemba. Gɛ laa, o tea bini chɔɡɔ kohona aa, wɛɛ horɔɔ.

⁸ Anomanta, n dɛ soŋe heyaa kɛŋɔ he ɡel o jemɛ kɛŋɔ he dɛ nyinu kohona.

⁹ Maa dɛ nyin kɛŋɔ ń ɛ heyaa dɛ́ na kɛŋɔ hɛɛ no n waa ta wobɛlbwa taa kɛɛ haa no la, a waa n chwerɛ heyaa tɔn la.

¹⁰ Nomɛlbwa haa kpɔ o wechɔɡa kɛo la, n ɡe kpɔɔ kɛo. Nomɛl ɛɛ mɛ waane a chɛ kɛ ń kpɔ kɛo waa, n koh he waa dɛ kpɔ kɛo Yeesu Kristo siwi ta,

¹¹ ásɛ Bɔnsam bɛ ŋwɛnɛ ba dɔ dɛ́ chɔɡ ya wa, dɛkalkɛŋɔ ya jemɛ o ŋwɛnɛre waa kpɔa dɛɛ neɡre nɛn.

Sibeɡra Pɔɔl aa kpɔa bol Korowii wa Troas

¹² Maa baa tel Troas ŋɔ ń bol Yeesu Kristo Amanesoma la, n nao kɛŋɔ ya Dɔɔ pili ŋwɛnɛ tɛ mɛ kɛ ń ɛ toma bela.

¹³ Kɛ maa wola ya dɔŋ Taetos ka pue bela la, n baah ta men sɔɔhnɛ. Anomanta, n kal bela tena dɛ kaa Makidoonia harɛ.

¹⁴ Korowii jam kɛ waa cheɡɛ ya Dɔɔ Yeesu Kristo nɛɛ dɛ ɡel ya yo dɛɛ le nɔ. Korowii cheɡɛ ya nɛɛ dɛ ɡel nɛra ɛɛ no Yeesu Kristo waa la bobɛlbwa kɛŋɔ, konsɔɔhsoma sɔɔh aa dɛ le nomɛlbwa ɛɛ no la.

¹⁵ Yeesu Kristo ɡelɔ ya ɛ daawiile a sɔɔh aa soma Korowii be, ásɛ nɛra Korowii aa dɛ lɛɛ ba, ne banɔ la baa nyoɡre ŋwɛnɛ dɛɛ ba chɔɡa ta bwa ɛɛ no ya sɔɔh.

¹⁶ Banɔ la baa dɛ nyoɡre la ɛɛ no sɔɔh laanee dɛ́ serewe, ásɛ banɔ la Korowii aa dɛ lɛɛ ba la ɡe no dɛ́ dɔ mkpa. Umee dɛ won ɛ ɡɛ toma nɔɔ?

¹⁷ Nɛra kɛrɛdɛ kpɔ Korowii waa la berɛ bona dii dɛ yoɡ dɛɛ di. Ba laa yan. Korowiirii tɛ yaa waa nɔ ŋɔ yáa bola, ásɛ yaa bola o siwi ta bambile bwa ne, pɛɛ ya ne Yeesu Kristo aa pɛa la nomanta.